Nowa wustawa Ruskeje płaći
Wjetšina wolerjow so za daleknježenje prezidenta wuprajiła
Moskwa (dpa/SN). Ruski prezident Wladimir Putin móže po přiwzaću noweje wustawy kraja z wjace prawami hišće wjele lět dale knježić. Při ludowym wothłosowanju dósta Zakładny zakoń, z kotrymž móhł 67lětny hač do 2036 – dalšej šěsćlětnej dobje po lěće 2024 – knježić, 78 procentow přihłosowanja. Něhdźe 21 proc. wolerjow bě přećiwo tomu. Wólbne wobdźělenje wučinješe po informacijach wólbneje komisije 65 proc.
Njewotwisni wobkedźbowarjo běchu za čas sydom dnjow trajaceho wothłosowanja, kotrež so wčera wječor skónči, sta ranjenjow wólbneho prawa registrowali. 110,5 milionow ludźi najwjetšeho kraja swěta bě namołwjenych, swój hłós wotedać. Nowa wustawa, kotraž bě na iniciatiwu prezidenta Putina nastała, přilubja tójšto socialnych dobrotow, kaž tu, zo chcedźa kóžde lěto renty přiměrić.
Liča z wjele pasažěrami
Berlin (dpa/SN). Pućowanski wobchad na dotalnymaj Berlinskimaj lětanišćomaj dožiwi po słowach wobhospodarjerja w přichodnym času zaso wulki rozmach. „Wočakujemy w juliju 20 000 pasažěrow wob dźeń, kónc měsaca hač do 30 000“, rjekny šef lětanišćow Engelbert Lütke Daldrup wčera w Berlinje. Hłowna přičina je wožiwjeny wobchad přez Berlinskeho najwjetšeho poskićerja easyjet. Cyłkownje je tam wot wčerawšeho zaso 36 lětanskich předewzaćow w Tegelu a Schönefeldźe aktiwnych. Wone lětaja do něhdźe 100 městow w 40 krajach.
Wšědna ličba pasažěrow w lětadłach so hač do kónca měsaca potroji. W juniju njeběchu wšědnje wjace hač 8 000 ludźi zličili. Přiwšěm je sej Lütke Daldrup „wěsty, zo traje hišće wjacore lěta, doniž njebudźe niwow časa do korony docpěty. W Berlinje z tym ličimy, zo změjemy za tři abo štyri lěta zaso status quo, kaž mějachmy jón loni. To bě něhdźe 35 milionow pasažěrow nad Berlinom po puću, lětsa budźe jich wo wjele mjenje.“
Koronapandemije dla bě lětanski wobchad w Berlinje a druhdźe wotsrjedź měrca nimale dospołnje zlemjeny.
To a tamne (02.07.20)
Kruwy nastróžić a to w interneće prezentować njeje žadyn žort, ale smjerć strašne a na njedobro derjeměća skotu. Na to skedźbnja Němski zwjazk ratarjow. Hłowna přičina kritiki je nowy trend na internetnej platformje TikTok. Tam ludźo z rukomaj machajo kruwam napřećo smala, doniž wone panisce njećěkaja. Wideja na to w interneće pokazuja. Ratarjo warnuja: Kruwa je hač do 700 kilogramow ćežka a móže njemdrje reagować.
Diamant je na internetnej awkciji wjace hač dwaj milionaj dolarow wunjesł. Je to najwyša płaćizna, kotruž su hdy na ryzy internetnym přesadźowanju docpěli, zdźěla awkciski dom Christie’s w New Yorku. 31 ludźi ze štyrjoch krajow bě so online wo diamant wubědźowało. Dobyćer zapłaći 2,1 milion dolarow, štož je něhdźe 1,9 milionow eurow.
Wothłosowanje so kónči
Moskwa (dpa/SN). W Ruskej kónči so dźensa wothłosowanje wo najwjetšej wustawowej reformje w stawiznach kraja. Z nowym zakonjom móže prezident Wladimir Putin po znowawuzwolenju dołhodobnje w zastojnstwje wostać. Prěnje wuslědki wočakuja po zawrjenju wólbnych lokalow w Kaliningradskej kónčinje wokoło 20 hodź. Wjace hač 110 milionow wolerjow bě namołwjenych wo změnach rozsudźić, z kotrymiž móhł Putin přichodne 16 lět w zastojnstwje wostać. Po tuchwilnej wustawje dyrbjał za štyri lěta doskónčnje wotstupić.
USA cofnu wojakow z Němskeje
Washington (dpa/SN). Cofnjenje něhdźe 9 500 wojakow USA z Němskeje je wobzamknjene. Prezident Donald Trump je wotpowědnemu namjetej zakitowanskeho ministra Marka Espera přihłosował, zdźěli rěčnik zakitowanskeho ministerstwa. Tuchwilu je 34 500 ameriskich wojakow w Němskej. Trump bě wotćah wojakow mjez druhim tak wopodstatnił, zo Němska dosć za zakitowanje njewudawa.
Johnson apeluje na Israel
Z koronakrizu symbolisce rozžohnowali su so ludźo wčera w Praze. Na ...
Sylnišo přećiwo rasizmej wojować
Drježdźany (dpa/SN). Organizacije na dobro migrantow w Sakskej žadaja sej wot politiki a towaršnosće wjace napinanjow přećiwo rasistisce motiwowanej namocy a strukturam. To je „nuznje trjeba a dyrbjało so dawno stać“, apelowaše třěšna organizacija sakskich migrantowych organizacijow (DSM) wčera składnostnje róčnicy zamordowanja Marwy El-Sherbini na Drježdźanskim krajnym sudnistwje. Zastupnistwo zajimow na to pokazuje, zo móža prawicarske struktury hižo wjele lět „nimale njemylene“ dźěłać a zo słušeja rasistiske ranjenja a namóc za mnohich k wšědnemu žiwjenju. Kóždolětne wopominanje ciwilneje towaršnosće a politiki krawneho njeskutka 1. julija 2009 je wažne znamjo, „wone pak njedosaha“.
Wulke wočakowanja na Němsku
Berlin/Brüssel (dpa/SN). Němska na wulkim mjezynarodnym politiskim jewišću: Zwjazkowa republika přewozmje nětko hač do kónca lěta prezidentstwo Rady EU, zastupnistwa wšitkich 27 čłonskich statow, a nimo toho na měsac předsydstwo Bjezstrašnostneje rady UNO. Hłowna tema we woběmaj gremijomaj je bój přećiwo koronakrizy.
Wočakowanja na zwjazkowe knježerstwo su wulke. W předsydstwje Rady EU je najwažniši zaměr, hišće w juliju přichodny sydom lět wopřijacy etat Europskeje unije a miliardy eurow wopřijacy konjunkturny program schwalić. Wažne pak budu tež planowane wikowanske zrěčenje z Wulkej Britaniskej po brexiće, škit klimy, digitalizacija a migracija.
Prezident zwjazka němskeje industrije Dieter Kempf knježerstwo namołwja, swoje napinanja koncentrować. „Wuspěch němskeho prezidentstwa njesměmy z dołhej lisćinu přećow z přewulkimi wočakowanjemi wohrozyć.“ Němska měła w prěnim rjedźe na hospodarske wočerstwjenje Europy dźiwać.
Statnik: Historiski wokomik
Jutře chcedźa planowany kónc zmilinjenja brunicy wobzamknyć
Budyšin (SN). Domowina chce na wosebite wašnje na wšitke wsy dopominać, kotrež buchu brunicy dla wotbagrowane. To je předsyda Domowiny Dawid Statnik hladajo na jutřiše posedźenje Němskeho zwjazkoweho sejma a Zwjazkoweje rady připowědźił. Zapósłancy a zwjazkowe kraje chcedźa zakoń wo skónčenju zmilinjenja brunicy wobzamknyć. „Serbskemu ludej je to historiski wokomik, kotryž nas wšitkich hłuboko hnuje“, rěka w nowinskej zdźělence předsydy Domowiny.
Po měnjenju Statnika njedosaha na informaciskich taflach we łužiskej jězorinje připódla na to pokazać, zo běchu pod dźensnišimi jězorami něhdy serbske wsy. „Ludźo, kotřiž su tam po puću, dyrbjeli widźeć móc, hdźe tele wsy běchu. Zwoprawdźić hodźało so to z płuwacymi bojemi na wodźe.“
Wótry wołojnik (01.07.20)
Prawicarjo maja zetkawanišćo
Podstupim/Bórkowy (dpa/SN). Braniborske nutřkowne ministerstwo z tym liči, zo su sej prawicarjo w Błótach zetkawanišćo wutworili. Wotpowědnu rozprawu Berlinskich nowin je rěčnik nutřkowneho ministerstwa Martin Burmeister, na naprašowanje nowinarjow mjeztym wobkrućił. Po jeho informaciji su předewzaćeljo, kotřiž maja wuske styki k prawicarskoekstremnej měšanej scenje w Choćebuzu, w Bórkowach objekt za swoje zetkanja kupili. Twarjenje skići wosebite logistiske wuměnjenja za přewjedźenje prawicarsko-ekstremistiskich zarjadowanjow kaž koncertow, rjekny Burmeister.
Wěstotne organy su po zdźělenju rěčnika ministerstwa mjeztym informaciske rozmołwy ze zamołwitymi na komunalnej runinje wjedli. Hladajo na dotalne dopóznaća su nětko wosebje nošerjo rozsudow na městnje wužadani, Martin Burmeister potwjerdźi. Dotal pak jasne njeje, w kotrej měrje móža komunalne zarjady aktiwitam prawicarjow w Błótach zadźěwać. Choćebuz je braniborskemu wustawoškitej srjedźišćo prawicarskich ekstremistow w kraju.
