Drježdźany (dpa/SN). Do jutřišeho wu­zwolenja Michaela Kretschmera (CDU) za noweho ministerskeho prezidenta Sakskeje demonstruje čorno-čerwjena koalicija přezjednosć. Koaliciski wuběrk je so wčera na wozjewjenje wotpo­hlada nastupajo přichodne dźěło dorozumił. Na nje ma so stodnjowski program Kretschmera z ćežišćemi kubłanje, wěstota a zhromadne dźěło z komunalnej runinu, ale tež infrastruktura a politiske kubłanje zepěrać, kaž wobě stronje zdźělatej.

Misija wo tři měsacy podlěšena

Berlin (dpa/SN). Zwjazkowy sejm je dźensa tomu přihłosował, antiterorowu misiju Zwjazkoweje wobory w Srjedźnym morju „Sea Guardian“ wo tři měsacy podlěšić. 530 zapósłancow hłosowaše za to, 137 přećiwo tomu, štyrjo so hłosa wzdachu. Misija NATO słuži wobstražowanju mórskeho ruma a bojej přećiwo tero­rizmej. Z łódźow a lětadłow čłonskich statow zestaja swójski wobraz połoženja w srjedźomórskim rumje. 175 němskich wojakow je tuchwilu wobdźělenych.

SPD: Nowy model wobdźělenja

Budyšin (SN/at). Annalena Baerbock kandiduje za zastojnstwo zwjazkoweje předsydki Zwjazka 90/Zelenych. Strona woli klětu w januarje nowe dwójne čoło, a dotalny předsyda Cem Özdemir znowa njekandiduje. Wo wakantne městno prócuje so braniborska zapósłanča zwjazkoweho sejma, dokelž paruje žony w načolnych pozicijach. Dalšu kandidaturu je schleswigsko-holsteinski wobswětowy minister Robert Habeck přizjewił.

Mjez hornjołužiskimi Zelenymi nazhonjataj wobaj kandidataj sympatiju a podpěru. Wobaj staj zastupjerjej politiskeho stila, kotryž móhł nowoprofilowanju ekostrony přewšo wužitny być, kaž bě zhonić. Wjeselo je wosebje wulke, zo pochadźa kandidatka z Braniborskeje. Tam je Annalena Baerbock naposledk napadnyła, zo bě jej energijowy koncern LEAG wuprajene přeprošenje za Borboriny swjedźeń zaso cofnył. Wona je znajerka połoženja we Łužicy a mjenuje w zwisku ze swojim požadanjom „wobmjezowanje klimoweje krizy za Zelenych najwjetše wužadanje přichoda“.

Zaso z Braniborskeje! Zapósłanča Zelenych w zwjazkowym sejmje Annalena Baerbock požada so wo jedne městno na nowym­ dwójnym čole, kotrež chcedźa delegaća Zwjazka 90/Zelenych na zjězdźe klětu w januarje wuzwolić. Zo runje w ekostronje z jeje skerje słabšimi wuchodoněmskimi krajnymi zwjazkami kandidatka z Braniborskeje nastupi, je wšeje česće hódne. Myslu w tymle zwisku na Ska Keller, z Gubina pochadźacu městopředsydku frakcije Zelenych/EFA w Europskim par­lamenće, do kotrehož bu 2009 jako 27lětna wuzwolena. Porno Keller tehdy pak njeje Baerbock dźensa žana započatkarka. Retomas­ funkcijow je wona pola Zelenych hižo na braniborskej, němskej kaž tež europskej runinje wukonjała. Hač to na kóncu dosaha, njewěm. Hdyž Budyski wo­krjesny předsyda Zelenych Jens Bitzka jej „kusatosć a zamóženje so přesadźić“ wobkrući, ma wona snadź šansu – podpěru z Łužicy pak na kóždy pad. Axel Arlt

... su narodne a rěčne mjeńšiny wěrne pokłady w Europskej uniji, kotrež mamy intensiwnje hajić. Porjadne zeznawanje tychle pokładow móže sylnišo přino­šować spěchowanju kubłanja a kultury w nowej Europje regionow. W našej kónčinje Łužicow w Němskej, Pólskej a Čěskej matej serbska rěč kaž tež serbska kultura na zbožo hišće zwjazowacu móc. Ju njemóžemy tež při pytanju za našej šleskej identitu jednorje wuwostajić a wuspinkować. Jako čestny ryćer Šleskeje towaršnosće rjadu johanitow tole stajnje znowa na zetkanjach z ludźimi w Šleskej, Pólskej a tež w Čěskej a přeco z wulkej radosću dźakownje zwěsćam. Tuž Minority­ SafePack podpěruju!