W skupinje lěpje dźěłaja
Paris/Berlin (dpa/SN). Socialne kompetency na dźěłowych wikach nabywaja na wuznamje. Nětko je PISA-studija prěni raz přirunowała, kak derje móža šulerjo w skupinje problemy rozrisać. Wuslědki su dźensa předstajili, po kotrychž leži Němska nastupajo tule socialnu kompetencu mjez 10. a 14. městnom z 50 kubłanskich systemow. Byrnjež to fachowcy za „jara dobry wuslědk“ měli, je kóždemu pjatemu dźewjatkarjej w Němskej ćežko, problemy w teamje rozrisać.
Při wotsunjenju kooperować
Wanzleben (dpa/SN). Sakska, Saksko-Anhaltska, Durinska a Braniborska móhli přichodnje při wotsunjenskej jatbje wušo hromadźe dźěłać. Na to su so nutřkowni ministrojo krajow wčera na zetkanju w saksko-anhaltskim Wanzlebenje dorozumili. Šefojo ressortow su sej přezjedni, zo trjebaš w tymlu času wotpowědne móžnosće, zdźěli hosćićel, nutřkowny minister Saksko-Anhaltskeje Holger Stahlknecht powěsćerni dpa. Jeho sakski kolega Markus Ulbig (wobaj CDU) tuchwilu tajke zarjadnišćo wuhotuje.
Dojednanje podpisałoj
Steinmeier strony namołwił
Berlin (dpa/SN). Zwjazkowy prezident Frank-Walter Steinmeier chce dźensa popołdnju ze šefom FDP Christianom Lindnerom wo tym rěčeć, hač su hišće šansy za jamaisku koaliciju. Powěsćernja dpa rozprawja tež wo zetkanju Steinmeiera do toho z předsydomaj Zelenych Simonu Peter a Cemom Özdemirom.
Po zwrěšćenych sonděrowanjach jamaiskich partnerow bě zwjazkowy prezident wčera strony namołwił, so znowa wo wutworjenje knježerstwa prócować. „Štóž so we wólbach wo politisku zamołwitosć požada, njesmě so potom tłóčić, hdyž ju ma“, rjekny Steinmeier wčera po zetkanju z kanclerku Angelu Merkel (CDU) na hrodźe Bellevue.
Merkel je za nowe kanclerstwo k dispoziciji, mjeńšinowe knježerstwo z měnjacymi wjetšinami wona wotpokazuje.
Ćišć na SPD mjeztym přiběra. Strona njeměła so zamołwitosće za kraj wzdać a so znowa do wulkeje koalicije z uniju podać, kaž bě słyšeć. To pak stronske předsydstwo wčera wotpokaza, byrnjež zwonka njeho tež hłosy za tajki krok byli.
To a tamne (21.11.17)
Bjezmała by 63lětna Natalja Wlasowa z Woronježa dobyće rekordneho lotoweho jackpota w Ruskej zapasła. Pruwujo tipowanski lisćik njebě jeje wnučka pytnyła, zo je wowka dobyła. Hakle tydźeń pozdźišo, jako z wozjewjenjow zhoni, zo dobyćerja jackpota z regiona pytaja, Wlasowa sama lisćik hišće raz pruwowaše a njemóžeše swoje zbožo zapřimnyć. Wona bě rekordny jackpot poł miliardy rublow (něhdźe 7,2 milionaj eurow) dobyła.
Pozdatna bomba před twarjenjom sudnistwa w sewjeroitalskim Mailandźe wopokaza so jako něšto cyle hinaše hač myslene – jako młynčk za marihuanu. To zwěsćichu specialisća hakle, po tym zo bu areal wobšěrnje zrumowany a woni metalowy objekt přepytowachu. Mějachu jón za ručnu granatu, kaž italska powěsćernja Ansa informuje.
„Dyrbimy zmylki přiznać“
„Haj, smy zmylki činili“, rjekny Michael Kretschmer, generalny sekretar sakskeje CDU a manager jeje wólbneho boja, sobotu na zjězdźe Budyskeho wokrjesneho zwjazka CDU w Połčnicy. „Njemóžemy tuž dale tak činić kaž dotal.“
Połčnica (SN/at). Kandidat za zastojnstwje krajneho předsydy a sakskeho ministerskeho prezidenta bě přišoł, zo by wo podpěru wabił a hromadźe z wjace hač 170 přitomnymi čłonami wo konsekwencach z poražki sakskeje CDU při wólbach zwjazkoweho sejma 24. septembra wuradźował. Štóž pak bě z jeho erta hłubšu analyzu wočakował, bu přesłapjeny a dyrbješe so z wuhladom na přichodne palace nadawki spokojić.
Kritizuja zakonje wo brónjach
Washington/Genf (B/SN). Při jednym z najhrózbnišich nadpadow na kemšerjow je njedawno w baptistiskej cyrkwi texaskeho Sutherland Springs 26 ludźi zahinyło a dalšich 30 so zraniło. Cyrkej tónle njeskutk jara wobžaruje, zdobom pak žada sej restriktiwniše zakonje wo brónjach. Předsyda romsko-katolskeje biskopskeje konferency, kardinal Daniel DiNardo, rěčeše wo „fundamentalnym problemje“ towaršnosće w USA. „Kultura žiwjenja“ měła bjezzmyslnej namocy we wšěch formach zadźěwać. Hižo bywši ameriski prezident Barack Obama je prajił: Bóh njech pomha namóc w našej srjedźiznje přewinyć.
Cyrkej w kritice
Zaměrniše medijowe kubłanje
Drježdźany (dpa/SN). Z „masterskim planom“ chce sakske kultusowe ministerstwo digitalizaciju a medijowe kubłanje na šulach pohonjeć. Medijowa kompetenca ma po dokumenće, kotryž je kultusowy minister Frank Haubitz (njestronjan) sobotu předstajił, přichodnje we wučbnych planach wšitkich předmjetow zakótwjena być. Wšitke šule maja po datowym wobjimje njewobmjezowany spěšny internetny přistup dóstać.
Rozsudne wólby trěbne
Santiago de Chile (dpa/SN). Konserwatiwny předewzaćel Sebastián Piñera je prěnje koło prezidentskich wólbow w Chile jasnje dobył, absolutnu wjetšinu pak misnył. Piñera, hižo wot 2011 do 2014 chilski prezident, docpě 36,6 procentow hłosow. Za Alejandra Guilliera, kandidata aliancy solicialistow, socialdemokratow a komunistow, hłosowaše 22,7 procentow. Mjez woběmaj budu 17. decembra rozsudne wólby. Překwapjace třeće městno docpě kandidatka lěwicarskeje koalicije Frente Amplio Beatriz Sánchez z 20,3 procentami.
Sćěhi hidy na žony dopokazane
Sonděrowanja zwrěšćili,kak nětko dale?
Berlin (dpa/SN). Dyr to w nocy w Berlinje: FDP je sonděrowanja za jamaiske zwjazkarstwo z uniju a Zelenymi zwrěšćić dała. SPD nochce jako partnerka w nuzy zaskočić. Měsacaj po wólbach zwjazkoweho sejma knježi bjezradnosć.
„Je lěpje njeknježić, hač wopak knježić“, rjekny předsyda liberalnych Christian Lindner. Tak bu zwjazkowa kanclerka Angela Merkel (CDU) do najćešeje krizy w swojej dwanaćelětnej hamtskej dobje storčena. Frakciski šef Zelenych w zwjazkowym sejmje Anton Hofreiter komentowaše reakciju FDP takle: „Z kóždym dalšim dojednanjom je so panika skerje powjetšowała hač pomjeńšiła. Tohodla móžeš bjezdwěla za to měć, zo chcychu woni mjenje wuhotować, ale su so bóle zamołwitosće bojeli.“
To a tamne (20.11.17)
Po jězbje z 0,61 promilemi alkohola w kreji dyrbi dźowka norwegskeho milionara pokutu přeličenych 25 000 eurow zapłaćić. 22lětnu maja za najbohatšu žonu Norwegskeje, nimo toho zasudźichu ju na pruwowanski čas 18 měsacow, kaž rozprawja nowina Finansavisen. Osloske sudnistwo je pokutu po dochodach 22lětneje wobličiło, při tym pak tež wolóžace fakty wobkedźbowało. Młoda žona ma zamóženje něhdźe 795 milionow eurow a by poprawom 4,2 milionaj eurow pokuty płaćić dyrbjała.
Sydlišćo Alwine ze šěsć domskimi a 15 podružnikami w braniborskim Domsdorfje ma so 9. decembra w Berlinje přesadźować. Bratraj běštaj 16 000 kwadratnych metrow wulki areal po informaciji awkcionatora po přewróće kupiłoj. Přestrjeń je po smjerći jednoho z njeju za zahajenski poskitk 125 000 eurow na předań.
Kak z wjelkom wobchadźeć?
Podstupim (dpa/SN). Wobswětowi ministrojo krajow a Zwjazka wuradźowachu dźensa w Podstupimje wo tym, kak z wjelkom dale wobchadźeć. Mjez druhim chcyše dźěłowa skupina swoje dopóznaća nastupajo wuwiće wjelčich črjódow kaž tež zastopnjowanje wjelka do směrnicow FFH předpołožić. Do toho běchu sej přirodoškitne zwjazki wěcownu debatu w naležnosći napominali, žadajo sej jednotne prawidła. Politika njesmě plahowarjow pasenskeho skotu dlěje sebi samych sebi přewostajić.
Zhubi status zastojnika
Lipsk (dpa/SN). Prawicarskeho Berlinskeho policista wotstronja z poměra zastojnika. To je zwjazkowe zarjadniske sudnistwo w Lipsku dźensa rozsudźiło. Muž ma runy a noty Horsta Wesseloweho spěwa jako tetowěrowanki, pokazuje hitlerski postrow a ma w swojim bydlenju předmjety nacijow. Mějo wšo to za zranjenje winowatosće swěrnosće zastojnika bě Kraj Berlin discipinarnu skóržbu zapodał. Policist je w prěnimaj instancomaj dobył, nětko postaji Zwjazkowe zarjadniske sudnistwo nowe měritka.
Słyša Puigdemonta
Opozicija zwěsća pola CDU deficity demokratije
Drježdźany (SN). Zeleni a Lěwica wumjetujetej sakskej uniji bytostne deficity nastupajo demokratiju. CDU pěstuje za sebje dale narok samozastupowanja za ludźi, rjeknyštaj zastupjerjej wobeju frakcijow wčera w debaće krajneho sejma wo politiskej kulturje w Sakskej.
Po słowach frakciskeho šefa Zwjazka 90/Zelenych Volkmara Zschocke je CDU w Sakskej pod něhdyšim ministerskim prezidentom Kurtom Biedenkopfom nawjazała na za čas NDR wutworjene wyšnostne myslenje. „Trjebamy ciwilnu towaršnosć, kotraž knježerstwo stražliwje kritizuje, so z nim rozestaja a jemu njepřemyslenje njedowěrja“, Zschocke rjekny.
