Za wobydlersku iniciatiwu FUEN Minority SafePack zběraja mjeztym nimale poł lěta podpisma. Tak prawje pak to po zdaću fungować nochce, hewak njeby „hakle“ 100 000 ludźi po wšej Europje iniciatiwu podpisało. Za „połčas“ je mi to prosće přemało. A zo zamołwići FUEN kaž tež Domowiny wony mjezystaw, na ramjo sej klepajo, pozitiwnje hódnoća, scyła zrozumić njemóžu. Wězo, dowolnosć bě njewočakowano přišła, ale bě wona tež njewočakowana? Domowina drje je na lětušim folklornym festiwalu sylnje wabiła, wunjesło pak to po zdaću wjele njeje. Bychu so dyrbjeli hnydom z laptopom na puć nastajić a ludźi na městnje podpisać dać. Tole Domowina mjeztym čini, a FUEN je mjeztym tež přewidniše podpismowe lisćiny wudała. Nětko dyrbja je jenož hišće rozdźělić a dale pilnje podpisma zběrać. Tak podpěrujće tež wy Minority SafePack a pod­pisajće. Janek Wowčer

Metoda młodeho muža, piwowu blešku wočinić, je so wo porjadny chaos postarała. W Osnabrückskim kinje bě sej 29lětny popjerjowu sprayjowu tyzu za to k pomocy wzał. Při tym dósta so šćipaty płun z kartuše sprayjoweje tyzy, na čož 200 ludźi kinowu žurlu wopušći. Hakle po połhodźinskim přewětrenju žurle móžachu sej wopytowarjo skónčnje film tola hišće wobhladać.

Šimpansa Robby je po 46 žiwjenskich lětach swój hobby našoł a nětko moluje. Tola nic z porstami, kaž bychmy to snano wočakowali, ale kaž prawy wuměłc ze seršćowcom. Skótna lěkarka bě Robbyjej tónle hobby zmóžniła a jemu seršćowcy, barby a stafelaju sobu přinjesła. Šimpansa bydli w cirkusu Belly delnjosakskeho Celle, hdźež pak hižo před publikumom njewustupuje. Swój wólny čas wupjelnja tuž nětko z molowanjom.

Madrid (dpa/SN). Bywši prezident katalanskeho regionalneho knježerstwa Carles Puigdemont chce so po informacijach swojeho prawiznika z Brüssela přesłyšowanju dźensa před sudnistwom w Madridźe wuwinyć. Tak so wón najprjedy raz do Španiskeje njewróći, z čimž pak riskěruje mjezynarodny wukaz zajeća, kotremuž měła tež Belgiska wotpowědować. Njejasne je, hač móže so Puigdemont tež z Belgiskeje wusprawnić. Wšako nima wulku nadźiju, zo w Španiskej fairne sudniske jednanje dóstanje.

Za zapłaćomne bydlenja

Berlin (dpa/SN). Na jednanjach wo móžnej jamaiskej koaliciji widźa jeje zastupjerjo nastupajo sylne rosćace města a zastaranje ludźi z bydlenjemi wulke wužadanje. Zaměr maja předewšěm zapłaćomne bydlenja być. Wosebje swój­bam maja so tajke zmóžnić, rěka w papjerje, na kotruž su so strony CDU, CSU, FDP a Zeleni wčera w Berlinje dojednali. Dźensa chcedźa ze sonděrowanjom pokročować. Na dnjowym porjedźe steji mjez druhim tema wonkowna politika.

Proša Siemens wo rozmołwu

Bahij Chancey (srjedźa) dźerži na napominanskej straži za měr wobraz přećela a wopora Nicholasa Clevesa w rukomaj. Ze stražu na naměsće Foley Square w Manhattanje reagowachu na atentat zawčerawšim wječor, hdźež bě 29lětny Sayfullo Saipov, pochadźacy­ z Uzbekistana, z awtom wotpohladnje ludźi přejěł. Foto: picture alliance/Andres Kudacki