Lipsk (dpa/SN). Zo su před třomi lětami tak mjenowane domizniske awtowe znački w Sakskej zaso zawjedli, wujewja so jako wuspěch. Tak je so na přikład w Mišnjanskim wokrjesu ličba awtowych tafličkow z pismikami RIE na 14 000 podwojiła. Zdobom zwěsćeja rěčnicy krajnoradnych zarjadow, zo wupy­taja sej wobsedźerjo awtow jara kreatiwne znački. Na přikład nastupa tole wo­krjes Torgau z TO. Tam wobkedźbuje rěčnik­ krajnoradneho zarjada Rayk Bergner, zo přeja sej tež wobydlerjo Delitzscha značku z Torgauwa, dokelž maja snano předmjeno Tobias. Tak steji na awtowej tafličce potom skrótšenka TO-BI.

W Budyskim wokrjesu skići so rozdźělny wobraz. Tak je sej wot nowembra 2013 hač do oktobra 2014 cyłkownje 10 108 Kamjenčanow značku KM přało, štož wučinješe 27,6 procentow w Budyskim wo­krjesu. Loni bě to 25,7 proc., mjeztym je podźěl zaso na 26,5 proc. postupił. W Zhorjelskim wokrjesu wobkedźbuja zjaw předewšěm w Lubijskej a Žitawskej kónčinje, hdźež so wobsedźerjo awtow zaso bóle za domiznisku značku rozsudźeja.

Serbska Łužica ma tójšto rjanych kónčin, a kóžda tajka je swojim wobydlerjam kruta domizna. A dokelž chcedźa so woni tež w cuzbje k njej wuznawać, so awtowe znački za to wuběrnje hodźa. Toho­dla bě njezrozumjenje wulke, zo dyrbjachu kaž po cyłym swobodnym staće tež w Budyskim a Zhorjelskim wo­krjesu wšitke po wokrjesnej reformje lěta 2008 při­zwolene jězdźidła jeničce hišće značce z BZ abo GR měć. Tež w druhich regionach Sakskeje njeběchu ludźo z tym přezjedni. Politikarjo su před třomi lětami jednali. Zo je zajim za awtowe znački z BIW, HY, KM, ZI abo LÖB wulke, na łužiskich dróhach dźeń a bóle zwěsćamy. Wězo nječuje so Běłowodźan jako Zhorjelčan, kaž to awtowa značka snano sugerěruje. Podobnje dźe so Kamjenčanam abo Wojerowčanam, kotřiž w Budyskim wokrjesu bydla. Zo sej identitu a hordosć na domiznu wobchowuja, wo tym móžemy so na jich jězdźi­dłach přeswědčić. Axel Arlt

Istanbul (dpa/K/SN). Turkowska swoju ofensiwu „Škit Eufrata“ přećiwo kurdiskim bojownikam w Syriskej dale wjedźe. Tole rjekny prezident Recep Tayyip Erdoğan dźensa składnostnje „dnja dobyća“. USA su sej žadali, wojowanja mjez turkowskim wójskom a wot nich podpěranymi kurdiskimi jednotkami hnydom skónčić a koncentrować so na bój přećiwo teroristiskej milicy Islamski stat.

Brasilia (dpa/K/SN). Prezidentka Brazilskeje Dilma Rousseff drje swoje zastojnstwo zhubi. W senaće, kotryž dźensa wo tym wothłosuje, je z 50 senatorami wot 81 hižo wjetšina za jeje wotsadźenje. Rousseff je naposledk wšitko prěła, štož jej wumjetuja. Mjez druhim ju winuja, zo je so dopušćiła trikow w bilancach budgeta a pomjenowała statnych sekretarow bjez přihłosowanja kongresa.