Z nowej wiziju a změnu
To a tamne (16.09.16)
Fota wo kóčkach njejsu jenož rjany přinošk za wobrazowe galerije w interneće, to znajmjeńša měnja aktiwisća w Londonje. Tak su staciju podzemskeje z wobrazami tychle zwěrjatow plakatowali. Nimale 700 podpěraćelow je we wobłuku crowdfundinga přeličene nimale 27 000 eurow darowało. Z pjenjezami je skupina z mjenom Glimpse wšitke wabjenske płoniny stacije Clapham Common na dwě njedźeli wotnajała.
Na přewšo zdwórliwe wašnje je njeznaty rubježnik w Poruhrskej dźesać discounterowych filialow nadpadnył. Minjenej dwě lěće bě wón maskěrowany dźesać króć rano při zachodźe na šofera łakał, kiž twory dodawaše. Sobudźěłaćerjow je z pistolu wohrozył a jich sputał. Kaž wopory měnjachu, je muž často měrnje, přećelnje a zdwórliwje postupował. Wospjet so je prašeše, hač „njejsu překruće sputane“.
Rozestajenja so přiwótřeja
Rozestajenja mjez ćěkancami a domoródnymi na Budyskich Žitnych wikach so dale přiwótřeja. Kaž policija dźensa zdźěla, je tam wčera znowa 80 k namocy zwólniwych ludźi 20 ćěkancam napřećo stało.
Přiměr podlěšeny
Aleppo (dpa/SN). Najebać přiměr čakaja hišće wjacore statysacy ludźi w Syriskej na pomoc. Kaž tamniša dohladowanska instanca za čłowjeske prawa dźensa zdźěli, njejsu dotal hišće žane pokazki, zo smědźa nakładne awta z Turkowskeje do Syriskeje jěć. Po wšěm zdaću njejsu žadane wěstotne naprawy hišće zrjadowane. Mjeztym su so USA a Ruska na to dojednali, wot póndźele skutkowacy přiměr podlěšić. Tón ma mjez druhim tomu słužić, nuzu tradacych zastarać.
Njerukuja za awtorske prawa
Luxemburg/Berlin (dpa/SN). Předewzaćeljo, kotřiž darmotnje WLAN-syć poskićeja, njerukuja hižo za ranjenje awtorskich prawow wužiwarjow. To je dźensa Europske sudnistwo ze sydłom w Luxemburgu rozsudźiło. Přiwšěm dyrbjeli poskićerjo WLAN swójski přistup z tajnym hesłom škitać. Zajimcy měli přichodnje swoju identitu dopokazać, zo móhli poskićenu syć wužiwać.
Do wosebiteho wjerška EU
Ze sylnymi zliwkami a ze spěšnosću wjace hač 200 kilometrow na ...
Na wuchodźe Ukrainy brónje mjelča
Miliardy za rozkćěw Europskeje unije
To a tamne (15.09.16)
Wbohe to zahrodkowe palčiki! Přehusto so wone politisce, rasistisce a samo seksistisce znjewužiwaja, štož ma so nuznje změnić! Tole měnja přiwisnicy wosebiteje specije, kotřiž chcedźa so kónc tydźenja w durinskim Trusetalu na palčikowym kongresu schadźować. Přećiwo znjewužiwanju mužikow z módrej abo čerwjenej čapku ma so zakročić, woni praja. Tak lěta 2006 załožena Mjezynarodna palčikowa strona z něhdźe 100 sobustawami planuje, nastajić rezoluciju Zwjazkowej antidiskriminaciskej instancy.
Za trochu njeradźeny postrow policistam bu 26lětny wodźer awta w Ludwigshafenje pochłostany. Tak je wón zastojnikow nimojěducy z piwom w ruce strowił a sej samo hišće lunk popřał. Zastojnicy muža hnydom zadźeržachu a zwěsćichu 0,7 promilow alkohola w jeho kreji, za čož ma nětko pokutu płaćić.
Pomocny paket Israelej
Tel Aviv (dpa/SN). USA a Israel su so na rekordny wojerski pomocny paket 38 miliardow dolarow dojednali. Płaćenja wot USA měli so w lěće 2019 započeć a so potom po dźesać lětach zakónčić. Tole zdźěli dźensa israelski rozhłós. Amerika je najwažniši partner Israela. Zastupjerjo wobeju krajow su přez měsacy wo jednotliwych dypkach wuradźowali. Pjenježna pomoc je najwyša jednotliwa podpěra w stawiznach USA.
Serbiska chce płoty twarić
Běłohród (dpa/SN). Kandidat za přistup k Europskej uniji Serbiska chce tysacy nowych ćěkancow wot swojeho teritorija wotdźeržeć a na mjezy k Makedonskej a Bołharskej płoty nastajeć. Kaž minister za dźěło Aleksandar Vulin dźensa w Běłohrodźe informowaše, je nětko načasu drastiske naprawy zahajić. W Serbiskej přebywa něhdźe 5 000 migrantow.
Kóždy pjaty z listom woli
