Klečo dźakuja so tući Brazilčenjo, kotřiž běchu wot wojerskeho ...
Ludźo ćěkaja w Gazaskim pasmje
Milinarnje zaso wotpinu
Demonstracije najebać zakaz
Berlin (dpa/SN). Najebać zakaz demonstracijow na dobro Palestinjanow su so w Berlinje-Neuköllnje sta ludźi zhromadźili. Policija je wčera wječor stajnje zaso zakročiła, zo by wjetšim skupinam ludźi zadźěwała. Nalada bě napjata. Z městnami dóńdźe k rozestajenjam. Policija bě pro-palestinske demonstracije zakazała, dokelž ličeše z antisemitiskimi namołwami, wuchwalowanjom namocy a namócnosćemi. Zarjadniske sudnistwo je zakaz w spěšnym jednanju wobkrućiło.
Dalše demonstracije běchu dźensa připowědźene. Tak planowaše zhromadźenstwo Palestinjanow w Berlinje zarjadowanje z 200 wobdźělnikami pod hesłom „Solidarita z ciwilnej ludnosću“ na Podstupimskim naměsće. Na Breitscheidowym naměsće měješe so demonstracija za wopory islamistiskeho nadpada na Israel wotměć. Přiwuzni zawlečenych zastajencow chcychu njedaloko wonkowneho ministerstwa demonstrować.
Jutře chcedźa muslimojo po wšěm swěće z akcijemi a demonstracijemi Palestinjanow podpěrować.
Scholz: Barbariski njeskutk
Zwjazkowy sejm nadpad islamistiskeje Hamas na Israel zasudźił
Berlin (dpa/SN). Zwjazkowy kancler Olaf Scholz (SPD) je hladajo na terorowy nadpad islamistiskeje Hamas na Israel před wulkej wójnu na Bliskim wuchodźe warnował. Dalša eskalacija rozestajenjow w zwisku z brutalnym nadpadom na israelske sydlišća z wjace hač tysac mortwymi Israelčanami móhł měr w regionje a skónčnje na cyłym swěće wohrozyć, rjekny Scholz dźensa dopołdnja w swojej knježerstwowej deklaraciji w zwjazkowym sejmje. Zdobom přilubi Scholz israelskemu statej wšu móžnu podpěru Němskeje, humanitarnu runje tak kaž wojersku. Wobydlerjow Němskeje wón namołwješe, so wo wěstotu židowskich sobuwobydlerjow w Němskej postarać a jim solidarnje po boku stać.
Přewrót na dobro rěče
To a tamne (12.10.23)
Jenož dny po swojim rekordźe při skočenju z parašutom je 104 lět stara Američanka zemrěła. Dorothy Hoffner z Chicaga je w nocy na njedźelu „spokojnje wusnyła“, nowiny rozprawjeja. Dokładnu přičinu smjerće hišće njeznaja. 1. oktobra, bě w starowni bydlaca žona nowy swětowy rekord najstaršeje skakarki z parašutom nastajiła. W starobje sto lět bě wona „z wulkim wjeselom“ hižo raz skočiła. Tež tón króć bě ju nazhonity skakar jako tandem přewodźał.
Z 3,4 promilemi alkohola w kreji je so šofer nakładneho awta wosrjedź awtodróhi A81 pola Böblingena w Badensko-Württembergskej spać lehnył. Policija z toho wuchadźeše, zo ma stejace awto techniski problem. W kabinje namakachu 48lětneho pjaneho we łožu. Zastojnicy muža wubudźichu a wzachu jeho sobu na stražu, zo bychu jemu krej brali.
Dwójce telko ludźi přišło
Zhorjelc (dpa/SN). Zwjazkowa policija je lětsa w Sakskej dotal dwójce telko njedowolenych zapućowanjow registrowała hač 2022. Prěnich šěsć měsacow je 16 876 ludźi „njeregularnje“ přez mjezu přišło, rěčnik Axel Bernhardt zdźěli. Samsny čas lěta 2022 su 7 499 migrantow zličili. Za september hišće dokładne ličby nimaja. Tuž njemóže zwjazkowa policija aktualne połoženje z wulkim hibanjom ćěkancow w lětomaj 2015 a 2016 přirunować. „Wjetšina na njedowolene wašnje zapućowanych ludźi pochadźa ze Syriskeje, Afghanistana a z Turkowskeje“, Bernhardt rozłoži. Migranća přińdu po čarje zapadneho Balkana, potajkim přez Albansku, Sewjernu Makedonsku a Serbisku kaž tež po wuchodnej Balkanskej čarje po Bołharskej a Rumunskej.
Sakski ministerski prezident Michael Kretschmer (CDU) chcyše so dźensa sam wo połoženju na němsko-pólskej mjezy wobhonić. Wopytać chcyše za to kontrolnišćo w Zhorjelcu a inspekciju zwjazkoweje policije w Ludwigsdorfje na A4. Awtodróha je runje tak kaž z Čěskeje wjeduca A17 ćežišćo ilegalneje migracije, kotrež pašowarjo ludźi často wužiwaja.
Scholz wočakuje wuspěchi
Berlin (dpa/SN. Zwjazkowy kancler Olaf Scholz (SPD) wočakuje dalše wuspěchi hladajo na wot njeho namjetowany „Pakt Němskeje“ na dobro modernizowanja kraja. Zwjazkowe kraje su jara konstruktiwne namjety zapodali. Nětko chcedźa spěšnje rozrisać, kak móhli wuwiće pospěšić, rjekny Scholz nowinarjam. Zhromadne rozrisanje mjez Zwjazkom a krajemi je móžne. 6. nowembra chce so Scholz z ministerskimi prezidentami zetkać.
Němska sćele Ukrainje brónje
Berlin (dpa/SN). Zwjazkowe knježerstwo chce Ukrainje z wobšěrnej posyłku lětadła wotwobaracych systemow, tankow a municiju wojersce pomhać, přichodnu zymu přetrać. Při tym ma hižo minjeny tydźeń přilubjeny powětrowy rum zakitowacy system Patriot nimo rozkazowarskeho centruma a radaroweho nastroja, wosom dalšich startowanskich nastrojow za 60 raketow wopřijeć, zakitowanske ministerstwo zdźěla. Wojerski system płaći něhdźe miliardu eurow.
Přičiny škodow njeznate
