Berlin (dpa/SN). Tysacy domjace a fachowe lěkarske praksy su dźensa zawrjene, Zwjazk lěkarjow praksow a Virchowy zwjazk stej k akciji namołwjałoj. Zamołwići chcedźa z akciju na „bolostne lu­towanske naprawy“ skedźbnić, kotrež politika a chorobne kasy zawinuja. Tohorunja njeje dosć fachowcow k dispoziciji. Dale pokazaja lěkarjo na to, zo je jim ­přiběraca běrokratija wulke wužadanje. Tohorunja ćerpja woni wysokich ener­gijowych kóštow a inflacije dla.

Praksy njemóža pacientow hižo w dosahacej měrje zastarać, zdźěli němski předsyda Virchoweho zwjazka Dirk Heinrich dźensa w rańšim magacinje sćelaka ZDF. Lutowanskich naprawow a skrótšenja wukonow dla je dale a mjenje terminow za pacientow k dispoziciji. Tak njeje hižo žaneje wosebiteje přiražki, jelizo ­lěkarjo spočatk lěta nowych pacientow přiwzaja.

Bjezposrědnje do akciskeho dnja je zwjazkowy strowotniski minister Karl Lauterbach (SPD) žadanje lěkarjow za wjace pjenjez wotpokazał.

Berlin (dpa/SN). CDU chce staršim ludźom w rentnarskej starobje zmóžnić, bjez dawkow hač do mjezy 2 000 eurow dale dźěłać móc. Wotpowědny namjet „aktiwneje renty“ je generalny sekretar Carsten Linnemann minjeny pjatk w Berlinje potwjerdźił. Štóž je starobnu mjezu docpěł a dale dźěła, dyrbjał hač do 2 000 eurow měsačnje bjez dawkow k tomu zasłužić směć. Linnemann rjekny: „Chcemy to prosće dwě lěće wuspytać.“ CDU je zwólniwa, namjet hnydom přesadźić. Tež w přichodnym wólbnym programje CDU chcedźa tónle namjet zakótwić. Z nim chcedźa so předewšěm přiběracemu njedostatkej fachowcow spjećować. W Němskej je „nimale hižo z tradiciju“, zo so ludźo z rentu na „dospołny wotpočink“ podadźa. Mnozy pak bychu rady ­hišće w padźe dawkowych lěpšin dale dźěłali, je sej Linnemann wěsty. Z prawniskeho wida njeje žanych wobmyslenjow. Zwjazkowemu knježerstwu Linnemann wumjetuje, zo so hladajo na pobrachowacych fachowcow přemało wo tych stara, kotřiž bychu rady dale dźěłali. Město toho spušća so Berlin na wukrajnych fachowcow, kotřiž do Němskeje přińdu.

Wien (dpa/SN). Dźělne wuspěchi Ukrainy při jeje přećiwnej ofensiwje přećiwo ruskemu wójsku su po měnjenju fachowca powšitkownje nadhódnoćene. „Jednotliwe zakitowanske linije Rusow Ukrainjenjo z wulkimi stratami přewinu, tola woprawdźity přełam njedocpěja“, rjekny fachowc awstriskeho wójska za Ukrainu Markus Reisner powěsćerni dpa. „Poprawom dyrbjeli wšitke alarmowe zwony klinčeć, zo njeje so po 117 dnjach přećiwneje ofensiwy hišće žadyn operatiwny přełam radźił.“ Ukraina ma po jeho měnjenju přemało wojerskeho materiala, zo móhła so ruskim nadpadam za frontu wobarać. Dyrbjało-li so ruskemu wójsku poradźić, zastaranje z milinu čujomnje mylić, by tež ukrainska brónjenska industrija zlemjena była.

Reisner w tym zwisku na to pokazuje, zo su na přikład němske tanki Leopard 2 nadźiju na wulku skutkownosć w boju jenož zdźěla spjelnili. Wot něhdźe 90 přewostajenych tankow tutoho typa je znajmjeńša třećina jězdźidłow zničenych abo wobškodźenych. Straty na woběmaj bokomaj su hoberske. Ukraina je 80 000 wojakow zhubiła, Ruska 140 000.

Pasanća zazwonichu zawčerawšim policiju w Hannoveru, dokelž běchu wutřěle słyšeli. Prawdźepodobnje běchu je wobdźělnicy kwasneho korsa zawinowali a tuž zastojnicy ćah z awtami zadźeržachu. Cyłkownje wosom awtow policisća dokładnje přepytachu. Tež njewjesta dyrbješe z awta wulězć. Kaž policija zdźěli, pak njejsu ani jeničke brónje namakali.

Šok poćerpi 62lětny muž w Olbernhauje, jako sej zastojnicy minjeny štwórtk žadachu, zo ma so na zemju lehnyć. Po­licisća pytachu mjenujcy za njeznatym strašnym mužom a běchu přeswědčeni, zo su jeho našli. Tola po přepruwowanju 62lětneho so wukopa, zo tomu tak njeje. Dokelž je so muž při akciji zranił, pad nětko kriminalna inspekcija pře­pytuje.