Šwikaja znowa brojenje dawkow
Knježerstwo skruća zhromadnosć
Berlin (dpa/SN). Nimale pjeć měsacow po swojim spřisahanju je so zwjazkowe knježerstwo CDU/CSU a SPD dźensa na swoje prěnje klawsurne posedźenje zešło. Po wobćežnym spočatku dźěła chcedźa nětko wosebje swoju zhromadnosć skrućić. Na dwaj dnjej trajacym zetkanju we wili Borsig nad Tegelskim jězorom na sewjerozapadźe Berlina wuradźuja wosebje wo wottwarje běrokratije a wo nowych impulsach za wožiwjenje hospodarstwa Němskeje. „Předewzaća su w jara chutnym połoženju. Tohodla dyrbimy spěšnje rozsudźić“, rjekny zwjazkowy kancler Friedrich Merz (CDU) do zahajenja zetkanja. Jutře wobzamknu „agendu modernizowanja za stat a zarjadnistwa“. Z njej chcedźa kóšty běrokratije wo 25 procentow znižić a po tutym puću 16 miliardow eurow wuzbytkować. Mjez druhim ličbu přistajenych stata wo wosom procentow zniža.
W hóstnym domje wonkowneho ministerstwa je njedawno francoski prezident Emmanuel Macron přenocował.
Němska wita plan Trumpa
Nowe wuhlady na skónčenje Gazaskeje wójny – čakaja na reakciju Hamas
Washington (dpa/SN). Israel akceptuje plan prezidenta USA Donalda Trumpa za skónčenje Gazaskeje wójny přećiwo islamistiskej palestinskej organizaciji Hamas. „Podpěruju plan skónčenja wójny w Gazaskim pasmje“, rjekny israelski ministerski prezident Benjamin Netanjahu na swojim zetkanju z Trumpom we Washingtonje. Hač tež Hamas planej přihłosuje, njeje dotal znate. Pječa njeje wona měrowy plan dotal hišće dóstała.
Měrowy plan wobsahuje spěšne pušćenje wšěch wot Hamas hišće jatych israelskich zastajencow, kotrež běchu 7. oktobra 2023 zawlekli. Za to chce Israel sta palestinskich jatych pušćić. Runočasnje ma israelska armeja Gazaske pasmo wopušćić a na postajenu liniju cofnyć. Hamas nima w Gazaskim pasmje wjace móc wukonjeć, Israel pak njesmě sej kónčinu přiswojić. Město toho ma w Gazaskim pasmje gremij palestinskich technokratow pod dohladom mjezynarodnych gremijow knježić.
Lěpje hač dalša wójna
Wubědźowanje na swjedźenju piwa
Na wuchodźe tři štwórćiny dwěluja
Berlin (dpa/SN). 35 lět po jednoće Němskeje pokazuje naprašowanje instituta Forsa přiběrace wocuzbnjenje mjez zapadom a wuchodom. Tak je sej jenož hišće 35 procentow naprašowanych wěstych, zo stej wuchodny a zapadny dźěl Němskeje mjeztym w dalokej měrje zaso hromadu zrostłoj a zo je tak nowy lud nastał. Za 61 proc. ludźi přewahuje to, štož dźěli. Na wuchodźe měni to samo 75 procentow.
Naprašowanje bě załožba za předźěłanje diktatury SED do róčnicy znowazjednoćenja Němskeje 3. oktobra 1990 w instituće skazała.
Wuwiće jasnje pokazuje: Wot lěta 2004 hač do 2019 je podźěl tych, kotřiž rjeknychu, zo stej wuchod a zapad hromadźe zrostłoj, spochi wot 28 na 51 procentow přiběrał. Wot toho časa pak začuće zhromadnosće zaso woteběra: 2020 bě jich hišće 47 procentow, 2023 jenož hišće 37 procentow a nětko hišće raz dwaj procentaj mjenje. Na wuchodźe wučinja tutón podźěl 2025 jenož hišće 23 procentow, na zapadźe 37 procentow.
Wosebje w generaciji 60plus wjele ludźi dwěluja. Po wšej Němskej rjekny 25 procentow tuteje starobneje skupiny, zo je so zjednoćenje radźiło. 70 procentow widźi skerje to, štož ludźi dźěli.
To a tamne (30.09.25)
Njewšědny nadpad na kožane cholowy dyrbi policija w Stuttgarće přepytować. 47lětny bě na dompuću z ludoweho swjedźenja w měšćanskim dźělu Cannstatt tak raznje na kožanych cholowach druheho wopytowarja ćahał, zo so torhnychu. Podawk sta so na dwórnišću měšćanskeje železnicy, jako ludźo runje do ćaha zalězechu. Policija je skućićela lepiła. Pola njeho zwěsćichu dwě promile alkohola.
We wukraju produkowane filmy płaća w USA přichodnje sto procentow cła. Tole je prezident Donald Trump wukazał. Wón je přeswědčeny, zo maja filmowcy z USA we wukraju porno druhim filmowcam njelěpšiny. To piše wón na swojej internetnej platformje Truth Social. Dotal njeje jasne, wot hdy cła płaća a hač su tež internetne produkcije potrjechene. Zdobom maja płaćizny filmow hišće postajić.
Tójšto překwapjenjow
Düsseldorf (dpa/SN). Po nimale 80 lětach je SPD w Sewjerorynsko-Westfalskej swoje něhdyše srjedźišćo Dortmund na CDU zhubiła. Mały tróšt za SPD při rozsudnych wólbach w tutym zwjazkowym kraju bě, zo smědźa po dźesać lětach zaso w metropoli Kölnje knježić. Křesćanscy demokraća su we wjacorych městach přećiwo SPD dobyli. Zeleni dobychu w Münsteru, přisadźichu pak zastojnstwo wyšeho měšćanosty w Bonnje a Aachenje a podležachu tež w Kölnje.
Tiktok kaž drogu zakazać?
Berlin (dpa/SN). Unija CDU/CSU po informacijach frakciskeho předsydy Jensa Spahna wo tym diskutuje, za wužiwanje socialnych medijow starobnu mjezu 16 lět postajić. Politikar CDU wotmołwi nowinarjam na prašenje za móžnym zakazom Tiktok: „Wotwažujemy hišće wo tym. Jedna z móžnosćow by starobna mjeza 16 lět była. Zakazujemy tež alkohol a nikotin, zo bychmy wuwiwace so mozy škitali. Hdyž pak je Tiktok hišće sylniša droga, dyrbimy něšto činić!“
Moldawska republika za Europu
Najwjetša demonstracija na dobro Palestinjanow a přećiwo wójnje w ...
Lufthansa 4 000 městnow zalutuje
Mnichow/Frankfurt n.M. (dpa/SN). Koncern Lufthansa chce hač do kónca lěta 2030 w swojim zarjadnistwje 4 000 dźěłowych městnow zalutować. Dźěłowe wotběhi chcedźa digitalizować, awtomatizować a zwjazać, předewzaće w Mnichowje zdźěli. Z tym konkretizuje zawod prěnje njewobkrućene informacije minjeneho tydźenja. Lufthansa chce po tutym puću swój dobytk zwyšić. W tym zwisku wusměrja so přichodnje na lukratiwne wobłuki, kotrež centralnje nawjeduja.
Sakska FDP je po prěnich informacijach nastupajo skrótšenje před tym warnowała, zo změje lutowanje Lufthansy w prěnim rjedźe negatiwne wuskutki na małe lětanišća kaž Drježdźanske. Nětko měła politika spěšnje reagować.
