Njewšědnje ćopły wětr je płujadłoweho płachtakowarja w Chinje 8 000 metrow wysoko pozběhnył. Muž chcyše w prowincy Gansu poprawom jenož trjebany parašut wuspytać. 55lětny muž njemóžeše so wulkemu ćišćej powětra hižo dowobarać a docpě spěšnje wysokosć 8 589 metrow. Přez spěšny lět do njezwučeneje wysokosće zhubi wón nachwilnje samo wědomje, dokelž kislik pobrachowaše. Njewšědny podawk zamó wón dopokazać, dokelž bě kamera wšitko natočiła.

Hołbikaj w lětadle stej w USA chaos a zapozdźenje zawinowałoj. Jako pasažěrojo na lětanišću w Minneapolisu do mašiny zastupichu, wuhladachu ptačka, kiž pod sedłami běhaše. Při jězbje lětadła na start naraz dalši hołb w mašinje zalětowaše. Wjacori pasažěrojo reagowachu panisce. Někotři spytachu hołbikaj popadnyć. Na to so pilot zawróći.

Róža Domašcyna

Při błudźenku

za Marku Maćijowu 

čas njewotběži wot naju

wuběži wob dźeń

wažimoj sej ćečenje

wobkružujemoj kamjenisko

njezamóžemoj je pohibnyć

čas je w nim zawrjeny kaž we wodźe

w kóždej sekli kotruž wuhladamoj

hdyž woda nimo kamjenja ćeče

čas je přitomny w zatorhnjenjach wětra

kiž wokoło naju kruži přitomny

w kóždym napisanym pismiku

a w pismiku kiž runje pisamoj

wobkedźbujemoj

što z lětami rozkćěje

a z lětami překćěje

ničo njeje dospołnje samsne

ničo so njewospjetuje

wšo so započina

Wojerecy (SN/mb). Na posedźenju serbskeje přirady města Wojerec srjedu w rumnosćach Kulturneje fabriki su so čłonojo gremija kritisce z pobrachowacej dwurěčnosću na informaciskich taflach we wobnowjenej Łužiskej kupjeli zaběrali. Předsydka přirady Evelin Graf a městopředsydka Gabriela Linakowa, županka župy „Handrij Zejler“, stej so zašły tydźeń w kupjeli rozhladowałoj. Při tym zwěsćištej, zo samo na fasadźe jenož „Lausitzbad“ steji, nic pak „Łužiska kupjel“. To je přeńdźenje přećiwo zakonjej.

Poskitk ze stron kupjele, deficit nutřka z připlackom kaž „předrasćernja“ spody taflow wotstronić, stej Graf a Linakowa wotpokazałoj. Pokazujo na načasny standard za nowe dwurěčne wuhotowanje we Łužicy wuzběhnyštej: Pak porjadnje a w samsnej wulkosći kaž němske napisy, pak scyła nic. Za fasadu ma město na kóždy pad rozrisanje namakać. Kaž Linakowa wčera našemu wječornikej wobkrući, chce serbska rada ćišć wukonjeć, zo by město pobrachowacu dwurěčnosć nachwatało. Znajmjeńša su jej přilubili, zo chcedźa teksty na internetnej stronje kupjele do serbšćiny přełožić dać.

Lissabon (dpa/SN). Luís Montenegro wostanje šef knježerstwa w Portugalskej. Konserwatiwneho politikarja je portugalski prezident Marcelo Rebelo de Sousa znowa jako ministerskeho prezidenta pomjenował. Před połdra tydźenjom drje bě jeho zwjazk Demokratiska Alianca (AD) wólby do parlamenta z wulkim wotstawkom dobył, absolutnu wjetšinu pak misnył. Tohodla dyrbi Montenegro dale z mjeńšinowym knježerstwom wuńć.

Muskej so dźakowali

Washington (dpa/SN). Knježerstwo USA je so tech-miliardarej Elonej Muskej za jeho prócowanja wo zniženje kóštow dźakowało. Musk bě mjenujcy swoje zastojnstwo jako wosebity poradźowar prezidenta Trumpa złožił. Rěčnica prezidenta, Karoline Leavitt, zwurazni, zo prezident a jeho ministrojo prócowanja nětko sami dale powjedu. Tež gremij za zniženje kóštow Doge ma dale wobstać a knježerstwo podpěrować.

Čakaja na wotmołwu Hamas