Wjetšina ludźi w Němskej za hnydomny kónc Gazaskeje wójny

Hamburg (dpa/SN). Jasne to měnjenje wo wójnje w Gazaskim pasmje: Přemóžaca wjetšina wobydlerjow Němskeje wupraja so za hnydomne zakónčenje wojerskeje pomocy Němskeje za Israel. Tole je wuslědk reprezentatiwneho woprašowanja instituta Forsa w nadawku němskeje wotnožki organizacije za škit dźěći Plan International. Po tym je 80 procentow ludźi měnjenja, zo njesměł Israel swojeho postupowanja w Gazaskim pasmje dla najprjedy raz žane brónje z Němskeje wjace dóstać. 14 procentow woprašowanych měni, zo měła Němska Israelej dale brónje słać. Wjetšina wobydlerjow Němskeje (57 procentow) ma hladajo na humanitarne połoženje w Gazaskim pasmje, hdźež bu wjace hač 60 000 Palestinjanow morjenych, wumjetowanje za woprawnjene, zo skući Israel morjenje ludu. 29 procentow měni, zo je tute wumjetowanje přehnate. 14 procentow nima wo tym žane měnjenje. „Wuslědki woprašowanja su dorazny signal, zo chcedźa ludźo w Němskej kónc namocy“, rjekny Petra Berner, nawodnica předsydstwa Plan international Němska.

Prezident USA Donald Trump je swoje měnjenje zaso raz změnił. Nětko steji wón kruće poboku Ukrainy a kraj pozbudźa, wot Ruskeje wobsadźene kónčiny wróćo zdobyć a ruskemu „tigrej z papjery“ porjadnje na nós dać.

To dobre na tym je, zo bjerje nam Trump strach před wójnu: Tutón tiger bjez zubow chce wšu Europu zdobyć? Štó trjeba hišće brónje a sylne wójsko? Sym wćipny na reakciju našeho zakitowanskeho ministra Borisa Pistoriusa. Z pochmurjenym mjezwočom sej wón wot nas ho­towosć k wójnje žada. A nětko tajke něšto. Brónjenska industrija mi hižo nětko žel ­čini: Kotre brónje trjebaš přećiwo papjerjanemu tigrej bjez zubow?

Tola snano nam žortowanje bórze ­zańdźe: Po tym zo bě sej Ruska lěta 2014 kupu Krim přiswojiła, bě tehdyši prezident USA Barack Obama twjerdźił, zo Ruska tola wjace njeje hač „regionalna móc“. Po tym je so wójna w Ukrainje hakle prawje započała. Marko Wjeńka

Wuprózdnjena kasa planowaneho maturitneho swjedźenja šulerjow gymnazija w Gelsenkirchenje znjeměrnja. Na wšě 10 000 eurow, kotrež běchu šulerjo hižo za zhromadny swjedźeń znosyli, dyrbja nětko narunać. Za zběrku zamołwita šulerka je zdźěliła, zo pjenjezy wjace nima. Nětko policija přećiwo šulerce přepytuje. Maturitny swjedźeń móža drje při wšěm přewjesć, dokelž mjeztym nowe pjenježne dary dochadźeja. Gymnazij prosy, ze šulerku fairnje wobchadźeć.

Z patronu we wačoku je policija 65lět­neho Američana na Kölnskim lětanišću lepiła. Při wosobinskej kontroli bě podhladny předmjet w toši muža napadnył. Přiwołani policisća zwěsćichu, zo jedna so wo municiju pistole. Turist rjekny, zo je sportowy třělc a zo njemóže sej patronu we wačoku rozkłasć. Muž dyrbješe 500 eurow zapłaćić a smědźeše dale lećeć.

Brjazyna (SN/mb). Rada za naležnosće Serbow w Braniborskej so drje prawi­dłownje w rumnosćach braniborskeho krajneho sejma w Podstupimje schadźuje, druhdy pak tež pućuje. Tak su so čłonojo gremija a hosćo wčera na 6. wuradźowanje běžneje wólbneje periody do Brjazyny podali. Tam steješe nimo rozprawow krajneho zamołwiteho za serbske naležnosće a rady wo swojej dźěławosći mjez druhim aktualna situacija Dešnjanskeho domizniskeho muzeja na dnjowym porjedźe. Do toho pak zaběrachu so konkretnje z prašenjom kubłanja. Tohodla bě tež kubłanska referentka Domowiny Katrin Suchec-Dźisławkowa přichwatała.

W Žylowje, měšćanskim dźělu Choćebuza, hdźež je pěstowarnja z najdlěšej tradiciju kubłanja po Witaj-modelu, maja w zakładnej šuli „Lutki“ hižo wjele lět wulke problemy z rumnosćemi. Wo tym nawodnica šule Madline Gjarźic rozprawješe. Twar šule a přidatny kontejner njewotpowědujetej narokam šule za přewjedźenje skupinskeje wučby abo podobneho. Do profila šule, kotraž dobry styki z Witaj-pěstowarnju pěstuje, słuša bilingualna wučba w serbšćinje.