Berlin (dpa/SN). Zwjazkowe knježerstwo je raznje na wotprawjenje dalšeju demonstrantow w Iranje reagowało. Zwjazkowy kancler Olaf Scholz (SPD) namołwi režim w Teheranje wčera přez Twitter, žane smjertne wusudy wjace njewuwjesć. Wonkowna ministerka Annalena Baerbock (Zeleni) přeprosy sej znowa iranskeho pósłanca a připowědźi dalše sankcije EU. Wulkopósłancej měło so jasnje ­wujasnić, „zo brutalna represija, po­tłóčowanje a terorizowanje swójskeje ludnosće kaž tež najmłódšej wotprawjeni bjez sćěha njewostanu“, rjekny Baerbock w Berlinje. Zdobom wotpokaza kritiku, Němska a EU so dosć njezasadźa, dokelž njezastopnjujetej rewoluciske gardy jako teroristisku organizaciju. W Iranje běchu sobotu dalšeju demonstrantow wotprawili. Justica jimaj zamołwitosć za smjerć wěstotneho zastojnika wumjetowaše. Dźensa wozjewištej iranskej onlinenowinje „Hammihan“ und „Emtedad“, zo bu znata iranska politikarka Faeseh Haschemi dla pječa systemokritiskich wuprajenjow k pjeć lětam jastwa zasudźena.

Habeck so znowa za kónc brunicowje energije w lěće 2030 wuprajił

Berlin/Drježdźany (SN/MiP). Na kóncu swojeho dwudnjowskeho słužbneho wopyta Norwegskeje je zwjazkowy hospodarski minister Robert Habeck (Zeleni) minjeny pjatk w socialnych syćach bilancu swojich tamnišich nazhonjenjow wozjewił. W něhdźe šěsćmjeńšinskim wideju rěči Habeck wo dwójnym energijowym wužadanju, z kotrymž je němske knježerstwo konfrontowane. Nimo zawěsćenja zastaranja wuzběhnje wón konsekwentne pokročowanje z energijowym přewrótom do směra klima-neutralneje produkcije miliny. Wón praji w tutym zwisku najnowšu studiju citujo: „Energijowe zastaranje je tež najebać dočasne zakónčenje wudobywanja a zmilinjenja brunicy móžne. Tež ze stupacej e-mobilitu abo wulkim mnóstwom ćopłotnych klumpow bu­dźemy kmani, našu energijowu potrjebu zawěsćić.“ Hladajo na přetwar energijo­weje syće na zastaranje z wobnowjomnej energiju so hospodarski minister wospjet jasnje za dočasny termin kónca bruni­coweje energije w lěće 2030 wupraji.

Dokelž je na nuzniku w lětadle kurił, bu pasažěr při njeplanowanym mjezypřizemjenju w Hannoveru z lětadła wjedźeny. 33lětny je po starće w Hamburgu namołwu přistajeneje ignorował a swoju cigaretu dokurił, zdźěli wčera zwjazkowa policija. Potajkim bu jemu k zahubje, zo bě lětanska towaršnosć rozsudźiła, w Hannoveru přizemić. Tam je mjenujcy lěta­dło techniskich problemow dla wupadnyło. Poprawom měli w Hannoverje pasažěrojo šmórnjeneho lěta přistupić, zo móhli dale do Turkowskeje lećeć. Tola pilot z Hamburga wuzamkny tež kurjaka.

Njewšědne městno je sej njeznaty w Hannoveru wupytał. Elektriski roler wisaše wčera něhdźe dźesać metrow ­wysoko na wuhenju kupnicy. Za wupožčowarja, Berlinske předewzaće Tier, je to pad wandalizma.

Mnichow (B/SN). Kardinal Reinhard Marx je často njeboćičkeho bamža Benedikta XVI. w Romje wopytał, posledni raz w septembrje 2022. „Duchownje bě bamž hač do poslednjeho wokomika jara hibićiwy. Móžach z nim mjez štyrjomi wočemi wo wšěm rěčeć. Wón je mje k swojemu naslědnikej jako arcybiskop w Mnichowje a Freisingu sčinił“, kardinal Reinhard Marx wuswětla.

Zrěčenje njepodlěšili

Kijew (B/SN) Kijewski prózdnjeńcowy klóšter Pečerska Lawra słuša do swětoweho kulturneho herbstwa UNESCO a je srjedźišćo ukrainsko-orto­doksneje cyrkwje. Klóšter pak njesmě tamnišu katedralu a cyrkej z refektoriumom wot 31. decembra 2022 za Bože słužby wjace wužiwać. Ukrainske knježerstwo nje­je wotnajenske zrěčenje podlěšiło.

Taizéske zetkanje 2023/2024

Ljubljana (B/SN). Při­chodne zetkanje europskeje młodźiny wotměje so wot 28. decembra 2023 hač do 1. janu­ara 2024 w słowjenskej Ljubljanje. W srjedźišću minjeneho zetkanja w Rostocku stejachu spěwanje, modlitwy, meditacije, work­shopy a Bože mšě. Taizéske bratstwo přewjeduje tajke zetkanja wot lěta 1978.

Pruwuja wuměłske naćiski