Berlin (dpa/SN). Znowa móhli politikarjo a dalši prominentni swěta po wozjewjenju brizantnych dokumentow wo swojich financnych počinanjach do wuskosćow přińć. Na wšě 35 amtěrowacych a bywšich statnikow kaž tež wjace hač 330 dalšich politikarjow z nimale sto krajow a dalše znate wosobiny su po informacijach mjezynarodneho zwjazka wotkrywacych žurnalistow swoje zamóženje „z pomocu njepřewidnych konstrukcijow, załožbow a njeeksistowacych firmow inwestowali“. To rozprawjeja wjacore nowiny a sćelaki Němskeje. Wjace hač 11,9 milionow dokumentow mjenuja wone „Pandora papers“. Před pjeć lětami běchu žurnalisća z wozjewjenjom „Panama papers“ kedźbnosć zbudźili, jako dopokazachu, zo politikarjo pjenjezy w karibiskich krajach składuja.

W dokumentach „Pandora papers“ naspomnjeny je tež čěski ministerski prezident Andrej Babiš. Tón bě sej pječa w Francoskej wosobny statok we wjesnym rumje za 15 milionow eurow kupił a je jón na njetransparentne wašnje zapłaćił.

Centralne zarjadowanje na Dnju jednoty Němskeje w Halle nad Solawu

Halle (dpa/SN). Składnostnje Dnja jednoty Němskeje je sej zwjazkowa kanclerka Angela Merkel (CDU) trajace zasadźenje na dobro demokratije žadała. „Demokratija njeje cyle jednorje tu, ale dyrbimy zas a zaso za nju dźěłać“, rjekny politikarka CDU wčera na swjedźenskim zarjadowanju w Halle nad Solawu. Prezident Zwjazkoweje rady Reiner Haseloff (CDU) zasadźowaše so za zhromadnje projekty, kotrež móhli wuchod a zapad Němskej hromadu wjesć. „Mentalnje a strukturelnje njeje jednota hišće dokónčena.“

Po měrniwej rewoluciji w NDR nazymu 1989 bě so wuchodoněmski stat 3. oktobra 1990 ze Zwjazkowej republiku Němskej zjednoćił. Najebać inwesticije wjacorych miliardow eurow a wulke wuspěchi w zhromadnym žiwjenju su dochody a renty we woběmaj dźělomaj Němskeje přeco hišće rozdźělne. Tak zasłužeja dźěławi we wuchodnych zwjazkowych krajach nimale štwórćinu mjenje hač kolegojo na zapadźe. Renty maja hakle w lěće 2024 jenake być.

Zo njeje jednota mentalnje a strukturelnje hišće dokónčena, wo tym njeswědča jenož rozdźělne wuslědki na wuchodźe a zapadźe při wólbach zwjazkoweho sejma. Wone pak cyle čerstwje potwjerdźeja, zo je wuwostajena kedźbnosć na čućiwosće a na žiwjenske nazhonjenja ludźi we wuchodnych zwjazkowych krajach mjeztym mocy nabyła, kotruž njesmědźa knježacy w Zwjazku dlěje na lochke ramjo brać. Za mnohich ludźi hrózbne wuwiće po přewróće z bjezdźěłnosću, wothódnoćenjom jich dotalneho žiwjenja a – často z tym zwjazanym – socialnym zestupom słuša bjezdwěla sobu ke genam zjednoćeneje Němskeje. Mentalne a strukturelne brachi tejele jednoty sporjedźeć pak lóšo njebudźe. Wšako je so połoženje z kóždym za to zhubjenym lětom dale přiwótřiło. Njejsmy wjace žiwi w porynskej republice, na wuchod rozšěrjenej. Snano su sej to někotři strategojo jednoty Němskeje tehdy tak přeli. Jednota Němskeje tež rěka, ludźi a regiony we wuwiću sobu wzać. Axel Arlt

6 000 kwadratnych metrow wulku chorhoj Němskeje su parašutisća w sewjerorynsko-westfalskim Paderbornje w powětře rozpřestrěli a tak po informacijach zamołwitych swětowy rekordny pospyt wuspěšnje wobstali. Chorhoj bě w cyłej wulkosći widźeć, z čimž je so eksperiment radźił, a nětko móža jón do Guinnessoweje knihi rekordow zapisać. Parašutisća běchu z 3 500 metrow wotskočili a na lětanišću přizemili. Wětřik pak je chorhoj do bliskeho lěsa wotnjesł.

Na wulět po awtodróze A 9 pola durinskeho Eisenberga poda so wčera rano jack-russell-terrier. Psyca Bella bě při rańšej wuchodźowance swojemu wobsedźerjej twochnyła a wjacorych šoferow nastróžiła. Jedyn z nich na to na nuzowej čarje zasta, wza psa a přepoda jeho přiwołanym policistam. Woni móžachu ­Bellu njezranjenu wobsedźerjej wróćić.