Berlin (dpa/SN). W boju přećiwo hrožacej štwórtej žołmje koronapandemije je so předsyda swětoweho zwjazka lěkarjow Frank Ulrich Montgomery za to wuprajił prawidła koronawirusa dla přiwótřić. Zasadźeć mobilne šćěpjenske mustwa drje lědma dosaha, kwotu šćěpjenja zwyšić. „Zo bychmy štwórtu žołmu zadźerželi, prjedy hač je dramatiska, dyrbjeli po cyłej Němskej hdźežkuli móžno prawidło 2G wukazać.“ To by rěkało, zo maja jenož ­hišće šćěpjeni abo wustrowjeni na zarjadowanja atd. přistup. Hdźež njeje to zwoprawdźomne, kaž w zjawnym bliskowobchadźe, dyrbjeli nješćěpjeni aktualny PCR-test předpołožić. Jednory spěšnotest potom hižo njedosaha, Montgomery rjekny. Tele rjadowanje móhło wjace ludźi pohnuć so šćěpić dać. Hladajo na nazymu a zymu płaći we wěstych nutřkownych rumnosćach hižo nětko prawidło 3G: přistup jeno za šćěpjenych, wustrowjenych abo negatiwnje testowanych. Z wida Roberta Kochoweho instituta hrozy při tuchwilnej kwoće šćěpjenja razna štwórta žołma koronawirusa.

Zhorjelc (UM/SN). Młodostny inten­siwny skućićel – mjenujemy jeho „J.“ – je w swojej kriminelnej zašłosći hižo wo­spjet z najwšelakorišimi zarjadnistwami činić měł: z policiju, ze statnym rěčnistwom abo z młodźinskim prawniskim wotrjadom krajnoradneho zarjada. Přećiwo njemu su wospjet tež dosć bolostne chłostanja wukazali, ale wšo to njeje pomhało jeho na prawy puć wróćo dowjesć. Nětko pak je wšitko hinak: Po najnowšim njeskutku bě „J.“ nětko na Zhorjelsku Gobbinowu skazany, hdźež je wot minjeneho tydźenja w bjezposrědnim susodstwje poli­cajskeho rewěra „Dom młodźinskeho prawa“ zaměstnjeny. Tam maja młodźi skućićeljo nětko wšitkich trěbnych partnerow pod jednej třěchu a dóstawaja tam pomocne poskitki. ­Nimo toho jich tam hnydom z konsek­wencami jich skutkowanja konfrontuja. „Snano wukonja to wšo tajki zaćišć na nich, zo so přichodnje chłostajomnych njeskutkow wzdadźa“, měni Hermann Jöst, nawjedowacy statny rěčnik Zhorjelskeho statneho rěčnistwa.

Kreatiwnu formu lěnjopasenja je sej financny zastojnik w Šwedskej wumyslił. Přistajeny dawkoweho zarjada je hodźiny dołho sam na so zwonił. Kaž nowiny rozprawjeja, běše telefon muža cyłkownje 55 hodźin blokowany. Za to bě wón ze słužbnym aparatom swój mobilny telefon za­zwonił a bě tak „wobsadźeny“. Wonkowne telefonaty posrědkowachu tamnym sobudźěłaćerjam. Šefej skónčnje wěčne ­te­lefonaty napadnychu. Zastojnik smě nětko z pušćenjom ličić.

Klasiski to pad w krótkej přestawce na awtodróhowym wotpočnišću. Nan je na A2 pola Hannovera swoju 16lětnu dźowku zabył. Swójba bě krótko pozastała, zo móhł wón wustupić hić, mać w awće spaše. Štož muž njewědźeše: Tež dźowka bě na nuznik šła. Tak wón dale jědźeše. Holca prošeše druhich wo pomoc, kotřiž nana a mać telefonisce informowachu.

Wólbne zarjadowanje direktnych kandidatow z regiona za wólby Němskeho zwjazkoweho sejma njeje ludźom w publikumje při rozsudźe za wólbny rozsud pomoc dać móhła.

Čorny Chołmc (JK/SN). Direktni kandidaća a zastupjerjo wjacorych stron wěnowachu so na wčerawšim wólbnym forumje w Čornochołmčanskim Krabatowym młynje naležnosćam serbskeje Łužicy, kubłanskim problemam, wužadanjam strukturneje změny a dalšemu wobstaću serbskeho ludu. Na zarjadowanje přeprosyli běchu Hajko Kozel (Lěwica), Benedikt Dyrlich (SPD) a Robert Krawc (Zeleni). Na jewišću žurle běchu zastupjerjo sakskeje SPD, FDP, Lěwicy, Zelenych a Swobodnych wolerjow městno zabrali. Cosima Stracke-Nawka z Budyšina je zarjadowanje přeswědčiwje a jara derje přihotowana moderěrowała.