Smědźa so ludźi prašeć
Berlin (dpa/SN). Dźěłodawarjo smědźa so sobudźěłaćerjow w pěstowarnjach, šulach a hladarnjach přichodnje prašeć, hač su přećiwo koronawirusej šćěpjeni. To je wuslědk hodźiny trajaceho wuradźowanja CDU/CSU a SPD, kaž dpa wozjewja. Móžnosć ma pak jeno za čas epidemiskeho połoženja narodneho rozměra wobstać, kotrež bě zwjazkowy sejm minjeny tydźeń wo tři měsacy podlěšił.
Přemało šćěpjenjow
Berlin (dpa/SN). W Němskej rozšěrja so powšitkowna mučnota šćěpjenja pře koronu. Podźěl dospołnje šćěpjenych wobydlerjow kraja je z 61 procentami přirunujo z 59 procentami minjeny tydźeń jeno snadnje rozrostł, rěka w tydźenskej rozprawje Roberta Kochoweho instituta. Wot kónca julija hač do kónca awgusta je kwota wo runje dźesać procentow rozrostła. To je přemało, wotwobarać štwórtu žołmu infekcijow „z połnymi intensiwnymi stacijemi“.
Lětarska słužba UNO zaso dźěła
Słowakska prezidentka Zuzana Čaputová je wčera zwjazkoweho ...
Laschet mustwo přichoda předstajił
Maas poskića talibanam pjenjezy
Debatuja znowa wo lěwicarskim knježerstwje
Berlin (dpa/SN). Dobre tři tydźenje do wólbow zwjazkoweho sejma zbudźa najnowše naprašowanja diskusiju wo móžnym knježerstwowym lěwicarskim zwjazku. SPD a Zeleni so drje dale wot pozicijow Lěwicy distancuja, koaliciju z njej pak zasadnje njewuzamkuja. Tak rěčeše frakciska předsydka Katrin Göring-Eckardt wo samsnych pozicijach w socialnej politice, zakładnym zawěsćenju dźěći a pola minimalneje mzdy. Diferency z Lěwicu widźi wona we wonkownej a industrijnej politice. „Lěwica dyrbi nětko rozsudźić, hač chce knježerstwowu zamołwitosć přewzać a kak spušćomna we wonkownej a wěstotnej politice je“, Göring Eckardt potwjerdźi. Wot noweje předsydki Lěwicy by wona „wočakowała, zo na tym dźěła. To pak njeje so dotal stało.“
Wjace wučomnikow
To a tamne (03.09.21)
Hodźiny dołho do wopačneho směra jěł je 92lětny muž z hessenskeho Bad Hersfelda a je skónčnje do Rostocka nad Baltiskim morjom dojěł. Poprawom chcyše wón do 130 kilometrow zdaleneho Nidderauwa. Syn muža bě policiju informował, dokelž njebě rentnar na šulski zachod wnučki přijěł. Policija pytaše z dowolnosću sudnika za mobilnym telefonom muža a zwěsći, zo je 92lětny w 550 kilometrow zdalenym Rostocku. Prawdźepodobnje bě wón wopačnu adresu do nawija zapodał.
Manipulacije wólbnych plakatow dla ma Greifswaldska zapósłanča Zelenych Katharina Horn wulke mjerzanje z policiju. Zastojnicy běchu ju lepili, jako přelěpješe wólbne plakaty zapósłanca CDU Michaela Sacka z nalěpkami „koruptny“. 23lětna Horn je so pola Sacka mjeztym telefonisce zamołwiła.
Róčnicu nadpada wopominali
Drježdźany/Podstupim (dpa/SN). W Sakskej a Braniborskej su wčera 82. róčnicu nadpada hitlerskeje Němskeje na Pólsku wopominali. Zastupujo ministerskeho ministra Michaela Kretschmera staj statna ministerka Barbara Klepsch (wobaj CDU) a jednaćel sakskeje załožby za wopomnišća dr. Markus Pieper na katolskim kěrchowje w Drježdźanach wěnc połožiłoj. W ćichej swjatočnosći wopominaštaj wonaj 1942 wot nacionalsocialistow wotprawjenych čłonow pólskeje spjećowanskeje skupiny Čorna legija. Přitomny bě tež wulkopósłanc Pólskeje w Němskej dr. Andrzej Przyłębski.
W Podstupimje je braniborski ministerski prezident Dietmar Woidke (SPD) namołwjał, spočatk Druheje swětoweje wójny před 82 lětami jako „wěčny zawjazk wobhladować so za měr, swobodu a demokratiju zasadźeć“. W nowinskej zdźělence wón praji: „Štož je so 1. septembra 1939 ze złóstniskim nadpadom hitlerskeje Němskeje na Pólsku započało, wjedźeše k milionam mortwych, k holocaustej a k njewólnistwu cyłych ludow. Demokratija, swoboda a měr tuž wusko hromadźe słušeja.“
Poskitk železnicy wotpokazał
Berlin (dpa/SN). Předsyda Dźěłarnistwa němskich lokomotiwnikow (GDL) Klaus Weselsky je poskitk železnicy w tarifowej zwadźe wotpokazał. „Mam špatnu powěsć za pućowacych: Stawk dale traje“, rjekny wón dźensa w rańšim magacinje ARD. Poskitk železnicy njeje „wobsahowje akceptabelny“. Železnica bě koronapremiju 600 eurow a skrótšenje doby tarifoweho zrěčenja wot 40 na 36 měsacow poskićiła. GDL stawkuje wot dźensnišeho tež we wosobowym wobchadźe.
Bouffier: Wšitcy za Laschetom
Wiesbaden (dpa/SN). Hessenski ministerki prezident Volker Bouffier namołwja, w boju k wólbam zwjazkoweho sejma přezjednosć pokazać. „Wažne je, zo zhromadnosć jasnje pokazamy, zo njemóže nichtó na tym dwělować, zo kruće za Arminom Laschetom stejimy“, rjekny městopředsyda CDU Frankfurtskim nowinarjam. Tež bayerski ministerski prezident Markus Söder (CSU) swoju zwjazanosć z Laschetom stajnje zaso potwjerdźa.
Wulke zliwki a zapławjenja
