Washington (dpa/SN). USA chcedźa 3 000 přidatnych wojakow nachwilnje do Afghanistana přepołožić, kiž maja wěstotu Kabulskeho lětanišća zaručić. Hłownje dźe wo to, ewakuaciju wulkopósłanstwa USA podpěrać, rěčnik zakitowanskeho ministerstwa John Kirby we Washingtonje zdźěli. To móhło tež kolony jězdźi­dłow na a wot lětanišća wopřijeć. Ewakuować chcedźa tež něhdyšich afghaniskich sobudźěłaćerjow wójska USA, kotřiž so nětko wjećby talibanow boja. Nachwilne přepołoženje ameriskich wojakow je sćěh přiwótřeneho wěstotneho połoženja w Afghanistanje, Kirby rjekny. Liča z tym, zo talibanojo hižo jara bórze do stolicy Kabula zaćahnu. Wěstotne mocy, kiž běchu USA wukubłali a wobrónili, so zwjetša wróćo sćahnu a talibanam swoje brónje a jězdźidła přewostajeja. Na wobrazach su widźeć talibanojo z ameriskimi třělbami w ruce a patrulje talibanow z ameriskimi jeepami.

Talibanojo su wčera strategisce wažne město Lashkargah na juhu kraja zdobyli. Woni bliža so tak swojemu zaměrej, kraj wojersce dospołnje wobknježić.

Lipsk (dpa/SN). Po tym zo su stawk pola Němskeje železnicy skónčili, so želez­niski wobchad tež w Sakskej, Saksko­Anhaltskej a Durinskej zaso normalizuje. Kaž rěčnik železnicy zdźěli, ćahi zaso po planje jězdźa. Ludźo su přiwšěm namołwjeni so do wotjězda wo aktualnym połoženju ćahow wobhonić.

Dźensa wočakowachu wosebje wulke wućeženje předewšěm na dalokich čarach. Železnica bě pasažěrow prosyła sej jězdźenku rezerwować dać, abo, je-li móžno, jězbu na přichodne dny přestorčić.

Stawk Dźěłarnistwa lokomotiwnikow Němskeje su dźensa rano w dwěmaj po planje skónčili. Čłonojo dźěłarnistwa běchu stawk w nocy na srjedu zahajili, zo bychu ćišć na dobro wyšich mzdow a lěpšich dźěłowych wuměnjenjow zesylnili. Dwaj dnjej bě jenož kóždy štwórty ćah jěł. We wuchodoněmskich krajach běchu wuskutki stawka wosebje razne.

Z helikopterom k lodarni lećał je 34lětny w Kanadźe, zo by tam lodowu tortu kupił. Wón přizemi na wjele wužiwanym parkowanišću před wobchodom w městačku Tisdale w centralnej Kanadźe. Z helikoptera wulěze žona, kotraž poda so do lodarnje a tam tortu kupi. Dokelž njejednaše so wo nuzowe přizemjenje, dyrbi so 34lětny nětko před sudnistwom zamołwić, byrnjež licencu za mašinu měł.

Zabyteho handyja dla móžachu w Frank­furće nad Mohanom paducha awta zajeć. 26lětny sedźeše hižo we wozu, kotryž chcyše pokradnyć, jako jeho wobsedźer lepi a narěča. Na to paduch twochny. Jako wobsedźer z policiju telefonowaše, so paduch nawróći, dokelž bě swój mobilny telefon w awće ležo wostajił. Muž pak skućićela kruće dźeržeše, doniž policija njepřijědźe. Při sebi měješe wón spakosćenu žonjacu tobołku.