To a tamne (31.08.21)
Z popjerjowym sprayjom do sobuwobydlerki dała je so rentnarka w starowni w bayerskim Oberstdorfje. Do toho bě so staruška ze 86lětnej zwadźiła. Na to hrabny młódša z njeju za tyzu ze sprayjom. Při atace su so nimo 86lětneje hišće třo dalši wobydlerjo domu zranili, lěkarske zastaranje pak na zbožo trěbne njebě. Přećiwo 79lětnej policija nětko zranjenja ćěła dla přepytuje.
Pjany do policajskeho wozydła zrazył je muž ze swojim awtom w braniborskim Seelowje. Policisća běchu njedźelu rano w zahrodkownišću zasadźeni a běchu swój wóz před zachodom wotstajili. 28lětny do njeho zrazy, jako chcyše kompleks wopušćić, a jón wobškodźi. Policisća naměrichu pola muža 1,97 promilow alkohola. Jězbnu dowolnosć wón žanu njeměješe. Tak sej zastojnicy tež klučiki awta hnydom zdźeržachu.
Scholz pječa najlěpje wobstał
Prěnje wulke telewizijne rozestajenje kandidatow unije, SPD a Zelenych
Berlin (dpa/SN). Při prěnim wulkim dowólbnym telewizijnym rozestajenju su třo kanclerscy kandidaća CDU/CSU, SPD a Zelenych mjezsobne rozdźěle potwjerdźeli. Při tak mjenowanym trielu sćelakow RTL a ntv pokazaštaj so kandidataj unije Armin Laschet a kandidatka Zelenych Annalena Baerbock bojowniskaj. Kandidat SPD Olaf Scholz je na wumjetowanja porno tomu měrnje reagował. Spěšne naprašowanje instituta Forsa bjezposrědnje po skónčenju wusyłanja pokaza, zo bě wón z tym wuspěšny. Na wšě 36 procentow wšěch 2 500 woprašanych bě měnjenja, zo je Scholz triel dobył. 30 procentow měješe Baerbock za dobyćerku a jenož 25 procentow Lascheta. Tež na prašenje, štó je najbóle sympatisce skutkował, wotmołwi 38 procentow na dobro Scholza, slědowaštaj Baerbock (37 procentow) a Laschet (25 procentow).
Bamž radźi so šćěpić dać
Vatikan (B/SN). We wosebitej widejowej powěsći je bamž namołwjał so šćěpić dać, dokelž je to „akt lubosće za sebje, za swójbnych a přećelow kaž tež za wšě ludy“. Pontifeks měni, zo je to jednore wašnje, so na dobro wšěch zasadźić, wosebje najčućiwišim napřećo. Widejowa powěsć je dźěl swět wopřijaceje šćěpjenskeje kampanje powšitkownowužitneje ameriskeje organizacije Ad Council „It’s up to you“ (Zaleži na tebi).
Wjace kanonikow biskopa woli
Drježdźany (B/SN). Drježdźansko-Mišnjanski biskop Heinrich Timmerevers je spočatk awgusta nowe statuty tachantskeho kapitla swjateho Pětra Drježdźany wobkrućił. Hłowna nowosć je, zo propstaj z Lipska a Kamjenicy kaž tež farar z města Gera jako čestni tachantscy kapitularojo přez swoje zastojnstwo nimo regularnych kapitularow biskopa wola. Po statuće staj tachantskaj fararjej w Drježdźanach a Budyšinje na kóždy pad wobdźělenaj, nimo toho ma znajmjeńša jedyn Serb jako kanonik krute městno w tachantskim kapitlu. Nowy tachantski kapitl chcedźa 14. nowembra 2021 we wobłuku nyšpora w Budyskej tachantskej cyrkwi spřisahać a zapokazać.
Wobstawaja na wobdźělenju
Rakety na lětanišćo třěleli
Kabul (dpa/SN). W afghaniskej stolicy Kabulu su njeznaći dźensa rano wjacore rakety do směra na lětanišćo třělili. Telewizijny sćelak CNN rozprawja wo pjeć raketach. Wo woporach abo škodach spočatnje žane informacije njepředležachu. Wotwobaranski system lětanišća je rakety, kotrež buchu ze sewjerneje kromy Kabula startowane, pječa wotpopadnył.
Aktiwistow na mjezy zajeli
Waršawa (dpa/SN). Skupina aktiwistow je w Pólskej spytała nowu, z kałateho grotu wobstejacu zawěru na mjezy Běłoruskeje přerězać. Dwanaće Polakow a Nižozemjana policija zaja. Jim wumjetuja, zo su „techniske zawěry na mjezy zničili“. Nutřkowny minister Mariusz Kamiński je akciju jako dospołnje njeakceptabelnu“ zasudźił a wotpowědne prawniske konsekwency připowědźił. Pólska zawěru twari, wumjetujo Běłoruskej, zo zaměrnje ćěkancow přez mjezu do Pólskeje a tak do Europskeje unije sćele.
Jenož hišće tempo 30
60 procentow ludźi šćěpjenych
Přijědu na wuchod
Ischinger: Z talibanami rěčeć
Taškent/Berlin (dpa/SN). Němski zwjazkowy minister za wonkowne naležnosće Heiko Maas (SPD) wupraja so za rozmołwy z Chinu a Ruskej wo krizy w Afghanistanje. Su prócowanja „wšitkich mjezynarodnje wažnych wobdźělnikow za blidom zhromadźić, při čimž je wažne, zo so tež Ruska a China wobdźělitej“, rjekny Maas dźensa na wopyće w uzbekskej stolicy Taškenće. Wón skedźbni mjez druhim na dźensa planowane wurjadne posedźenje Bjezstrašnostneje rady UNO runje k mjenowanej naležnosći w New Yorku.
Předsyda Mnichowskeje wěstotneje konferency Wolfgang Ischinger radźi, z militantno-islamskimi talibanami w Afghanistanje direktnje rěčeć. „We wonkownej politice dyrbiš w prěnim rjedźe z tymi rěčeć, kotřiž njesłušeja k přećelam“, rjekny Ischinger dźensa rano w rańšim magacinje sćelaka ARD. „Z přećelemi dźeš k wječeri. Z přećiwnikami, tež z komplikowanymi, tež ze złóstnikami, dyrbiš rěčeć.“ Ischinger so nadźija, zo rozmołwy UNO, hinak hač w padźe Syriskeje, tónraz něšto wunjesu.
Šule wjace njezawrěć
Kopenhagen/Genf (dpa/SN). Zawrjenje šulow za čas koronapandemije měješe po měnjenju Swětoweje strowotniskeje organizacije (WHO) za wuknjacych katastrofalne wuskutki. To njesměło so po lětnich prózdninach wospjetować, žadatej sej WHO a dźěćacy pomocny skutk UNICEF. Zhromadnje namołwjatej wonej knježerstwa Europy so wo to starać, zo wostanu šule najebać koronu wotewrjene. Tak měli so wučerjo a dźěći, starše hač dwanaće lět šćěpić dać. W rjadownjach měło dobre přewětrjenje zaručene być, rjadownje měli po móžnosći małe dźeržeć a šulerjow dyrbjeli prawidłownje testować.
Do europskeho regiona WHO słuša 53 krajow. Šula je přewšo wažna za duchownu strowotu a socialnu kompetencu dźěći, rěka w zhromadnej deklaraciji mjenowaneju organizacijow. „Pandemija je najkatastrofalniše přetorhnjenje šulskeho kubłanja w stawiznach zawinowała“, praji direktor europskeje wotnožki WHO Hans Kluge. Šule su wažny element, zo bychu so dźěći ze spokojnymi a produktiwnymi čłonami našeje towaršnosće stali, Kluge wuzběhnje. „Zawrjene šule runje tomu zadźěwaja.“
To a tamne (30.08.21)
Na wšě 380 kilometrow domoj nóžkował je pos w Francoskej. Do toho bě wón při dowolowej jězbje na přestawce při awtodróze twochnył. Po hodźinach čakanja dyrbještaj wobsedźerjej bjez njeho dale jěć. Něšto dnjow pozdźišo dóstaštaj wonaj foto psa wot susodow, kotřiž doma na jeju dom kedźbowachu. Na nim bě „Pablo“ widźeć, słaby, ale strowy. Swój dowol mandźelskaj hnydom skónčištaj, zo byštaj so nawróćiłoj.
Napřemoběh šlinkow su sobotu w Oldenburgu zarjadowali. Dobyćer wubědźowanja bě šlink z mjenom „Speedy Gonzales“. Wón trjebaše za 33 centimetrow dołhu čaru tři minuty a 28 sekundow. Zwěrjo dósta hłójčku solotje jako myto, jeho trenar Rudi trajnu kartu za delnjosakski filmowy festiwal „Fast and Furios – Back to the Culture“. Cyłkownje 25 šlinkow bě so wubědźowało.
