Drježdźany (dpa/SN). Němska železnica chce přichodne tydźenje z wobydlerjemi wo planowanym nowotwarje železniskeje čary mjez Drježdźanami a Prahu do rozmołwy přińć. Prěnje zarjadowanje tajkeho­ razu chcedźa 9. apryla w Pirnje přewjesć, železnica zdźěli. Heidenau a Dohma stej dalšej městnosći rozmołwow. Po informacijach železnicy chcedźa w meji započeć, wšelake čary móžnych wuskutkow na ludźi, wobswět a krajinu pruwować. Rozsudźić ma krajna direkcija. Planowanu nowočaru Drježdźany–Praha běchu w nowembru 2018 do lisćiny najwažnišch wobchadnych projektow zapisali. 43 kilometrow dołhi nowotwar wopřijima tež 25 km dołhi tunl.

Hamburg (dpa/SN). Młodostni chcedźa, zo so w prašenju přichoda towaršnosće bóle na nich poska a zo móža bóle sobu postajeć. To je wuslědk reprezentatiwneho woprašowanja instituta Opaschowski za prašenja přichoda. Při tym běchu so tysac ludźi wot staroby 14 lět prašeli. Fachowcy zwěsćichu, zo je podźěl młodostnych pod 20 lětami, kotřiž sej „wjele wjace ludowych wothłosowanjow“ žadaja, minjene lěta chětro rozrostł (2014: 73 procentow – 2019: 94 procentow).

„Młodostni paruja w politice jasne předstawy wo tym, kak měła naša towaršnosć za 20 abo 30 lět wupadać“, rjekny nawoda instituta prof. Horst Opaschowski. Tuchwilne protesty „Fridays for future“ su nowe hibanje sobuskutkowanja w zmysle artikla 20 Zakładneho zakonja, po kotrymž wša statna móc „při wólbach a wothłosowanjach wot ludu wuchadźa“ a strony při wutworjenju politiskeje wole jeničce „sobu skutkuja“, město toho zo same postajeja. „Protestne skupiny młodostnych měrja so přećiwo politiskim profijam, kotřiž so poněčim zesamostatnjeja a při tym zajimy přichodnych generacijow z wočow zhubja“, měni Opaschowski.

Móže zaćišć mylić?, chcyše kolegowka-žurnalistka časopisa Stern wote mnje wědźeć. Na zetkanju zwjazkoweho rěčnika Zwjazka 90/Zelenych Roberta Habecka wčera w Budyskim Serbskim instituće njemóžeše so jenož wona zaćišća dowobarać, zo njeje rozmołwa naležnosći přiměrjenu hłubokosć docpěła. Bě hósć snano přemało přihotowany na „swój prěni termin“ w Serbach? Abo bě wón njewěsty sebjewědomja dla, z kotrymž su serbscy rozmołwni partnerojo swoje stejišća ofensiwnje přednjesli? Hósć instituta, bywši schleswigsko-holsteinski minister, rěči dansce a sćele swoje dźěći na dansku šulu. To poprawom měło za wobsahapołnu rozmołwu wo mjeńšinowych temach dosahać. Škoda, zo tomu tak njebě. Podawki su so přemjetowali, bě z přeprošaceho wokrjesneho zwjazka Zelenych Budyšin słyšeć. Ze zwjazkowym rěčnikom stejachu hnydom tež nowinarjo ze stolicy Berlina w Zelenym wobchodźe. Naraz bě wšo hinak hač planowane. A spočatnje mjenowany zaćišć njebě žane mylenje. Axel Arlt

Z brónjowymi hrajkami, kotrež wupadachu kaž prawe brónje, su młodostni na Duisburgskim hłownym dwórnišću zasadźenje policije zawinowali. Dźewjeć młodostnych bě naraz wot policistow wobkruženych, kotřiž so jim z woprawdźitymi słužbnymi pistolemi w ruce bližachu. 14- do 16lětni so chětro wustróžichu a swoje „brónje“ hnydom na zemju połožichu. Woni chcychu widejo wjerćeć a njeběchu sej wědomi, što z atrapami načinja. Wězo so zamołwichu.

Nimale nahi je muž po swětosławnej Galeriji­ Tretjakowa w Moskwje běhał. Před wobrazom „Chrystus na zahrodźe Getsemani“ bě so wón drastu slekł, a jenož tanga woblečeny chodźeše po rumnosćach wustajeńcy. Na to ju wopušći. Wjednistwo galerije tukaše na ilegalnu akciju „wěsteho načasneho wuměłca“.