To a tamne (20.07.20)
Z paduchom stał je so swědomity młody wučer w japanskim Tokiju, zo by rano dypkownje w šuli był. Do toho bě sej wón po swjedźenju z přećelemi w ćahu wusnył a hakle w susodnej prowincy wotućił. Dokelž bě mjeztym posledni ćah domoj wotjěł a puć pěši předołhi, hrabny sej wón cuze koleso. W 2 hodź. pak policistam napadny, kotřiž jeho sobu na stražu wzachu. Hač je młody wučer přiwšěm hišće dypkownje do šule přišoł, njeje znate.
Hoberske roje lětacych mrowjow je britiska wjedrarnja Met Office na radarowym wobrazu zwěsćiła. Štož wupadaše při prěnim napohledźe kaž dešćikowe mróčele nad juhowuchodom Jendźelskeje, běchu mrowje. Na ćopłych, włóžnych a měrnych dnjach w lěću móža so wone z masami rozmnožić. Minjene lěta su tež zas a zaso tenisowe turněry w Wimbledonje domapytali.
To a tamne (17.07.20)
Čerstweho hórskeho powětra nasrěbać móža so ludźo w Japanskej wot najnowšeho – z konserwowych tyzow. Dokelž njemóža koronapandemije dla tuchwilu sami do horow, jim zamołwići města Hokuto w prowincy Yamanashi čerstwy powětr w tyzach domoj sćelu. Sobudźěłaćerjo města podawaja so za to do horow a do měšćanskeho parka, hdźež tyzy z powětrom pjelnja.
Ćelo z juchoweje jamy wuswobodźili su wohnjowi wobornicy w Braunschweigu. Skoćo bě při wječornym přechodźowanju na terenje ratarskeho slědźenišća přez wusku škałbu do jamy padnyło. K jeho zbožu njebě ta połna, a ćelo so jeno snadnje zrani. Kameradojo přijědźechu z wosebitym kranom a wotpowědnej techniku, zo móhli nócneho dundaka z jamy wućahnyć. Na to pak dyrbješe tón zaso wróćo do hródźe.
To a tamne (16.07.20)
94lětna kralowna Elizabeth II. wosobinsce chce jutře 100lětneho britiskeho wójnskeho weterana a zběrarja pjenježnych darow Toma Moora na ryćerja pozběhnyć. To je rěčnik Buckinghampalasta wobkrućił. Moore bě z pomocu namołwy při rolatoru na swojej zahrodźe 36 milionow eurow nazběrał, kotrež je strowotnistwu přewostajił. Za ryćerske pasowanje chce kralowna mječ wužiwać, kotryž słuša jeje nanej kralej Georgej VI.
Wjeršk Eiffeloweje wěže w Parisu je wotnětka zaso přistupny. Wčera su tež posledni poschod swětosławneje wěže wotewrěli. Ličba zastupnych lisćikow pak je wobmjezowana, zo móhli wopytowarjo trěbny wotstawk mjez sobu dodźeržeć. Po tři měsacy trajacej nanuzowanej přestawce koronakrizy dla běchu 324 metrow wysoku wěžu kónc junija zaso wotewrěli, najprjedy raz na dwěmaj etažomaj.
To a tamne (15.07.20)
Stare piwo a mortwy ptačk stej w Sewjerorynsko-Westfalskej wulkozasadźenje wohnjoweje wobory zawinowałoj. Šoferej nakładneho awta bě „žołto-bruna juška“ napadnyła, kotraž kapaše z wotstajeneho připowěšaka. Jako tež hišće mortweho ptačka pod připowěšakom wuhlada, alarmowaše wodźer Lkw-ja wohnjowu woboru. Hotujo so na chemiski alarm přijědźechu kameradojo w škitnych woblekach. Spěšnje so wukopa, zo jedna so wo stare piwo, kotrež bě z tyzow wuběžało. Hač bě zahinjeny ptačk přewjele skaženeho piwa laptał, wosta porno tomu njejasne.
Tajni policisća w Nižozemskej stawkuja za wyše mzdy, a činja to tohorunja tajnje. Tak přewjeduja protestne akcije w swojich běrowach, město toho zo bychu podhladnych wobkedźbowali abo techniku za jich wotposkanje zatwarjeli.
To a tamne (14.07.20)
Kóčku z marmeladoweje škleńcy wuswobodźiła je policija w badensko-württembergskim Ellwangenje. Micka tčeše z hłowu w škleńcy a njemóžeše so hižo wuswobodźić. Muž bě ju na dróze namakał. Zastojnicy přińdźechu na pomoc a škleńcu kedźbliwje rozbichu, zo bychu štyrinohača wuswobodźili. Na zbožo so tón při tym njezrani.
Awto z 39 ptačkami a dźewjeć młodymi kóčkami je policija w Braniborskej zadźeržała. Zastojnicy 69lětneho sobotu wječor na zwjazkowej dróze pola Seelowa kontrolowachu, dokelž bě zdźěla seklojtu čaru jěł. Muž rjekny, zo bě ptački na přehladce w Pólskej kupił. Kupne zrěčenje pak njemóžeše předpołožić. Kóčki běchu jemu darili, kaž twjerdźeše. Zastojnicy dowjezechu ptački a kóčki do zwěrjatownje. Weterinarny zarjad nětko móžne ranjenje zakonjow pruwuje.
To a tamne (13.07.20)
Hra billarda je so kónc tydźenja w braniborskim Finsterwaldźe bolostnje skónčiła, dokelž dyrbjachu jednoho z hrajerjow krawjaceje rany na hłowje dla w chorowni lěkować. Spočatnje běštaj so mužej wadźiłoj a sej mjez sobu nadawałoj, doniž skónčnje jedyn tamnemu z kijom na hłowu njebiješe. Skućićel je so na to sam pola policije přizjewił.
Internetnje a z tójšto małymi demonstracijemi su w Mnichowje lětuši Christopher Street Day (CSD) woswjećili. Pod hesłom „Přećiwo hidźe – Pisani, zhromadnje sylni“ su homoseksualni, biseksualni a transgenderojo na swoje prawa skedźbnjeli. CSD je so lětsa koronakrizy dla k žru politiskeho protesta wróćił, kaž rěčnik hibanja zdźěli: Město wulkeje party su ćicho přećiwo diskriminaciji protestowali. Za to běchu livestream zarjadowali a so w měsće po małych skupinkach zhromadźili.
To a tamne (10.07.20)
„Pomałe kasy“ za seniorow maja wot najnowšeho w Japanskej. Nakupowanski centrum w prowincy Fukuoka na juhozapadnej kupje Kyushu kupcow na to skedźbnja, zo móhło při kasy trochu dlěje trać, dokelž tam runje seniorow a zbrašenych posłužuja. Njesćerpni měli so tuž při druhich kasach nastupić. Je to reakcija na razantne zestarjenje Japanskeje, hdźež je mjeztym štwórćina ludźi starša hač 65 lět.
Štyrjoch wučerpanych Němcow wuchowała je awstriska hórska słužba z helikopterom w Alpach w pomjeznej kónčinje. Spřećelenej porikaj z Bayerskeje a Badensko-Württembergskeje běštej so na naročne pućowanje přez wjacore hory podałoj. Spušćejo so jeničce na smartfon pak su so woni wospjet zabłudźili. Nawoda hórskeje hěty informowaše słužbu, po tym zo njeběchu so wječor hišće nawróćili.
To a tamne (09.07.20)
W běhu widejoweje konferency dušował je měšćanski radźićel w Španiskej, zabył je pak kameru hasnyć. Dokelž bě jemu konferenca z kolegami, žurnalistami a wobydlerjemi po wjace hač štyrjoch hodźinach wostudła, rozsudźi so Bernardo Bustillo w sewjerošpaniskim měsće Torrelavega za multitasking: dušować a druhim dale připosłuchać. Za to móžachu wšitcy přihladować, kak wón nahi pod dušu steji. Bustillo je mjeztym poskićił wotstupić, štož pak su wotpokazali.
Zhubjeny wupokaz bě paduchej w durinskim Sömmerda ze zahubu. 22lětny je we wobchodźe twory za 450 eurow zapakował a ćeknył, ale zhubi swój wupokaz. Jako so na to do wobchoda wróći, běžeše wón mjeztym přiwołanym policistam direktnje do rukow. Rubiznu namakachu zastojnicy w kerku.
To a tamne (08.07.20)
Smjertne wutřěle z policajskeje pistole na howjado zaběraja nětko Nürnbergske krajne sudnistwo. Loni w meji bě młoda kruwa po puću do rězarnje ćeknyła. Mandźelska wobsedźerja wołaše na to policiju. Jedyn ze zastojnikow wućahny mašinsku pistolu a skoćo zatřěli. Na to je sej wobsedźer 3 000 eurow wot Bayerskeje žadał, argumentujo, zo bě policist přespěšnje reagował. Dwě mjeńšinje pozdźišo dźě běchu skótny lěkar, rěznik a hajnik na městnje, kotřiž móhli kruwu družinje wotpowědnje morić.
Dwanaćelětnu su ze zamknjeneho kašćika Ingelheimskeho dwórnišća wuswobodźić dyrbjeli. Holca bě tam sobotu wječor sama nutř zalězła. Přećel na to do duri storči, pječa mylnje, kaž twjerdźeše. Durje so zamknychu a njehodźachu so wjace wočinić. Wohnjowi wobornicy holcu njezranjenu wuswobodźichu.
To a tamne (07.07.20)
Dweju rubježnikow wuhnał je 90lětny ze swojimaj walkingowymaj kijomaj. Wobrónjenej běštaj starca, kiž na ławce Duisburgskeho parka sedźeše, wohrozyłoj a sej pjenjezy žadałoj. Tuž jimaj muž z kijomaj hrožeše, na čož ćeknyštaj. Něšto metrow dale chcyštaj 80lětneho wurubić. Tež tam njeběštaj wuspěšnaj – 30lětny starcej pomhaše a rubježnikow wućěri.
Zaměnjenje z bolostnymi sćěhami: Muža z Berlina je na rozžohnowanju nježenjencow w Awstriskej zmijica (Kreuzotter) do jazyka kusnyła. 38lětny bě mału zmijicu na dumpańcy z waku zaměnił. Jako so jeje we wobłuku dopokaza zmužitosće z jazykom dótkny, jeho jědojte zwěrjo kusny. Dokelž na to póžěradło 38lětneho strašnje nabubni, dowjezechu jeho k nuzowemu lěkarjej do něhdźe 60 kilometrow zdaleneje krajneje chorownje we Wienje.
