To a tamne (02.09.15)

Mittwoch, 02. September 2015 geschrieben von:

Policisća jako paduši su dźensa na Berlinskim Alexanderowym naměsće ludźi poradźowali, kak móhli so přećiwo paducham škitać. Za to nałožowachu wšelake triki kriminelnych. Nimo toho­ zawostajichu nalěpki na tobołach pěškow,­ bjez toho zo tući to pytnychu. Pozdźišo ludźi narěčachu. Cyłkownje 40 policistow so na akciji wobdźěli. Na Alexanderowyn naměsće dochadźa stajnje zaso ke kradnjenjam a nadpadam.

Wjace hač 60 000 eurow ma zežołtnjena papjerka jednomu z New-Yorkskich přesadźowanskich domow wunjesć: posledni jědźny lisćik łódźe „Titanic“. Pa­sa­žěr prěnjeje klasy měješe meni w zaku, jako so 1912 z podnurjaceje so luksusoweje łódźe wuchowa. Na dnju podnurjenja mějachu tam rybu, kokošku, grilowane wow­če­ mjaso a k tomu Mnichowske piwo.

To a tamne (01.09.15)

Dienstag, 01. September 2015 geschrieben von:

Jedyn wokrjes Indoneskeje je na zhromadźiznje wjesnych předstejićelow wob­zam­knył, pory winowatostnje woženić. Po­trjechene su njewoženjene poriki, kotrež hišće wječor po dźewjećich lepja. W po­trjeche­nym muslimskim wokrjesu bydli 900 000 ludźi.

Kupanske tofle bychu w Berlinje bjezmała njezbožo zawinili. 20lětna žona bě so na dwórnišću Steglitz z přećelku rozžohnowała. Při tym suny so z flipflopami mjez ćah a nastupišćo a wosta tčacy. Šofer ćaha móžeše runje hišće w prawym času borzdźić, a žona so njezrani. Hač su flipflopy njezbožo přetrali, njeje jasne.

To a tamne (31.08.15)

Montag, 31. August 2015 geschrieben von:

Nowy swětowy mišter na powětrowej gitarje pochadźa z Ruskeje. Kereel Bljumenkranc je so kónc tydźenja w finskim Oulu přećiwo 15 konkurentam přesadźił, kaž jury wozjewi. Z furioznej interpretaciju spěwa „Electric Butt“ finskeje skupiny Wedding Crashers móžeše 24lětny mjezynarodnu konkurencu – tež z Němskeje – za sobu wostajić.

12 000 eurow, kotrež bě 87lětny zběrar prózdnych blešow namakał, słušeja Wuppertalskemu hosćencarjej, je policija wuslědźiła. Předewzaćel bě dochody hosćenca­ do listowych wobalkow tyknył a je zhromadnje z wotpadkami mylnje preč ćisnył. Zběrar blešow pjenjezy nańdźe, jako wotpadkowy kontejner přepyta. Nětko ma wón prawo na myto. Nimo­ toho­ staj so anonymnaj darićelej přizjewiłoj, kotrajž chcetaj sprawneho muža pjenježnje wotrunać.

To a tamne (28.08.15)

Freitag, 28. August 2015 geschrieben von:

Na wšě 130 kilogramow wotbył je pony Idefix w Freibergskim zwěrjencu minjene 20 měsacow. Ze 190 kilogramami ma wón nětko idealnu wahu, kaž nawodnistwo zwěrjenca pisa. Mjez wopytowarjemi woblubowany Idefix bě zas a zaso chłóšćenki ludźi brał, byrnjež picowanje zakazane było. Tak wažeše spočatk lěta 2014 wjace hač 320 kilogramow. Wot toho časa ma kruty dietny plan a ponyjowu damu Palomu poboku.

Prěnje hodowne pječwo ma hižo přichodne dny we wobchodach ležeć, štyri měsacy do hód. Tak je sezona poprjancow, spekulaciusa a cymtowych hwěžkow zaha­jena. Pječa so ludźo hižo nětko za tajkimi wudźěłkami naprašuja, kaž nawoda něm­skeje wotnožki předewzaća Bahlsen, Michael Hähnel, medijam w Berlinskim zawodźe firmy rjekny.

To a tamne (27.08.15)

Donnerstag, 27. August 2015 geschrieben von:

Z podpismom přeradźił je so 29lětny muž, kiž bě bjez jězdźenki z ćahom po puću. Kaž zwjazkowa policija zdźěli, bě železnicar muža w ćahu z Magdeburga do Frankfurta nad Wódru bjez jězdźenki lepił a sej na to personalije čornojězdźerja žadał. Tón pak wupjelni formular spočatnje z wopačnymi datami. Jako na kóncu ze swojim prawym mjenom podpisa, so wěc wukopa. Nětko wočakuje jeho tež hišće skóržba wobšudnistwa dla.

Nic Pisa, ale Wellington: W awstralskej stolicy Wellingtonje chcedźa nowy běrowowy dom twarić, kotryž so po zdaću do tam zwučeneho sylneho sewjerneho wětra chila. Pobóčne sćěny 32 metrow wysokeho twarjenja budu 12,5 stopnjow nachilene, kaž rěkaše. Špundowanja su přiwšěm rune, hinak hač w Pisaskej wěži. Dowolnosć za twar mjeztym předleži. Klětu chcedźa z nim započeć.

To a tamne (26.08.15)

Mittwoch, 26. August 2015 geschrieben von:

Zakaz krótkich holčich cholowčkow (hotpants) w šuli badensko-württembergskeho města Horb chcedźa přichodnje w Bonnskim Domje stawiznow dokumentować. Šulske wjednistwo bě so před tydźenjemi z listom na staršich wobroćiło, prošo jich na dostojnu drastu swojich dźowkow hladać. Dale a wjac holcow dźě so „chětro zwažliwje“ hotuje. Šula chcyše tohodla wosebje wulke T-shirty jako šulsku drastu zawjesć. Tole bě w interneće tójšto kritiki, ale tež směcha zbudźiło.

2 000 lět stare škleńčane sudobjo je mała holca w Jerusalemskim muzeju rozbiła. Při tym jedna so tež hišće wo požčonku z New Yorka. Holčka bě do witriny storčiła, na čož w njej wustajene drohotne sudobjo padny a so rozbi. Fachowcam pak je so mjeztym poradźiło, črjopy zaso zlěpić, kaž muzej zdźěla.

To a tamne (25.08.15)

Dienstag, 25. August 2015 geschrieben von:

Tři tydźenje za swojim awtom pytał je Norwegčan w Hannoveru. 78lětny bě na jězbje z Andorry do Osla w delnjosakskej krajnej stolicy pozastał. Awto parkowaše wón w pódlanskej hasy a poda so pěši do centruma. Tam pak zhubi papjerku, na kotrejž bě sej mjeno hasy napisał. 73lětna wobydlerka mužej při pytanju pomhaše a jeho samo doma hospodowaše. Hakle namołwa w nowinje bě wuspěšna. Čitarka informowaše, zo hižo dlěši čas awto ze spodźiwnej čisłowej tafličku před jeje domom parkuje.

Wjace hač 12 000 eurow namakał je 87­lětny zběrar prózdnych blešow we wotpadkowym kontejneru we Wuppertalu. Muž donjese tři wobalki z pjenjezami na policajsku stražu, „byrnjež je sam zawěsće derje trjebać móhł“, rěčnik policije zdźěli. Nětko pruwuja, komu móhli pjenjezy słušeć­ a hač ma muž prawo na myto.

To a tamne (24.08.15)

Montag, 24. August 2015 geschrieben von:

Přez swoju rubiznu zakopnył je so paduch njedaloko Ludwigsburga. 23lětny bě we wobchodźe piwowej tyzy zapłaćił. W cholowach pak měješe dalše žiwidła schowane, kaž policija zdźěli. Přistajenaj wobchoda běštaj tole wobkedźbowałoj a dźěštaj za paduchom. Wón ćekny, při čimž so jemu pokradnjene wěcy z cholowow sunychu, na čož so zakopny a padny. Nawoda wobchoda wo­piteho a wo­baraceho so muža kruće dźeržeše, doniž policija njedojědźe.

Z 20 000 eurami pjelnjenu nohajcu je porik na něhdyšim nakładnym dwórnišću w Kamjenicy namakał. Spočatnje wuhladaštaj papjerjane pjenjezy při kolijach, pozdźišo wołmjanu nohajcu z pjenjezami. Porik namakanku policiji přepoda. Ta je sej wěsta, zo bě nichtó na něhdyšim dwórnišću čapor ilegalnje wot­kładował a z njej mylnje tež nohajcu.

To a tamne (21.08.15)

Freitag, 21. August 2015 geschrieben von:

Starše mandźelstwo je agresiwity a nadpadow kóčki dla dyrbjało wohnjowu woboru zawołać. 67lětna žona a wosom lět starši mandźelski buštaj wot kóčki nadpadnjenaj a mjezmoči ćežko zranjenaj, tak zo dyrbještaj do chorownje. Po zawołanju policije nadeńdźechu zastojnicy kóčku w stwě zawrjenu. Bydlenje bě z kreju popryskane. Kóčku dowjezechu do zwěrjatownje. Čehodla bu tak agresiwna, je policiji njejasne.

Benedikt XVI. je Kolpingowemu skutkej w Kölnje swoje čerwjene črije darił. Emeritowany bamž reagowaše z tym na hromadźensku akciju katolskeho socialneho zwjazka. Kolpingowy skutk bě Kölnjanow namołwił, 15 000 porow čriji na dobro socialneho projekta přewostajić. Benediktowe črije pak su dale dali z certifikatom do muzeja w jeho ródnym domje we wsy Marktl w Hornjej Bayerskej.

To a tamne (20.08.15)

Donnerstag, 20. August 2015 geschrieben von:

Na pobrjohu kupy Amrum su nadešli wjac hač sto lět staru jendźelsku blešu z póštu. Kaž online-nowina Amrum News wčera zdźěli, je dowolnica blešu namakała a w njej tčacu kartu wotpósłarjej bleše připósłała. Blešu su mjez 1904 a 1906 do Sewjerneho morja ćisnyli, napisa wotpósłar we wotmołwje. Bleša bě dźěl eksperimenta, w kotrymž su wjace hač 1 000 blešow do morja ćisnyli.

W trezorje Berlinskeje Čerwjeneje radnicy su namakali zarjadniski rjećaz ně­hdyšeho wyšeho měšćanosty wuchodneho Berlina Erharda Kracka. Tutu bě wón w lěće 1987 składnostnje 750. róčnicy załoženja Berlina zhotowić dał. Rjećaz bě z časa politiskeho přewróta zhubjeny. Nětko da amtěrowacy měšćanosta Michael Müller trezor wočinić. Nosyć pak rjećaz njebudźe, byrnjež sam žadyn njeměł.

Anzeige