To a tamne (18.08.20)
Šěsćlětneho kolesowarja na awtodróze zadźeržała je kanadiska policija. Šoferojo běchu policiju informowali, zo je mały kolesowar z nahłownikom na pobóčnej čarje highwayja 403 z města Hamilton do Toronta po puću. Zastojnicy jeho spěšnje nadeńdźechu. Hólc rjekny, zo je po puću wot wowki k swojej maćeri. Policisća so dźiwachu, zo jědźeše hólc do praweho směra na nimale 70 kilometrow dołhej čarje mjez woběmaj městomaj.
Lochkomyslnosć dweju młodostneju ze Sakskeje je na Rujanach zasadźenje pomocnikow zawinowała. 18- a 19lětnaj dowolnikaj chcyštaj póndźelu pola Sassnitza po 70 metrow hłubokej nahłej skłoninje dele lězć. Při tym so 19lětny wotsuny a móžeše so 60 metrow wysoko w strašnym połoženju runje hišće hałzy dodźeržeć. Wjace hač 20 pomocnikow z helikopterom jeju wuchowa.
To a tamne (17.08.20)
Kóčka z Tuneziskeje w připowěšaku nakładneho awta je do městačka Kahl nad Mohanom w Aschaffenburgskim wokrjesu dojěła. Mały „slepy pasažěr“ je drje w Tuneziskej do připowěšaka skočił a tak chcyjo-nochcyjo daloku jězbu na so wzał, samo přez Srjedźne morjo. Jězba skónči so w Delnjej Frankskej. Sobudźěłaćerjo běchu žałosćenje słyšeli. Přiwołana policija namaka lačnu a hłódnu kóčku, kotraž pak je jězbu hewak derje přetrała.
Porjedźenje mopeda je so w sewjerobayerskim Karlstadće z rozbuchnjenjom skónčiło. Ćišć detonacije wutorhny wěka kanalow a wutłóči wodu z toaletow. Při porjedźenju běštej dwaj litraj bencina do kanalizacije wuběžałoj, hdźež nasta strašna měšeńca bencina a powětra. Jako chcyše 25lětny moped startować, dóńdźe k rozbuchnjenju. Nichtó so njezrani.
To a tamne (14.08.20)
Mjez hałzami štoma zatłusnjeneho małeho šupa je policija w Frankfurće nad Mohanom wuswobodźiła. Žona, přechodźowaca so podłu Ryna, bě žałosćenje słyšała. Jako šupa wuhlada, zawoła wona policiju. Zastojnicy nańdźechu hišće dalše młodźo, wočiwidnje bratra zatłusnjeneho. Wobě zwěrjeći běštej chětro wuhłódnjenej. Dowjezechu jej do zwěrjatownje.
Spakosćeny alkohol hnydom sam wupił je paduch w Lipsku-Probstheida. 51lětny bě po prěnich dopóznaćach z wočinjenym woknom do jednoswójbneho domu zalězł, je tam „wšelake alkoholiske napoje“ pokradnył a wupił. Na to drje bě tak mučny, zo lehny so na zahrodźe spać. Pozdźišo jeho tam wobsedźer domu namaka a informowaše policiju. Zastojnicy wzachu pjaneho muža najprjedy raz sobu na rewěr. Dźensa chcychu jeho sudnikej předstajić.
To a tamne (13.08.20)
Mały njetopyr je so do policajskeho rewěra w badensko-württembergskim Ludwigsburgu zabłudźił a so tam na zapinak swěcy powěsnył, zo by sej swój spar popřał. Kolegina měješe to spočatnje za žort, bórze pak zwěsći, zo jedna so woprawdźe wo žiwe zwěrjatko. „Dokelž pak njeje na policajskim rewěrje měrny spar móžny, pušćichu kolegojo njetopyrja z woknom běrowa do swobody“, pisaja zastojnicy w interneće.
Bjez chwatka je so 32lětny zadobywar po wili w Berlinje-Wilmersdorfje rozhladował a w nocy k tomu hišće swěcu zapinył. Wón běhaše w kupanskich toflach wobsedźerja – kiž njebě doma – po chěži. Kedźbliwy susod pak informowaše policiju, wuhladawši swěcu w domje. Nětko chcedźa pruwować, hdy je so podhladny do wile zadobył a hač tam scyła něšto pobrachuje.
To a tamne (12.08.20)
Z ruku w cigaretowym awtomaće tčacy wostał je muž w sewjerorynsko-westfalskim Mönchengladbachu. Wohnjowi wobornicy jeho skónčnje z wulkimi klěšćemi wuswobodźichu, po tym zo běchu to sobudźěłaćerjo kupnicy podarmo spytali. Muž wosta njezranjeny a móžeše po lěkarskim přepytowanju dale nakupować.
Nawoči indiskeho wojowarja wo swobodu Mahatmy Gandhija chcedźa we Wulkej Britaniskej přesadźować. Stoprocentowsce wěsći sej w Bristolskim awkciskim domje East Auctions přiwšěm njejsu, zo su nawoči Gandhijej (1869–1948) woprawdźe słušeli. Awkcionator pak ma dosć pokazkow na to, kaž su to přirunajomne modele, kotrež bě Gandhi swój čas wužiwał. Internetnje chcedźa je 21. awgusta přesadźować. Hódnotu trochuja na 17 000 eurow. Mnozy zajimcy su so hižo přizjewili.
To a tamne (11.08.20)
Noweho štyrikolesateho kolegu maja wot najnowšeho sobudźěłaćerjo Rahlstedtskeho kěrchowa w Hamburgu. Roboter „Rainos“ jězdźi kóždu nóc z 200litrowskim tankom wody po kěrchowje, zo by rowy krjepił. Jězdźidło ma wjacore miliony měrjenskich dypkow składowane, zo móhło so na kěrchowje orientować. Poprawom maja sobudźěłaćerjo 2 500 rownišćow jědnaće króć wob lěto krjepić. To mjeztym dawno wjac njedosaha.
Z dołhim jědźnym štabikom fararka w Jendźelskej za čas koronapandemije wěriwym woblatka wudźěla. Mnozy wosadni běchu so natyknjenja z wirusom bojeli, rjekny duchowna Eileen Harrop we wuchodojendźelskim Winstonje. Tuž jej do mysli přińdźe, štabiki z chinskeje kuchnje wužiwać a ludźom prawy chlěb město woblatka do ruki dać. Zhromadne piće wina pak je dale zakazane.
To a tamne (10.08.20)
Kak dźiwne powšitkowne połoženje w USA tuchwilu je, pokazuje tež aktualna sudniska zwada mjez koncernom Apple Inc. a ameriskim IT-małopředewzaćom Prepear. Přičina rozkory je, zo móhli wužiwarjo – znajmjeńša po měnjenju kompjuteroweho giganta – firmowej loze zaměnić, kaž pisaja na fachowym portalu golem.de. Symbol Apple je jabłuko, Prepearowa značka je krušwa.
Dźewjećlětna fachowča za chemiju je ze swojoraznym wukonom w Pakistanje zapis do Guinnessoweje knihi rekordow docpěła. Mjeztym je wona w swojej domiznje chětro sławna. Natalja Najam z wuchodopakistanskeho Lahore bě w běhu dweju minutow a 24 sekundow wšitke chemiske elementy periodoweho systema přirjadowała, z čimž bě sydom sekundow spěšniša hač dotalna mějićelka rekorda – indiska profesorka.
To a tamne (07.08.20)
Přećelne wotpadkowe bowy maja wot najnowšeho w Trieru. Ćisnješ-li wotpadki do tajkeho, zaklinči krótke „haleluja“ abo přiklesk. Tak chcedźa so ludźom dźakować, zo sudobjo wužiwaja. Mjeztym su 120 litrow wulke bowy wosebita atrakcija. Něchtóžkuli jenož tohodla něšto do nich ćisnje, zo by gag wupruwował. Sudobjo móže wotpadki samo prasować, a to z pomocu solarnych celow.
87 kokosowych worjechow w běhu jeničkeje minuty rozbił je 51lětny Němc w schleswigsko-holsteinskim Bönningstedće. Tak je z wulkim wotstawkom nowy swětowy rekord nastajił, kaž Hamburgski Rekordny institut Němskeje zdźěla. Z bliskeho Quickborna pochadźacy Jens Gaude wužiwaše swój łochć, zo by na sportnišću w rynku nastajane worjechi rozpačił. Za nowy rekord wšak by hižo 50 worjechow dosahało.
To a tamne (06.08.20)
Kóčku při pašowanju drogow lepili su zastojnicy w jastwje stolicy Sri Lanki Colombo. Sobudźěłaćerjam bě podhladny pakćik napadnył, kotryž měješe kóčka wokoło šije. W nim namakachu heroin a SIM-kartki za mobilne telefony. Nětko chcedźa zwěsćić, hač je kóčka hižo časćišo jako kurěr w jastwje była. Mjeztym su tež wěstotne naprawy zesylnili.
15 eurow pokuty płaćić dyrbješe Gloria wjerchowka von Thurn und Taxis, dokelž bě bjez nahłownika na elektriskim roleru na pohrjeb Georga Ratzingera w Regensburgu přijěła. Kaž rěčnica policije zdźěli, su pjenjezy mjeztym dóšli. Policija bě 60lětnej chłostanku pósłała, po tym zo bě wona 8. julija bjez nahłownika k Regensburgskej katedrali přijěła a swój elektroroler demonstratiwnje před tam stejacymi policistami wotstajiła.
To a tamne (05.08.20)
Psyče howno na čriju je so w SakskoAnhaltskej wo bijeńcu młodeho porika w awće postarało. Krótko do wotjězda bě 23lětna mylnje do hromadki stupiła. Po tym zo bě so do awta sydnyła, dóńdźe k zwadźe z 32lětnym šoferom. Po werbalnym rozestajenju wza žona črij a biješe z nim muža. Na to so wobaj biještaj. Hakle policisća móžachu zwadu skónčić. Wobaj mataj nětko ze skóržbu ranjenja ćěła dla ličić.
Z kosćemi mandźelskeho we wačoku su Armenjanku na Mnichowskim lětanišću zadźerželi. Žona bě po puću z Grjekskeje do swojeje domizny, zo by lěta 2008 zemrěty mandźelski tam swój posledni wotpočink nadešoł. Zastojnicy cła, lěkarka a statny rěčnik pak njemóžachu žane přeńdźenja zwěsćić a su 74lětnej dowolili, z powostankami mandźelskeho do Kawkaza dale jěć.
