To a tamne (06.10.16)

Donnerstag, 06. Oktober 2016 geschrieben von:

Nowoseelandski rugbyjowy profi Aaron Smith je sej sam hrajnu přestawku nanuzował. Wón bu suspendowany, dokelž bě so na lětanišću w nowoseelandskim Christchurchu njediskretnje ze žonu zabawjał, a to na nuzniku za zbrašenych. Naležnosć njeby za profija sćěwki měła, njeby-li swójbny nan, kiž bě ze sydom dźěćimi w bliskosći, wšitko wobkedźbował a so pisomnje hóršił.

Na Erfurtskim hłownym dwórnišću je mać swojej dźěsći scomt kóframi prosće zabyła. Sobudźěłaćerce železnicy stej třilětna holčka a pjećlětny hólc wutoru wječor­ we wosmich napadnyłoj, dokelž běštej cyle samaj z wačokami na nastupišću. Krótko do toho bě tam ćah do směra na Lipsk wotjěł. W nim mać dźěsći se­dźeše. Wona so wězo hnydom zaso do Erfurta wróći, zo by holčku, hólca a kófry wotewzała.

To a tamne (05.10.16)

Mittwoch, 05. Oktober 2016 geschrieben von:

102 lěće staru žonu zajeli su policisća w staće USA Missouri, štož bě sej wona wuraznje přała. Ze zajećom su jej za­stojnicy w St. Luisu wjelelětny són spjelnili,­ kaž na Facebooku pisaja. Woni dowjezechu Edie Simms ze sputanymaj rukomaj w policajskim awće do hla­darnje, kotrejž staruška prawidłownje pjenjezy daruje. Akcija so 102lětnej widźomnje spodobaše, kaž wona sćelakej Fox rozprawješe, „předewšěm te ručne puta“.

Přihotowanje rězkow k praženju je w Alsdorfje pola Aachena zasadźenje policije zawiniło. Wobydlerka wjaceswójbneho domu bě w připołdnišich hodźinach policiju wołała a so twarskich dźěłow pola susoda dla hóršiła. Zastojnicy wěcku spěšnje wujasnichu. Swójba bě šnicle klepała. „Rězki so w pónoji praža.­ Žana naprawa. Nětko­ knježi měr“, w po­licajskej rozprawje rěka.

To a tamne (04.10.16)

Dienstag, 04. Oktober 2016 geschrieben von:

Z nowym rekordom doby plahowar z Hessenskeje wubědźowanje wo najćeši kirbs: Z 901 kilogram ćežkim eksemplarom je so Matthias Würsching z Einhausena njedźelu w badensko-württembergskim Ludwigsburgu jasnje přećiwo konkurency přesadźił. Dotalny rekord 812 kilogramow­ z lěta 2015 je wón tak wo nimale sto kilogramow přetrjechił. Cyłkownje 25 plahowarjow ze wšeje Němskeje bě so wubědźowało. Druhe a třeće městno wobsadźištaj plahowarjej z Badensko-Württembergskeje a Sakskeje: Jeju kirbsaj pak wažeštej „jenož“ 512 a 502 kg.

Z hubu połnej 50-eurowkow su paducha na Mnichowskim oktoberskim swjedźenju lepili. Pjenjezy bě 28lětny dalšemu wopytowarjej ze zaka wućahnył. Jako pytny, zo jeho wobkedźbuja, chcyše wón pjenjezy spóžěrać. Policija pak pakostnika přiwšěm zaja.

To a tamne (30.09.16)

Freitag, 30. September 2016 geschrieben von:

Tójšto wćipnych ludźi na pózdnim wječoru před wukładnym woknom apoteki w starym měsće – to bě ciwilnym zastojnikam Mnichowskeje policije podhladne. Stajnje zaso wostachu ludźo stejo a fotografowachu. Kaž zastojnicy zwěsćichu, běžeše na třoch monitorach erotiski film. Mějićelka apoteki pak njebě docpějomna. Hakle po hodźinomaj su monitory hasnyli. Nětko slědźa rozšě­rjenja pornografiskeho materiala dla.

Chětro fatalnje skónčił je so nadpad rubježnika na jednu z Berlinskich korčmow. Minjenu nóc wokoło 2 hodź. bě maskěrowany muž do korčmy w Neuköllnje zastupił. Žadajo sej pjenjezy třěleše wón z trašawku do špundowanja. 50lětna korčmarka wza sej baseballowy bič a stupi so njeznatemu do puća. Jako jej tamni hosćo na pomoc přińdźechu, so rubježnik nastróži a so zminy.

To a tamne (29.09.16)

Donnerstag, 29. September 2016 geschrieben von:

Pěši wokoło Němskeje: Na staflowy běh wosebiteho razu hotuje so tuchwilu skupina studentow Kamjeničanskeje techniskeje uniwersity. Mjeztym dźesaty króć chcedźa woni nimale 4 000 kilometrow dołhu čaru podłu mjezy Němskeje zmištrować. Za to planuja 16 dnjow. Kóždy z dwanaće wobdźělnikow běži dwójce wob dźeń 60 mjeńšin. Při tym chcedźa pjenjezy za dźěći zběrać, kotrež ćerpja na rědku chorosć musklow duchenne.

Sornu ze swimmingpoola wuchowała je policija w Essenje, po tym zo bě ju susod pozdatneho paducha dla alarmował. Zwěrjo bě w nocy na srjedu do poola padnyło a njemóžeše so hižo wuswobodźić. Dokelž słyšeše susod spodźiwne zwuki, zawoła policiju. Zastojnicy z kapsnymi lampami za paduchom pytachu a wuhladachu sornu. Njezranjene ju wućahnychu a na swobodu pušćichu.

To a tamne (28.09.16)

Mittwoch, 28. September 2016 geschrieben von:

Štó praji, zo maja Japanjenjo ćeže z jendźelšćinu: Zastojnicy mobilneje policajskeje straže w starym kejžorskim měsće Kyotu móža so z wukrajnymi turistami wot najnowšeho hnydom we 28 rěčach rozmołwjeć. Za to wužiwaja policisća tabletowy kompjuter z wosebitej přełožowanskej app, kaž nowina­ Asahi Shimbun rozprawja. Mobilna straža je zaměstnjena w małobusu, kotryž steji na turistiskich ćežišćach.

Tójšto lubosćinskich zamkow na Železnej šćežce, nimale 150 lět starym mosće za pěškow přez Mohan w Frankfurće, su njeznaći spakosćili. Zamki, kotrež poriki jako wuraz swojeje lubosće powěšeja, su tam hižo lěta wisali. Ani město ani policija njewěstej, štó je jich wobstatk pomjeńšił. Wobě pak nochcytej zakročić. Wšako njeje móst žanu škodu poćerpjeł. Tež skoržił zamkow dla nichtó njeje.

To a tamne (27.09.16)

Dienstag, 27. September 2016 geschrieben von:

Sudniska zwada wo 15 eurow drohi kožany pas budźe za muža dosć droha naležnosć. Nětko dyrbi 300 eurow za sudniske kóšty zapłaćić. Wón bě sej we wobchodźe w Augsburgu pas kupił a so hóršił, dokelž měješe tón hižo po prěnim nošenju njedostatki. Dokelž nochcyše wikowar pas wróćo wzać, muž skoržeše. Sudnistwo skóržbu wotpokaza: Štóž sej kožany pas za 15 eurow kupi, njemóže tež hišće wuběrnu kwalitu wočakować.

Espreso do mjezwoča kidnył je rozmjerzany muž sobudźěłaćerce hosćenca na pozastawarni při awtodróze A 3 pola Passauwa. 34lětny muž bě sej do toho mylnje sól město cokora do kofeja sypnył. Jako­ sej nowy kofej skaza, dyrbješe jón zapłaćić. Na to dósta 40lětna espreso do mjezwoča. Nětko policija přećiwo rabiatnemu hosćej přepytuje. Nimo toho ma wón tam zakaz domu.

To a tamne (26.09.16)

Montag, 26. September 2016 geschrieben von:

Swojeju staršeju ze spanskeje stwy wuzamknył­ je 13 měsacow stary hólčk w Magdeburgu. Jemu bě so minjeny pjatk poradźiło swoje łóžko přestorčić a mjez łožo staršeju a durje sunyć. Durje hodźachu so jenož hišće škałbu wote­wrěć. Bjezradnaj staršej wołaštaj na to wohnjowu woboru, kotraž durje wusadźi. Kak je hólčk łóžko přestorčić móhł, bě tež wobornikam wulke hódančko.

Z črjewami swojeho zemrěteho mandźelskeho je Marokkočanka do Graza přilećała, zo by je tam na móžne zajědojćenje přepytować dała. Při kontroli wuhladachu zastojnicy „najkurioznišu namakanku minjenych lět na lětanišću“. Žona rozkładźe, zo bě jeje mandźelski po operaciji w Marokku zemrěł. Nětko chce wona dopokazać, zo bu wón zajědojćeny. Kaž medije rozprawjeja, wšak njeje naležnosć chłostajomna.

To a tamne (23.09.16)

Freitag, 23. September 2016 geschrieben von:

Jědnaćelětna šulska holca je zabłudźenu štyrilětnu kilometer daloko na chribjeće do wěstoty njesła. Štyrilětna bě so při hrajkanju w měsće Kashima a kupje Kye­shu zaběžała, jako ju šulerka wuhlada. Dokelž swójbni holčki doma njeběchu, wza ju šulerka na chribjet a donjese ju na policajski­ rewěr. Tola tež tam nichtó njebě. Jědnaćelětna prošeše tuž w susodnym běrowje, hač směła z policajskej centralu telefonować. Ta móžeše holčku staršimaj skónčnje přepodać. Zmužitu šulerku počesćichu z wopismom.

Hoberski, 550 kilogramow ćežki kirbs je muž w Braniborskej plahował. Tón dóstawa wšědnje 600 litrow wody kaž tež kumštny a přirodny hnój, měni zahrodkar Oliver Langheim z Fürstenwalde. 42lětny chce so nětko z hoberskim płodom na Berlinsko-braniborskich mišterstwach wo najćeši kirbs wobdźělić.

To a tamne (22.09.16)

Donnerstag, 22. September 2016 geschrieben von:

Pomocnika w starobje 45 do 55 lět wupytać a wotnajeć móža sej zajimcy nětko w Japanskej. Tam poskića Takanobu Ni­shimoto tak mjenowanych wotnajenskich wujow, kotřiž ludźi w najwšelakorišich žiwjenskich situacijach podpěruja, a to za dźewjeć eurow na hodźinu. Hač su to problemy na dźěle, ćeže w lubosći abo cyle prosće samotnosć, tajki wotnajaty wuj ma přeco wotewrjene wucho. Serwis pak njepomha jenož wužiwarjam tejele posłužby, ale tež pomocnikam samym.

Zapalak je turistej z USA na Mnichowskim lětanišću mjerzanje načinił. Jako­ chcyše 25lětny muž wčera wěstotnu kontrolu přeńć, pokazowaše roentge­nowy nastroj nadobo alarm. Po wšěm zdaću bě we wačoku ručnu granatu spó­znał. Fachowcy pak móžachu skónčnje wujasnić, zo jedna so jeničce wo zapalak. Přiwšěm dyrbješe jón Američan wotedać.

Anzeige