To a tamne (11.11.21)
Z tempom 306 kilometrow na hodźinu bu njedaloko belgiskeho Lütticha šofer awta błysknjeny. To bě wón chětro spěšnje ze swojim wozom po puću. W Belgiskej směš poprawom jeno 120 kilometrow na hodźinu jěć. Dokelž pak su tamniše błyskače na maksimalne tempo 300 km/h wusměrjene, bě wodźer awta samo za tajki přespěšny a njetrjeba tuž žanu pokutu płaćić.
Wjacore lětdźesatki stare ćěło je policajski pos při zwučowanju we wokolinje wulkana Etna na Sicilskej namakał. W małej prózdnjeńcy wjedźeše pos zastojnikow k ćěłu. Po prěnich přepytowanjach policija z toho wuchadźa, zo bě muž tam w lětach 1970 do 1990 zemrěł. Při sebi měješe tež někotre lira-pjenježki. To bě italska měna do zawjedźenja eura.
To a tamne (10.11.21)
Kaž „Crocodile Dundee“ je Awstralčan nadpad wulkeho krokodila wotwobarał. 60lětny wudźeše w rěce McIvor w tropiskim Queenslandźe, jako jeho zwěrjo naraz z wody atakowaše a za noze k rěce sćahny. Awstralčan pak wućahny mały nóž ze swojeho pasa a kałny z nim do hłowy zwěrjeća. Na to jeho krokodil pušći a so wróćo do wody zminy. Zranjeny zamó muž samo hišće do bliskeje chorownje jěć.
„Atlas zboža“ přepytuje spokojnosć Němcow za čas pandemije. Zhladujo na to, zo tuchwilu šćěpjenja, homeschooling a homeoffice žiwjenje postajeja, mějachu eksperća w nadawku Němskeho pósta začuća Němcow na dožiwjenje zboža přepytować. Z naprašowanja wuchadźa, zo podachu ludźo swoju přerěznu žiwjensku spokojnosć loni na skali nul do dźesać ze z 6,74 dypkami. Lěto do toho bě přerězk hišće 7,14 dypkow.
To a tamne (09.11.21)
Dohromady 113 e-scooterow su w Kölnje z Ryna wućahnyli. To zdźěli wčera zwjazk Plattform Shared Mobility (PSM) po dołho trajacych dźěłach. Zas a zaso běchu nurjerjo tajke transportne srědki z wody ćahali. Někotre e-scootery su wotpowědni wobhospodarjerjo mjeztym wotewzali a za znowawužiwanje přihotowali. Podnurjeć e-scootery we wodźiznach mjenuje rěčnik PSM „wosebje ćežku formu wandalizma“.
Drogi w hódnoće 11,5 milionow eurow pokradnychu njeznaći skućićeljo policiji w južnoafriskim Kapstadće. Minjeny kónc tydźenja zalězechu woni z woknom do běrowa specialneje jednotki Hawks a spakosćichu tam 541 kilogramow kokaina z trezorow. Z Kapstadta transportuja wikowarjo łaćonskoameriske drogi dale do Awstralskeje, do Europy a Hongkonga.
To a tamne (08.11.21)
Podhladneje powěsće dla přepytowaše policija w allgäuskim Marktoberdorfje tamniši gymnazij. Wosoba, kotraž bě powěsć dóstała, je zastojnikow hnydom alarměrowała. Woni zhromadźichu šulerstwo před gymnazijom a při dwórnišću a přepytachu cyłu šulu. Na zbožo pak žane konkretne strachi njenańdźechu.
Šat spěwarki Amy Winehouse, kotryž bě wona na swojim poslednim koncerće w juniju 2011 w Běłohrodźe woblečena, su wčera w Beverly Hillsu za 243 000 dolarow přesadźowali. Za zelenočorny šat dołholětneje stylistki Winehouse Naomi Parry bu 16 poskitkow wotedatych. Štó je awkciju naposledk dobył, njeje dotal znate. W běhu dweju dnjow su w kaliforniskim přesadźowanskim domje „Julien’s Auction“ 800 dopomnjenkow na soulowu a jazzowu spěwarku přesadźowali. Dźěl dobytka darja za dobry skutk.
To a tamne (05.11.21)
67 gramow konopje namaka policija w bydlenju 41lětneho w Budyšinje. Srjedu wječor bě wón z kolesom w nutřkownym měsće po puću. Policija jeho kontrolowaše, dokelž podhladnje wonješe. Sydom pakćikow konopa měješe muž při sebi, ale žadyn wupokaz. Tuž přepytowachu zastojnicy na přikaz statneho rěčnistwa jeho bydlenje a namakachu tu dalše wopojadła.
Policiji runjewon do rukow ćěkaše srjedu muž na motorskim w Hamburgu. Jako chcychu policisća jeho zadźeržeć, dokelž njeměješe nahłownik, muž, kiž so najskerje w kónčinje njewuznaje, do hłubokogaraže policajskeho komisariata 21 w měšćanskej štwórći Altona ćekny. Tam prasny do duri a ćěkaše pěši dale, doniž jeho zajachu.
To a tamne (04.11.21)
Wuměnkar pyta woteběrarjow za tysacy dekoraciskich swini. „Bywša dźěćaca stwa wupada kaž chlěw“ zdźěli 85lětny wuměnkar z Kölna. Jeho žona Hannelore, kotraž loni zemrě, bě je něhdy zběrała. Hač škleńčane abo železne swinje abo pleńčatka – w kóždej wariaciji so po domskim waleja. Nětko chce wuměnkar je wotbyć a dźěl dobytka darić, na přikład na wopory popławjenja w Ahrtalu. Za to pyta nětko kupcow.
Zmužity juwelěr wuhna paducha z retlom w sewjernorynsko-westfalskim měsće Kleve. Kaž policija zdźěli bě njeznaty překupcej z nožom hrozył a sej pjenjezy z kasy žadał. Tutón so spočatnje zady tejki schowa, tola potom paduchej z drjewjanym kijom hrožeše. Na to paduch bjez rubizny twochny. Reakcija juwelěra běše zmužita, ale tež riskantna, praji rěčnica policije. „To by so tež nimo kulić móhło – znajemy dosć tajkich padow.“
To a tamne (03.11.21)
Slepy pasažěr ma nowe doma pola policista. Hižo srjedź septembra policija wo njewšědnej namakance rozprawješe: kočatko je so pod motorowej hawbu awta schowało, a to najskerje hižo 100 kilometrow dołho. Kaž mějićelka awta zdźěli, je hižo dźeń do jězby dwě dalšej młodej kóčce wuswobodźiła. Třeća je so derje schowała. Dokelž pytaše policist tak a tak kóčku, wona jenož skrótka w zwěrjatowni přebywaše a potom pola njeho zaćahny.
Mortweju po padnjenju w koncertowym domje w Uppsala nadeńdźechu po rozprawach wjacorych šwedskich medijow. Kaž tute zdźělichu, je wosoba z wysokosće do směra zachoda padnyła abo skočiła a při tym na druhich padnyła a zemrěła. Dalša wosoba tohorunja zemrě a jedna so zrani. Pozadki pada běchu hač do wutory wječora hišće njeznate. Wječor planowany koncert so wotpraji.
To a tamne (02.11.21)
Něhdźe dwaj metraj dołhej hadaj je swójba w awstralskim zwjazkowym staće Queensland w swojej klimowej připrawje wuhladała. Přiwołany fachowc za hady měješe swoju lubu nuzu jednoho wuža (Natter) wućahnyć. Tamny so přez dźěru w sćěnje zminy. Nětko chcedźa dźěru zamazać. Popadnjeneho hada dowjezechu do zwěrjatownje.
Młody mórski mjedwjedź wosrjedź dróhi je w USA njedaloko San Francisca zasadźenje policije zawinował. Šoferojo awtow běchu zastojnikow wołali, po tym zo běchu spodźiwneho pěška wuhladali. Bjezmała bychu do zwěrjeća zrazyli. Wobrazy pokazuja zwěrjo pod dohladom policije na kromje dróhi. Mjedwjedźa su mjeztym do stacije mórskich zwěrjatow k wobkedźbowanju dowjezli. Kak je so młody ćuleń do ciwilizowaneje kónčiny zabłudźić móhł, njewědźa.
To a tamne (01.11.21)
Drogi město paduchow namakała je policija w rudnohórskim Neuhausenje. Muž bě zastojnikow wołał, dokelž tukaše na paduchow w swojim domje. Jako so policisća po domje rozhladowachu, namakachu tři plantaže hašiša a hižo předźěłane drogi. Nimo toho zwěsćichu, zo předleži wukaz zajeća přećiwo njemu, dokelž njebě pokutu zapłaćił. 44lětneho dowjezechu do jastwa.
600 eurow za šalku kofeja je sej pinčnik w Budapesće wot němskeho turista žadał. Jako so turist spjećowaše, sumu zapłaćić, jemu mějićel hosćenca a pinčnik z policiju hrožeštaj. Ta wšak njeda so dołho prosyć a wobeju hosćencarjow zaja. Stajnje zaso turisća na horendne płaćizny skorža, čehoždla madźarska policija w tymle směrje zaměrnje přepytuje. Zajataj mataj dwaj hosćencaj w Budapesće, jedyn na sławnej dróze Vaci utca.
To a tamne (29.10.21)
Samlutki z měšćanskej železnicu po puću był je dakl w Mnichowje. Pos steješe w Grafingu pola Mnichowa sam na nastupišću a zalěze do ćaha, kiž jědźeše do směra na nutřkowne město. Pasažěram dakl napadny. Woni zawołachu policiju. Zastojnicy psa z picu zastarachu. Kaž so wukopa, bě sej 49lětny wobsedźer w ćahu wusnył. Tuž bě psyk sam z ćaha wustupił a z druhim dale jěł. Po dlěšim pytanju muž psa pola policije namaka.
Z pomocu interneta dźěćo porodźiła je 17lětna młodostna w Indiskej, po tym zo bě sej pola Youtube informaciski widejo wobhladała. Samodruhosć bě před staršimaj zatajić móhła. Wonaj zhoništaj wo wnučku hakle, jako słyšachu ze stwy dźowki žałosćenje ćěšenka. Policija je mjeztym 21lětneho nana dźěsća zajała, dokelž měješe seks z njepołnolětnej, štož je w Indiskej zakazane.
