To a tamne (13.01.22)
Dźěćo w busu porodźiła je žona w brazilskej metropoli Rio de Janeiro. Při porodźe jej sobujěducy pomhachu. Do toho běchu woni šofera pohonjeli, spěšnišo jěć. We wideju brazilskeje telewizije je widźeć, kak sanitetar z nowonarodźenym na ruce bus wopušći, młoda mać za nim. Wona so pola pasažěrow hišće zamołwi, zo bě bus jeje dla zapozdźeny. Ludźom pak bě to po wšěm zdaću smorže. Woni jej gratulowachu a so z njej wjeselachu.
Do hajzla ćisnjene spěšnotesty korony dla zatykuja w francoskim Berre-les-Alpes pola Nizzy tamnišu rjedźernju wopłóčkow. Zaso raz běchu železne hrabje, kotrež krute wobstatki z wopłóčkow ćahaja, zatykane, wottam rěkaše. „Myslachmy sej, zo je logiske, zo słušeja trjebane spěšnotesty do wotpadkoweho sudobja.“ Komuna ludźi prosy ničo do nuznika njemjetać, štož do njeho njesłuša.
To a tamne (12.01.22)
Radšo sej z mobilnym telefonom hrajkałoj hač za złóstnikami honiłoj staj policistaj w Kaliforniskej – a staj nětko pušćenaj. Sudnistwo je jeju skóržbu přećiwo tomu zaćisnyło. Wobrazy awtomatiskeje kamery policajskeho awta dopokazuja, zo staj w lěće 2017 hru „Pokemon Go“ dale hrałoj, byrnjež jeju zasadźenska centrala rubježnistwa dla do kupnicy pósłała.
Wjace hač 300 měchow z kradnjenej drastu a hrajkami je policija w delnjobayerskim Vilsbiburgu w bydlenju žony namakała. Wěcy běchu po bydlenju, w pincy a na balkonje rozdźělene. Swědcy běchu 36lětnu we wobchodźe při kradnjenju wobkedźbowali a policiju informowali. Policisća su na to bydlenje jako padušnica znateje žony přepytali a rubiznu namakali. Čehodla žona wěcy kradnješe, ale njewužiwaše, nichtó njewě.
To a tamne (11.01.22)
Homoseksualne amplowe poriki maja wot tohole tydźenja w Braunschweigu za wjace tolerancy wadźić. Cyłkownje wosom amplowych mužikow su ze štyrjomi žónskimi a štyrjomi muskimi porikami z małej wutrobičku narunali. Znački maja „signal tolerancy, wotewrjenosće a akceptancy jenakosplažneje lubosće być“, rjekny wyši měšćanosta Thorsten Kornblum (SPD) k zahajenju akcije.
Přemało spara a napinacy šulski dźeń stej wosomlětnemu pachołej w sewjernej Němskej zjawne pytanje policije wunjesłoj. Hólčec bě po šuli njedaloko Kiela do busa zalězł, doma pak njedojěł. Tak informowaštaj staršej policiju, kotraž zjawnje za nim pytaše. Busowy šofer je hólca skónčnje namakał – spjaceho w zadnim dźělu busa. Policija wosomlětneho na to domoj dowjeze.
To a tamne (10.01.22)
Při tankowni w swojim awće wusnył je sej muž w badensko-württembergskim Heidenheimje. Sobudźěłaćerjej bě wóz 21lětneho napadnył, dokelž tam dlěši čas steješe. Wón wuhlada muža spjaceho na zadnjej ławce awta. Na widejowym nahrawanju bě widźeć, kak muž po tankowanju zady do awta zalěze. Zastojnicy zwěsćichu při jězdźidle čerstwe slědy njezboža. Hač steješe muž pod wliwom alkohola abo drogow, njeje znate.
Ze swojim awtom runjewon wotlećał je 58lětny šofer we Warnemündźe nad Baltiskim morjom. Prawdźepodobnje měješe wón strowotniske problemy. Muž bě wčera z wulkej spěšnosću w křiwicy z dróhi zjěł. Při tym prasny do stejaka kolesow. Awto wotzběhny, přeleća murju mórskeje promenady a je skónčnje w pěskowym nasypje tčacy wostało. Muža dowjezechu do chorownje.
To a tamne (07.01.22)
Pře wšu měru sprócny bě paduch w Hannoveru. 25lětny je sej za čas njeskutka w cuzym łožu wusnył. Nimo toho bě chětro natutkany a steješe pod wliwom drogow. Wobydlerjo njeběchu w tym času doma. Susod pak bě zadobywarja widźał a policiju alarmował. Přiwołani sanitetarjo muža wubudźichu, njemóžachu pak žane strowotniske škody zwěsćić.
Wobchodowy detektiw móžeše tomu zadźěwać, zo je Berlinjan wjetše mnóstwo šokolody we wobchodźe w Neustreelitzu spakosćił. Wón wobkedźbowaše, kak muž 70 taflow šokolody do nachribjetnika styka a so zminy, bjez toho zo by płaćił. Detektiw jeho zadźerža. Rozhladujo so wuhladachu přiwołani policisća dweju čakaceju muži w awće, w kotrymž ležachu sta taflow šokolody w hódnoće 1 100 eurow. Zwotkel je mějachu, njemóžachu paduši policiji wězo rjec.
To a tamne (06.01.22)
Zhubjeneho hólca namakał je kedźbliwy pěšk w durinskej Gerje. Mužej bě sydomlětny napadnył, dokelž po dróze tam sem běhaše a wočiwidnje někoho pytaše. Přiwołani policisća zwěsćichu, zo bě žona swojeho syna hižo jako zhubjeneho přizjewiła. Pachoł bě maćeri w nakupowanskim centrumje twochnył.
Na wšě 28 hodźin za wodźidłom sedźał je šofer Lkw-ja, kaž so při kontroli w Braniborskej wukopa. Zastojnicy zwjazkoweho zarjada za transport tworow běchu spočatnje přepruwowali, hač ma za transport wulkich rołow scyła wurjadnu dowolnosć. Jako zwěsćichu, zo bě šofer krótko do kontrole elektronisku dokumentacisku kartu wuměnił, wołachu policiju. Zastojnicy namakachu wjacore dokumentaciske karty a dwě wšelakej jězbnej dowolnosći. 38lětnemu šoferej z Pólskeje su dalejězbu nablaku zakazali.
To a tamne (05.01.22)
Na prěnim přesadźowanju noweho lěta na rybjacych wikach w japanskej stolicy Tokiju su tunjaka (Thunfisch) za 128 000 eurow předali. To drje je hižo kopica pjenjez, ale wjele mjenje hač w časach do korony. W lěće 2019 bě tajka ryba rekordnu płaćiznu 2,7 milionow eurow wunjesła. Tónkróć bě wona 210 kilogramow ćežka. Kupiło je ju wikowanske předewzaće. W Japanskej, hdźež ludźo telko tunjaka kaž w žanym druhim kraju jědźa, je jeho wobstatk mjeztym jara wohroženy.
Za postawu Jězusdźěćatka pyta policija a prosy ludźi wo pomoc. Njeznaći běchu drjewjanu figuru ze žłobika na hodownych wikach na Berlinskich Žandarmowych wikach pokradnyli. Postawa z lipoweho drjewa je něhdźe 50 centimetrow wulka a waži tři kilogramy. Zhotowił bě ju wuměłc w bayerskim Oberammergauwje. Wo jeje hódnoće ničo znate njeje.
To a tamne (04.01.22)
Wopak parkowane awto z traktorom preč storčił je muž w bayerskim Garmisch-Partenkirchenje. Wosobowy wóz so při tym wospjet přećisny a je dospołnje skóncowany. Hněwny wobydler bě jón přez blisku dróhu na parkowanišćo storčił. Dalši wobydler na třěše ležace awto wuhlada a wołaše policiju, tukajo na wobchadne njezbožo. Policija zawinowarja spěšnje namaka a přizjewi jeho wěcneho wobškodźenja dla.
Wjewjerčku z nuzy wuswobodźili su wohnjowi wobornicy w Drježdźanach. Wona bě nowe lěto z woknom do bydlenja zalězła a za wulkim kamorom tčacy wostała. Wobydlerjo njezamóchu ju wuhnać. Po tym zo běchu kameradojo kamor wurumowali a dźěru do zadnjeje sćěny wurězali, móžachu zatłusnjenu wjewjerčku skónčnje wuswobodźić. A njezranjene zwěrjo móžeše na swobodu.
To a tamne (03.01.22)
Dwanaćelětny hólc w Halle je silwesterski wječor swojeho wopiteho nana z awtom domoj dowjezł. Muž bě po informacijach policije wokoło 20 hodź. doma zazwonił a wo to prosył, zo jeho něchtó wotewza, dokelž bě alkohol pił. To je dwanaćelětny po słowje wzał a sydny so za wodźidło nanoweho awta. Swědk, kiž bě w nim wobeju wuhladał, zawoła policiju, kotraž jeju doma na zbožo stroweju zetka.
Z prózdnym tankom a chětro natutkanaj staj mužej njedaloko Regensburga spytałoj awto z awtodróhi ćišćeć. Zastojnicy zwěsćichu pola kóždeho z njeju 2,5 promilow alkohola w kreji. Jako wonaj twjerdźeštaj, zo je tón tamny jěł, dyrbještaj wobaj krej wotedać. Pjanaj mužej reagowaštaj panisce, jako wuhladaštaj sykawu, dokelž měještaj ju za šćěpjenje přećiwo koronawirusej. Jězbnu dowolnosć ani tón jedyn ani tón tamny njeměješe.
To a tamne (30.12.21)
Kašće jako kamory předawa šefowka Mnichowskeho pochowanskeho instituta Lydia Gastroph. Dokelž nochcyše so jeje sotra w „tajkim grawoćiwym kašću“ pochować dać, wuhotuje Gastroph zhromadnje z wuměłcami a wuměłčemi moderne kašće, kotrež móža zajimcy jako kamory, křinje abo wazy wužiwać. Kelko tajki wosebity kamor płaći, pak z rozprawy njewuchadźa, za to pak, zo bu sotra Lydije Gastroh w kamorje pochowana.
Ličba njezbožow na jeničkim silwestrje za čas koronapandemije bě wo 40 procentow niša hač hewak. To wujewja wobličenja chorobnych kasow. Tak registrowaše Barmer loni mjez 29. decembrom a 2. januarom po cyłej Němskej něhdźe 3 800 njezbožow, kotrež dyrbjachu w chorownjach lěkarsce zastarać. Lěto do toho bě jich hišće 6 200. Najčasćišo zwěsćichu njezboža alkohola dla.
