To a tamne (08.02.22)
Dźiwje swinjo na konopeju je wobydlerku w sewjerorynsko-westfalskim Hagenje njemało nastróžiło a zasadźenje policije zawinowało. Něhdźe 60 kilogramow ćežka wurosćena ranca bě so přez terasowe durje do domu zadobyła, stwu přeborkała a so skónčnje lehnyła. Policistam dyrbješe žona při telefonje potwjerdźić, zo nježortuje. Zastojnicy wołachu hajnika, kiž zwěrjo do swobody pušći.
Drogi susoda w swojim bydlenju składowała je rentnarka w Rüsselsheimje pola Darmstadta. 1,4 kilogramy kokaina, hašiša, marihuany a 12 000 eurow chowaše 70lětna w kófru. Policija w Darmstadtće z toho wuchadźa, zo žona wědźeše, zo jeje 35lětny susod z drogami wikuje. Přećiwo woběmaj su sudniske jednanje zahajili. Zastojnicy běchu kófer našli, po tym zo njeběchu w bydlenju 35lětneho tak derje kaž žane drogi namakali.
To a tamne (07.02.22)
Karantena muža koronawirusa dla je w Drježdźanach zasadźenje wohnjoweje wobory zawiniła. Susodźa běchu policiju a wohnjowu woboru wołali, po tym zo běchu muža na třěše wjaceswójbneho domu wuhladali. Wohnjowym wobornikam na wjerćatym rěblu wón rozłoži, zo je tuchwilu w karantenje a zo chcyše na čerstwy powětr, bjez toho, zo by někoho wohrozył. Tuž je na třěchu zalězł.
Swětowy rekord nastupajo NDRski „Trabant“ je wotnětka oficialnje zaso w Zwickauwje. Pjeć měsacow po tym, zo bě so spočatk septembra 20 młodych žonow do zeleneho Trabanta 601 tłóčiło, su fachowcy rekord nětko oficialnje připóznali. Prěni rekord ze 17 wosobami běchu 1976 w Zwickauwje nastajili. Před lětomaj dźěše titul do braniborskeho Altlandsberga z 18 ludźimi. Wot toho časa su w Zwickauwje za nowy rekord zwučowali.
To a tamne (04.02.22)
To a tamne (03.02.22)
Psyčk z mjenom Jucy je w sewjerorynsko-westfalskim Herne šěsć hodźin trajace zasadźenje wohnjoweje wobory a Techniskeho pomocneho skutka zawinił. Wokoło 20 hodź. bě žona telefonisce zdźěliła, zo je so jeje lubušk Jucy w jamje liškow abo zajacow zminył. Na to pytachu pomocnicy z łopaćemi, bagrom a samo kanalowej kameru za nim, bjez wuspěcha. Nazajtra namakachu psyčka w zwěrjatowni, hdźež je jeho něchtó wotedał. Hdźe bě jeho wuhladał, wón njepřeradźi.
Kuriozne njezbožo z dźěćacym jězdźidłom bobbycarom w münsterlandskim Ahausu je wujasnjene. Před tydźenjomaj bě tam dźěćo do žony zrazyło, kotraž na to padny, so zrani a sej cholowy roztorha. Zrjadować pak to njemóžachu, dokelž bě mać małeho šofera žonje mylnje wopačne telefonowe čisło dała. Z pomocu swědka su ju mjeztym wuslědźili.
To a tamne (02.02.22)
Nimale 40 000 eurow a złotaki su cłownicy na lětanišću Karlsruhe/Baden we wačoku pasažěrki našli. Mjez stronami knihow bě 46lětna cyłkownje 40 700 šwicarskich frankow schowała. W titkach nósnikow měješe wona nimo toho złoto w hódnoće 6 300 eurow zapakowane. Pašowanja dla ju zastojnicy wozjewichu. Pjenježne srědki wjace hač 10 000 eurow dyrbja ludźo při zapućowanju a wopušćenju Němskeje přizjewić.
Hnydom trójce zjebał je njeznaty žonu w vogtlandskim Netzschkauwje. Skućićel bě 74lětnej při telefonje napowědał, zo je jeje dźowka njezbožo z dźěsćom zawiniła a nětko w jastwje sedźi. Rentnarka přepoda jemu na to štyricyfrowu sumu pjenjez. Krótko na to žadaše sej muž hišće wjetšu „kawciju“ za dźowku. Tež to pak jemu njedosahaše. Skónčnje dósta wón hišće dulu złota wot zjebaneje.
To a tamne (01.02.22)
Jědojty pawk – tak wulki kaž čłowječa ruka – je w kupnicy žiwidłow w Krefeldźe zasadźenje wohnjoweje wobory zawinił. Sobudźěłaćerjo discountera běchu čłonkonohača w kisće bananow z Dominikanskeje republiki wuhladali a přikładnje reagowali. Woni tyknychu kistu scomt bananami a pawkom do plastoweje tity, po tym zo běchu jeho fotografowali. Fachowcy móžachu jeho tuž spěšnje identifikować. Tale družina z Južneje Ameriki je drje jědojta, njeje pak smjertna.
Na wšě 70 lět bjez jězbneje dowolnosće a zawěsćenja po puću był je muž w Jendźelskej. Lěta 1938 rodźeny muž bě so njedaloko Nottinghama do kontrole dóstał, njeměješe pak ani papjery ani zawěsćenje za swój Mini One. Zastojnikam wón rozłoži, zo wot 12. žiwjenskeho lěta bjez njezboža awto wodźi. Jězbnu dowolnosć njeje nihdy wobsedźał.
To a tamne (31.01.22)
Łožo pokradnyli su paduši z bydlenja w Dürenje pola Kölna. Kaž policija zdźěli, su so njeznaći swětły dźeń do bydlenja w prěnim poschodźe wjaceswójbneho domu zadobyli, jako wobsedźerka doma njebě. Skućićeljo pokradnychu telewizoraj, hrajnu konsolu, kamorčk a 140 centimetrow šěroke łožo z matracu. Policija pyta za swědkami, kiž su snadź transport spěraweje rubizny wobkedźbowali.
Hižo druhi króć je žona w Francoskej dźěćo we wuchowanskim jězdźidle wohnjoweje wobory porodźiła, we woběmaj padomaj samsneje wuchowanskeje straže. Žona bě štwórtk z awtom po puću do kliniki, jako pytny, zo so porod bliži. Wona zajědźe na parkowanišćo wuchowanskeje straže, hdźež so hnydom wo nju starachu. Krótko na to so mała Ohana narodźi. Lěta 2018 bě so porod prěnjeho dźěsća žony podobnje wotměł.
To a tamne (28.01.22)
Z awtom do wobchoda za kwasne šaty zrazyła je žona w Kerpenje pola Kölna. Do toho bě 69lětna při zaparkowanju před wobchodom pedalej za borzdźidło a płun zaměniła. Awto z wotmachom wotjědźe, přerazy wukładne wokno a wosta we wobchodźe stejo. Přistajena wuńdźe ze stróželemi, tež šoferka wosta njezranjena.
Ćeknjeny proch srěbacy roboter je wobydlerjow awstriskeho městačka Wieselburg zaběrał. Roboter za žiwidła wobchod rjedźi a je poprawom hotowy, hdyž so tam rano w sedmich durje wočinja. Awtomatiska kamera pak pokazowaše, kak so Fluffy přez wočinjene durje zminje. Jako mějićel wobchoda pytny, zo je „Fluffy“ preč, bě přepozdźe. Po zjawnej namołwje wobchodnika su wobydlerjo roboter we wotpadkowej firmje našli. Dźěłaćerjo běchu na chódniku stejacy nastroj sobu wzali.
To a tamne (27.01.22)
Po tym zo stej tołčene běrny na so mjetałoj a so hišće biłoj, su dwě žonje z jastwa w šwabskim Aichachu znowa zasudźili. Wobydlerce samsneje cele běštej so loni w juliju zwadźiłoj a jědź na so mjetałoj – tón dźeń sydachu tołčene běrny. Při ćělnym rozestajenju so wobě žonje zraništej. Augsburgske sudnistwo zasudźi jednu z njeju k pokuće 2 700 eurow. Tamna ma 1 800 eurow płaćić.
Hnujace zasowidźenje španiskeje swójby ze swojim sydom lět zhubjenym psom je w interneće wjele kedźbnosće zbudźiło. Sobudźěłaćerka tankownje Pepe Tenorio bě pastyrskeho psa Dica před dnjemi při awtodróze wuhladała a sobu wzała. Dźakowano jeho plakeće při šiji móžeše skótna lěkarka wobsedźerjow spěšnje wuslědźić a jim psa wróćić. Tući ze sylzami we wočach wbohe skoćo domoj witachu. Dico bě wot lěta 2015 zhubjeny.
To a tamne (26.01.22)
Žadyn dobry poměr k swojemu telefonej nimaja Francozojo. Na telefonaty w krutej syći 17 procentow ludźi zasadnje njereaguje a dalšich 26 proc. jenož, jeli wołaceho na telefonowym čisle spóznawaja, zdźěli statistiski zarjad w Parisu. Telefonat na handyju dwaj procentaj ludźi zasadnje ignorujetej, 30 procentow reaguje jenož pola znatych čisłow. 77 procentow žonow hnydom na telefon dźe, ale jeno 69 muži.
Pobrachowaca plaketa při čisłowej tafličce bě zahuba za Kölnjana, kiž bě na wšě 30 lět bjez jězbneje dowolnosće po puću. 63lětny zastojnikam wuzna, zo bě swoje „papjery“ hižo 1992 přisadźił a zo je wot toho časa „bjez njezboža“ po měsće jězdźił. Policistam bě pobrachowaca plaketa napadnyła. Dokelž njemóžeše šofer při kontroli jězbnu dowolnosć pokazać, čaka nětko chłostanje na njeho.
