To a tamne (29.04.22)
Z nimale 300 km/h je so šofer w Bayerskej policajskej kontroli wuwinyć spytał. Jako zastojnicy spytachu, jeho na awtodróze A 8 pola Rosenheima zadźeržeć, 48lětny z 220 km/h dale jědźeše. Pozdźišo wotboči muž na A 93 a smaleše z nimale 300 km/h dale, byrnjež tam jenož 130 km/h dowolene byli. Krótko do mjezy k Awstriskej móžachu 48lětneho tola hišće zadźeržeć. Nětko dyrbi smaler ze skóržbu ličić.
Pěstowarske dźěći jako pomocnych policistow zasadźić chce policija w delnjosakskim Hamelnje. Hižo wjacore tydźenje bědźa so tam z wěcami, kotrež njeznaći na kolije kładu: nakupowanske wozy, wobruče abo drjewjane palisady. W měrcu je pjeć króć k zražkam ćahow dóšło. Nětko su dźěći bliskeje pěstowarnje prosyli, kolije wobkedźbować a pěstowarkam rjec, hdyž je jim něšto napadnyło.
To a tamne (28.04.22)
Hołb je w Berlinje na konjacym wubědźowanišću Mariendorf do wubědźowanja zasahnył a konja porazył. Kaž zamołwići zdźěleja, bě so wustróžany hołb „kaž worjoł do konja dał“ a jeho w mjezwoču nadběhował. Kóń Royenne, kiž měješe kołsać, zhubi rytmus a bu diskwalifikowany. Mjez sydom wobdźělnikami wubědźowanja bě Royenne absolutny faworit. Dobyćerjej kiwaše 10 000 eurow.
Cyłu hodźinu 25 metrow wysoko wutrać dyrbješe 24 wopytowarjow ludoweho swjedźenja w Aachenje, po tym zo bě so rjećazowy karusel wjerćeć přestał a horjeka stejo wostał. Wohnjowa wobora hosći, mjez nimi štyri dźěći, z wjerćatymi rěblemi wuswobodźi. Po tym jich do přikrywow zawalichu, dokelž běchu chětro přemjerznjeni. Nichtó pak so njezrani. Přičina hawarije bě drje techniski defekt, zarjadowar zdźěli.
To a tamne (27.04.22)
Z hrajkowym mječom staj hólcaj w ćahu w Nižozemskej wulke zasadźenje policije zawinowałoj. Po informaciji swědka, zo je w ćahu někoho z nožom abo mječom widźał, přijědźe policija z wjacorymi jednotkami k dwórnišću w Amsterdamje. Železniski wobchad bě přetorhnjeny, ludźo njesmědźachu z ćaha wulězć. Nad dwórnišćom kružeše helikopter. Hólcow wzachu z ćaha. Při tym so wukopa, zo jedna so wo hrajku. Po „krótkim ale raznym“ powučenju, smědźeštaj dale jěć.
W internetnje kupjenej trjebanej kuchni je 50lětny we wokrjesu Anhalt-Bitterfeld 150 000 eurow našoł. Muž bě meble kupił a w Halle wotewzał, policija w Köthenje zdźěli. Při tym bě pjenježnej tyzy wuhladał. Sprawny namakar so pola policije přizjewi. Pjenjezy składuja najprjedy raz na hamtskim sudnistwje. Policija nětko za bywšim wobsedźerjom kuchnje pyta.
To a tamne (26.04.22)
Žołmu pomocliwosće dožiwił je potrěbny muž w Nižozemskej, kotrehož běchu 80lětneho prěni króć při kradnjenju žiwidłow lepili. Muž bě twarožk, šinku a garnele w hódnoće 17,75 we wobchodźe kradnył, dokelž renta njedosaha, wón policiji rjekny. Po tym zo bě za měšćansku štwórć zamołwity policist tutu „zrudnu stawiznu“ w interneće wozjewił, so mnozy ludźo přizjewichu, kotřiž chcychu starcej žiwidła a druhe wěcy k žiwjenju přewostajić.
Najstarši čłowjek swěta, Japančanka Kane Tanaka, je 119lětna zemrěła. Kaž lokalna nowina juhozapadneho města Fukuoka zdźěla, je žona 19. apryla wumrěła. Po informacijach Gerontology Research Group je nětko Francozowka Lucile Randon ze 118 lětami a 73 dnjemi najstarši čłowjek swěta. Najstarši wobydler Japanskeje je po informacijach strowotniskeho ministerstwa 115lětny Fusa Tatsumi.
To a tamne (25.04.22)
Sezonu dujerjow na wěži su wčera w Kamjenicy zahajili. Na balkonje Stareje radnicy je pozawnowy chór z Grüna zahudźił. Hač do adwentneho časa chcedźa hudźbnicy Kamjeničanskeje wosady a wokolnych wosadow kóždu sobotu rano połhodźinski koncert poskićić. Zaklinčeć maja twórby Johanna Sebastiana Bacha runje tak kaž moderne kruchi. Tradicija hudźenja na wěži saha hač do 1980tych lět a nasta na priwatnu iniciatiwu.
Awto z hata wućahnyli su wohnjowi wobornicy w sauerlandskim Lennestedtće. Wóz bě wčera rano do hata zajěł, dokelž bě wobsedźer na to zabył, ručne borzdźidło kruće přićahnyć. Kaž rěčnik wohnjoweje wobory zdźěla, so akcija jenož z pomocu dweju nurjakow towaršnosće za wuchowanje žiwjenja poradźi. Tójšto wćipnych wuchowansku akciju z 45 pomocnikami wobkedźbowaše.
To a tamne (22.04.22)
Wobšudnikow wutriksowałoj staj rentnarjej w Hamburgu. Do toho běštaj wopačnej policistaj jimaj 60 000 eurow wotewzałoj, dokelž so pječa paduši na dom seniorow měrja. Jako so skućićeljo znowa za pjenjezami – tónkróć na bance – prašachu, starcaj do toho zwolištaj. Do toho běštaj policiju informowałoj. Při přepodaću pjenjez zastojnicy jebakow zajachu.
Na wšě 150 kilometrow po puću był je dospołnje pjany šofer wosoboweho awta na awtodróze A 19 mjez Berlinom a Baltiskim morjom, doniž jeho policija njezadźerža. Muž, pola kotrehož naměrichu 2,13 promilow alkohola, bě ze swojim wobškodźenym awtom a swojoraznym wašnjom jězdźenja hižo w Braniborskej napadnył. Hakle w Rostockskim wokrjesu so poradźi, jeho zadźeržeć. Při awće zwěsćichu čerstwe wobškodźenja a pytaja tych, kiž buchu wot šofera škodowani.
To a tamne (21.04.22)
Z pomocu mobilneho telefona su pilatko wuchowali, kotrež bě jutry njedźelu do kanalizacije w Bremerhavenje padnyło. Wohnjowi wobornicy z telefonom wołanje kački za młodźatom nahrawachu a w kanalizaciji wothrawachu. Tak móžachu pilo namakać a wuchować. Młode zwěrjo bě do nadróžneho gullyja padnyło, štož pěšcy wobkedźbowachu.
Na kofej, pizzu a solotej wjeseli so němski astronawt Matthias Maurer, kotrehož słužbny čas w swětnišćowej staciji ISS so po šěsć měsacach nachila. Kónc apryla ma so wón na zemju nawróćić. „Wjeselu so jara“, rjekny 52lětny powěsćerni dpa, na wšo to, štož w swětnišćowej staciji njeměješe. Wosebje čerstwa jědź jemu pobrachowaše: čerstwy sad, čerstwa solotej, horca pizza a wočerstwjace napoje. „A wězo na prawy kofej, Latte Macchiato z bitym mlokom horjeka.“
To a tamne (20.04.22)
Wospjet wobkradnjena žona w sewjerorynsko-westfalskim Herne je dekoraciskeho jutrowneho zajaca z nawigaciskim nastrojom wuhotowała a po tutym puću paducha zwěsćiła. Jutrowna dekoracija bě so minjene lěta stajnje zaso z rowa zemrěteho mandźelskeho zhubiła. Tónkróć měješe hornčerski zajac sćelak při sebi. Jako bu dekoracija njedźelu znowa pokradnjena, móžeše 65lětna zhubjeny předmjet w bliskim zahrodkownišću zwěsćić. Policisća pokradnjeneho zajaca pola 72lětneho sćazachu a jeho žonje wróćichu. Paducha wobskorža.
Woheń na dworje zakładneje šule je w Hirschfelde njedaloko Zhorjelca zasadźenje policije zawinował. Młodostni běchu woheń zadźěłali a samo štom pušćili, jako bě jim drjewo wušło. Po pokiwje wobydlerja zastojnicy woheń zhašachu a pósłachu sydom młodostnych domoj.
To a tamne (19.04.22)
Něhdźe 80 000 listow su dźěći jutrownemu zajacej w delnjosakskej wjesce Ostereistedt napisali. Přeća dopisowarjow běchu jara wšelake. Tak přejachu sej dźěći měr na Ukrainje, kónc koronapandemije, ale tež słódkosće a hrajki. Wulka ličba čestnohamtskich pomocnikow nětko młodym dopisowarjam wotmołwi.
Zhubjeneho pytona su zastojnicy w japanskim měsće Kurashiki w awće wobsedźerja nětko skónčnje namakali. Poprawom chcyše wón hada ze swojeho awta wzać, hdźež pak jeho njenańdźe. Dźesać wosobow sylny team policije bě dny dołho za zwěrjećom pytał. Po wšěm zdaću bě pyton cyły čas w awće, dokelž su jeho we fašku za kablemi namakali.
To a tamne (14.04.22)
W jutrownym času je 130 ze syna zdźěłanych zajacow w Silberbachu, wokrjes Hof, nastajenych. Wone su w kostimach, tak jako policisća abo wohnjowi wobornicy. Předstajene su wšelake sceny wjesneho žiwjenja, tak cyle aktualnje testowa stacija korony dla abo wuchowanska akcija wohnjoweje wobory. Jutry ma gmejnje Konradsreuth přisłušaca wjes z połsta dušemi wjace synowych zajacow hač wjesnjanow, a tójšto wopytowarjow.
Wulku konopjowu plantažu ze 415 000 rostlinami je španiska policija na sewjeru kraja našła. Dohromady pjeć wosobow bu při akciji w Navarrje zajatych, kaž zastojnicy wutoru zdźělichu. Sušene bychu rostliny hódnotu 30 milionow eurow na čornych wikach měli, dale předźěłane na cannabidiol (CBD) a dalše wudźěłki samo 100 milionow eurow. Ekstrakt CBD w medicinje wužiwaja.
