To a tamne (06.09.22)
Po zawlečenju Jack Russell Terriera Oskara před lětom w Berlinje njejsu wobsedźerjo swojeho psa přeco hišće namakali. Minjene měsacy drje su ludźo Oskara hdys a hdys wuhladali, tola pytanje za nim bě stajnje njewuspěšne. Loni bě hólc před drogeriju w Pankowje psa pokradnył a w Kreuzbergu zaso pušćił. Powěsć je so spěšnje po socialnych syćach rozšěriła a z tym kedźbnosć zbudźiła.
Po dwójnej přestawce korony dla so někotři ratarjo w bayerskim Allgäuju tradicijow wzdadźa. W septembrje wšak swoje kruwy z pastwow na horach do dołow wjedu, štož su rady woswjećili. Mjeztym skót na wšelake blaki wodźa, zwotkelž jón dale na statoki transportuja. Někotři burja swójski skót samo hnydom z nakładnymi awtami z pastwy na horje wotewzaja. Najebać to, pak ratarjo kónc lěća swjeća a domizniski swjedźeń přewjedu.
To a tamne (05.09.22)
Wěcynjewustojneho kurjenja kołća dla je pčołar w Porynsko-Pfalcowskej něhdźe 400 kwadratnych metrow lěsa zapalił. Při tym je 42lětny pjatk popołdnju přewjele kura zadychał, čehoždla dyrbjachu jeho na městnje lěkować. Nětko přepytuje policija pad njekedźbliweho zadźerženja dla. Cyłkownje 55 wohnjowych wobornikow z jědnaće jězdźidłami je płomjenja hašało.
Dźakowano dokładnemu hladanju je w Šwicarskej nopawa z dwěmaj hłowomaj starobu 25 lět docpěła. Na swojich narodninach zawčerawšim w Genfskim přirodnym historiskim muzeju su hladarjo tam bydlace zwěrjo z mjenom Janus ze zubnej šćětku wumyli. Nopawu wšědnje kupaja, prawidłownje masěruja, ze specielnej dietu zapleńča a wobstajnje na staw derjeměća kontroluja. Amfibija bu po Janusu, romskim Bohu z dwěmaj wobličomaj, pomjenowana.
To a tamne (02.09.22)
16 žnjowych pomocnikow zajała je nižozemska policija, jako tući na ležownosći bywšeho zawoda konop předźěłachu. Po pokiwje swědka běchu zastojnicy hižo před twarjenjom w Oirsbeeku njedaloko němskeje mjezy pola Aachena sylnu wóń konopje registrowali. W hali nańdźechu potom 16 wosobow, kotřiž runje rostliny rozkuskowachu. Mjez zajatymi bě dwanaće wosobow bjez kruteje adresy, policija zdźěli.
Zhubjeny šěsćlětny hólc je w Badensko-Württembergskej na swojim kolesu dźesać kilometrow daloko k hotelej jěł a zasadźenje policije zawinił. Staršej běštaj jeho jako zhubjeneho přizjewiłoj, dokelž njebě so z hrajkanišća wróćił. Na to policisća z helikopterom za nim pytachu. Wječor přizjewi so sobudźěłaćer hotela, rěčo wo „jara młodym hosću“. Što je hólc w hotelu chcył, njewědźa.
To a tamne (01.09.22)
Njehańbity paduch je dobry skutk młodeje žony znjewužił: Jako 28lětna spyta wočiwidnje ćeknjeneho běłeho nukla w Bad Kreuznachu popadnyć, pokradny paduch jeje móšeń. Žona bě tobołu skrótka na chódnik stajiła, zo by zwěrjo popadnyła, policija zdźěla. Tutu składnosć paduch wuži a móšnju z pjenjezami a dokumentami pokradny. Tobołu wón preč ćisny. Nukla su mjeztym zwěrjatowni přepodali. Ta pyta nětko za wobsedźerjom – a policija za paduchom.
Chětro napity šofer nakładneho awta je pola Frankfurta nad Wódru do wopačneho směra na awtodróhu jěł. 48lětny na to spyta, so na awtodróze zawróćić, policija zdźěli. Zastojnicy dirigowachu jeho z awtodróhi na parkowanišćo. Tam zwěsćichu sylnu wóń alkohola a přewjedźechu test, kotryž wunjese 2,9 promilow. Muž dyrbi drje sej nětko nowe dźěło pytać.
To a tamne (31.08.22)
Chory pinguin w zwěrjencu w San Diegu w USA ma wotnětka ortopediske gumijowe črije. Štyri lět stary Lucas, zastupnik južnoafriskich pinguinow, ćerpi hižo dlěši čas zahorjenych nohow dla, zwěrjenc w južnej Kaliforniskej zdźěla. Prěnje wuslědki su wjele lubjace: Lucas móže zaso lěpje běhać a wo wjele lěpje stejo runowahu dźeržeć. Črije su wosebje polstrowane a maja bolosćam zadźěwać.
Młodostnej płuwarce w Sprjewi stej w Berlinje zasadźenje policije a wohnjoweje wobory zawiniłoj. Swědcy běchu holcy wokoło 21 hodź. w Friedrichshainje wuhladali a policiju informowali. Policisća płuwarce po někotrych diskusijach z wody wućahnychu. Płuwanje w Sprjewi w centrumje Berlina je zakazane. Jedna so wo zwjazkowu wodowu dróhu z tójšto nakładnymi a sportowymi łódźemi. Nimo toho je kwalita wody špatna.
To a tamne (30.08.22)
Swój dom wo 150 metrow přesunyć chce bur w Indiskej noweje awtodróhi dla. Nowu čaru chcedźa runje tam twarić, hdźež poměrnje nowy dwuposchodowy dom steji. Knježerstwo bě burej wotškódnjenje 100 000 eurow poskićiło. To pak by mjenje było, hač je muž před lětami za twar domu wudał. Mjeztym su dźěłaćerjo hrjebje wuzběhnyli a z hydrawliskej techniku dom wo něšto metrow přesunyli.
Kłok k pohłušenju wopicy je w Japanskej mylnje žonu trjechił. Žona bě měšćanske zarjadnistwo Tokioskeje susodneje prowincy Shizouka informowała, zo njedaloko dwórnišća wopica dunda. Na to přińdźe fachowc, zo by zwěrjo pohłušił a popadnył. Jako třělbu přihotowaše, njewotpohladnje třěli. Žona bu wot kłoka při ruce trjechena a so zwjeze, móžeše pak chorownju krótko na to zaso wopušćić. Nětko pad přepytuja.
To a tamne (29.08.22)
Ilegalnje natwarjenej sto metrow wulkej wysokodomaj rozbuchnyli su w Indiskej. Sudnistwo bě před lětom wotstronjenje wobeju domow přikazało, dokelž njebě priwatny twarski předewzaćel twarske předpisma dodźeržał. Nimo toho tehdy wukazachu, kupcow bydlenjow wotškódnić a tež sobudźěłaćerjow zarjadow chłostać, kiž běchu twarskim planam přizwolili. Za rozbuchnjenje nałožowachu 3 700 kilogramow rozbuchliny. Na akciji wobdźělichu so fachowcy z wjacorych krajow, rozprawjeja indiske medije.
W bydlenju susoda so spać lehnył je 21lětny w bayerskim Ichenhausenje. Wobydler wołaše policiju, dokelž bě „cuzeho muža w spanskej stwě“ wuhladał. Policija muža do swójskeho bydlenja přewodźeše. Kak bě wón do bydlenja přišoł njeje znate. Prawdźepodobnje njeběchu durje zamknjene, policija tuka.
To a tamne (26.08.22)
Wopačneje wjedroweje prognozy dla su nawodnicu madźarskeje wjedrarnje a jeje zastupnika pušćili. Medije tukaja na to, zo ma pušćenje něšto z wěšćenjom wjedrarnje činić, po kotrymž běchu tradicionalny wohnjostroj na dnju narodneho swjatka 20. awgusta wotprajili. Wjedrarnja bě do toho ćežke njewjedro nad stolicu Budapestom připowědźiła. Njewjedro pak njepřińdźe.
Wobmjezowanje spěšnosće planuja w Düsseldorfje – tola jenož za kolesowarjow. Tak chcedźa na Düsseldorfskej Schadowej tempo 10 km/h za kolesowarjow wukazać. Na woblubowanej nakupnej dróze běchu před lětami kolesowarsku šćežku zarjadowali. Ta pak njeje wot pasma pěškow ani twarsce ani optisce dźělena. Tuž přińdźe tam stanje zaso ke konfliktam mjez kolesowarjemi a pěškami. Kak chcedźa limit spěšnosće kontrolować, njeje jasne.
To a tamne (25.08.22)
Z policistami po całty šoł je dźewjećlětny w mecklenburgsko-předpomorskim Ueckermündźe. Pachoł chcyše njedźelu rano staršeju z čerstwymi całtami překwapić a so skradźu z bydlenja zminy. Hólc pěškej napadny, dokelž steješe samlutki před zawrjenej pjekarnju. Přiwołana policija pak móžeše pjerachej pomhać a jědźeše z nim k druhej pjekarni. Na to dowjezechu hólca z całtami k staršimaj.
Awtomat šokolody ze staplowakom přetřasł je 34lětny na Mnichowskim lětanišću, po tym zo bě šokoloda w nastroju tčacy wostała. Z njewšědnym postupowanjom měješe sobudźěłaćer wačokoweho wotrjada drje najprjedy raz wuspěch. Nětko pak žada sej lětanišćo narunanje nastateje škody při awtomaće.
To a tamne (24.08.22)
Klimowej aktiwistaj staj wčera jedyn z najwuznamnišich wobrazow galerije Starych mištrow w Drježdźanach za swójsku akciju znjewužiwałoj. Wonaj nalěpištaj po słowach rěčnicy skupiny „Poslednja generacija“ swoju ruku na ramik Raffaeloweje „Sixtinskeje madony“. Wuměłska twórba sama a historiski ramik wobškodźenej njejstej. Restawratorojo pak sej nětko wšitko dokładnje wobhladuja. Policija mjeztym wobkrući, zo su přepytowanja přećiwo aktiwistomaj zahajene.
Twochnjeny byk je so w Israelu do zarjadniskeho twarjenja banki zadobył a tam po chódbach ćěrił. Wobrazy kamery zawčerawšim pokazachu, kak so wulke zwěrjo po hładkim špundowanju suwaše a do sćěny zrazy. Rěčnica banki zdźěli, zo su byka skónčnje dosahnyli a z twarjenja w Lodźe pola Tel Aviva wotwjedli. Wjetšu wěcnu škodu w twarjenju zwěsćili njejsu.
