To a tamne (19.08.21)
Spěšnje ke kóncej bě dowolowa jězba z traktoromaj a připowěšakom za dweju 16lětneju w Allgäuju. Policija planowanu 18 hodźin trajacu jězbu z Kaufbeurena do Würzburga po někotrych kilometrach přetorhny. Młodostnaj měještaj drje jězbnu dowolnosć za traktory, z njej pak smědźa jenož ratarske a lěsniske dźěła wukonjeć, jimaj zastojnicy rozłožichu. Poprawom chcyštaj młodostnaj stanować.
Swojemu wobsedźerjej žiwjenje wuchowała je kóčka w francoskim Straßbourgu. Susodźa běchu policiju wołali, dokelž bě kóčka hižo tři dny sama na werandźe. Jako zastojnicy přez wotewrjene wokno do bydlenja zalězechu, wuhladachu wučerpaneho wobsedźerja na zemi ležo. Muž bě so zwjezł a njemóžeše sej hižo pomhać. Jeho dowjezechu do chorownje, kóčku do zwěrjatownje. Bjez lěkarskeje pomocy by muž drje zemrěł.
To a tamne (18.08.21)
W padźe k smjerći zasudźeneho alpaki Geronimo čerpaja w Jendźelskej zaso nadźiju. Britiske wobswětowe ministerstwo je rozmołwje z wobsedźerku přizwoliło. Do toho bě knježerstwo wotpokazało, wo wukazu zasparnjenja alpaki diskutować. Pola zwěrjeća běchu natykliwu howjadowu tuberkulozu zwěsćili. Mjeztym něhdźe 30 aktiwistow ratarski statok na zapadźe Jendźelskeje wobstražuje, zo bychu morjenju alpaki zadźěwali.
Žane zbožo njeměješe paduch w Berlinje, jako chcyše wobchod debjenkow w měšćanskim dźělu Wilhelmstadt wurubić. 44lětny bě do wobchoda přišoł a wobsedźerja a předawarku z trašawku wohrožował. 70lětnemu wobsedźerjej so poradźi, alarmowy knefl tłóčić, jako skućićel za debjenkami we witrinje hrabaše. Policisća jeho hišće we wobchodźe zajachu a 380 rubjenych wěcow zawěsćichu.
To a tamne (17.08.21)
Dale zjawnje prezentna wostanje Angela Merkel tež po zakónčenju swojeho kanclerskeho zastojnstwa – byrnjež jenož jako dohodowny kurjačk. Tole zdźěla zawod za ludowe wuměłstwo w rudnohórskim Seiffenje. Zhotowić chcedźa 14 centimetrow wulku postawu z typiskim dźerženjom rukow we wjacorych barbach. Spočatnje chcedźa 300 eksemplarow zhotowić, połojca z nich je hižo předata.
Zmužiće a rozsudźeni su ludźo na kupanskim brjoze w Španiskej pomhali, dweju wikowarjow z drogami zajeć. Kriminelnaj běštaj ze spěšnočołmom před policiju ćěkałoj a z wotmachom na pobrjóh zajěłoj, zo byštaj pěši ćeknyłoj. Daloko pak na brjoze pola městačka Melicena na juhu kraja njepřińdźeštaj: Wjace hač dźesać muži a žonow jednoho z jeju wobkruži a zaja. Druheho runje tak. W čołmje bě 800 kilogramow hašiša.
To a tamne (16.08.21)
„Najsylniši muž Němskeje“ pochadźa z Badensko-Württembergskeje. Dennis Kohlruss z badenskeho Rastatta je sej we wuchododurinskej Gerje požadany titul zdobył. 33lětny bě so wčera w finalu přesadźił. Cyłkownje 26 sportowcow z nimale wšitkich zwjazkowych krajow bě so dwaj dnjej wubědźowało. Při tym dyrbjachu mužojo před mnohimi přihladowarjemi mjez druhim nakładne awta ćahać.
Z přetwarjenym trawusyčakom je pod wliwom drogow stejacy muž po porynsko-pfalcskim Münchweileru jězdźił a so do policajskeje kontrole dóstał. Šofer, kiž njeměješe jězbnu dowolnosć, dyrbješe krej wotedać. Samotwarjene jězdźidło policisća sćazachu. Muž bě trawusyčakej třěchu, wokno, radijo a wótřerěčak přitwarił a spěšnosć manipulował. Hač by jězdźidło dowolnosć za nadróžny wobchad dóstało, je dwělomne.
To a tamne (13.08.21)
Z helikopterom k lodarni lećał je 34lětny w Kanadźe, zo by tam lodowu tortu kupił. Wón přizemi na wjele wužiwanym parkowanišću před wobchodom w městačku Tisdale w centralnej Kanadźe. Z helikoptera wulěze žona, kotraž poda so do lodarnje a tam tortu kupi. Dokelž njejednaše so wo nuzowe přizemjenje, dyrbi so 34lětny nětko před sudnistwom zamołwić, byrnjež licencu za mašinu měł.
Zabyteho handyja dla móžachu w Frankfurće nad Mohanom paducha awta zajeć. 26lětny sedźeše hižo we wozu, kotryž chcyše pokradnyć, jako jeho wobsedźer lepi a narěča. Na to paduch twochny. Jako wobsedźer z policiju telefonowaše, so paduch nawróći, dokelž bě swój mobilny telefon w awće ležo wostajił. Muž pak skućićela kruće dźeržeše, doniž policija njepřijědźe. Při sebi měješe wón spakosćenu žonjacu tobołku.
To a tamne (12.08.21)
Nowu złotu medalju dóstanje japanska olympiadnica Miu Goto, po tym zo bě měšćanosta jeje ródneho města Nagoya Takashi Kawamura při witanju sportowcow w radnicy města do medalje kusnył. To je organizaciski komitej rozsudźił. Goto bě měšćanosće swoju złotu medalju wokoło šije powěsnyła, na čož 72lětny trofeju do ruki wza a do njeje kusny. Wobrazy sceny zbudźichu rozhorjenosć. Kawamura je so mjeztym zamołwił.
Nuznikowy připowěšak za prominentnych su w Hornjej Frankskej pokradnyli. Něhdźe 40 000 eurow drohi připowěšak běchu na zarjadowanju mebloweho wobchoda w Kulmbachu wužiwali a po tym při dróze wotstajili. Jako chcychu jón nazajtra wotewzać, bě wón preč. Za transport tajkeho připowěšaka wšak je wjetše nakładne awto trěbne. Policija nětko za swědkami pyta.
To a tamne (11.08.21)
Kóčku z palaceho bydlenja wuchowała je wohnjowa wobora w Frankfurće nad Mohanom. Do toho bě w kuchni wjaceswójbneho domu woheń wudyrił. Wobydlerjo móžachu dom hišće wopušćić, jenož kóčka wosta w palacym bydlenju. 17lětna dźowka podarmo za njej pytaše a dyrbješe skónčnje bjez swojeje micki z bydlenja. Wohnjowa wobora ju skónčnje namaka. Dokelž bě so z kurom zajědojćiła, dósta wona samo kislikowu masku.
Zo by wutrajnosć baterije pruwował, je muž ze swojim e-scooterom po awtodróze A 2 jěł. Policija jeho zadźerža, po tym zo běchu jej to wjacori šoferojo přizjewili. Zastojnikam 24lětny rjekny, zo je elektriski roler dźeń do toho kupił a zo chcyše wědźeć, kak dołho aku dźerži. Zo njesmě na awtodróze scyła jězdźić, njebě jemu znate. Dokelž njeměješe předpisane zawěsćenje za roler, dyrbješe dale nóžkować.
To a tamne (10.08.21)
Samsny problem w mnohich nawigaciskich nastrojach wosobowych awtow zbudźa w Bayerskej zadźiwanje policije: Tež wčera běchu „nawije“ šoferow na awtodróze A 9 do směra na Mnichow w hornjobayerskim Allershausenje njetrjebawši z awtodróhi na wobjězdku wjedli, dokelž bě wobchad pječa haćeny. Tomu pak scyła tak njebě. Minjene dny běchu so tam tajke pady kopili.
Swojeho jědnaćelětneho syna na awtodróhowym parkowanišću zabył je 44lětny na awtodróze A 2 pola Bielefelda. Na přestawce bě pachoł awto skradźu wopušćił. Hakle po wjacorych kilometrach nan pytny, zo hólc w awće njesedźi, po tym zo bě so toho bratr za nim prašał. Mjeztym pak steješe nan sam w haćenym wobchadźe. Policisća „sćerpnje čakaceho“ na parkowanišću namakachu a jeho na policajskej straži nanej přepodachu.
To a tamne (09.08.21)
Za Günthera Jaucha wudawał je so 23lětny w ćahu w Schwabskej. Do toho bě so agresiwnje napřećo sobujěducym zadźeržał a so kontroli jězdźenki spjećował. Tež přiwołanym policistam napřećo wón agresiwnje wustupowaše a nochcyše jim wupokaz pokazać. Město toho twjerdźeše, zo rěka Güther Jauch. Zastojnicy dyrbjachu jeho sputać. Jeno z wulkej nuzu móžachu jeho identitu zwěsćić.
Z jejemi a piwom nadběhowali su ludźo čěskeho ministerskeho prezidenta Andreja Babiša při wólbnym bojowym wustupje w toho domizniskej wsy Pruhonice pola Prahi. Škitarjo wućeknychu sej z Babišom do bliskeje kofejownje. Babiš rjekny sćelakej CNN, zo běchu jeho přećiwnicy naprawow koronawirusa dla atakowali a na hłowje trjechili. W Čěskej wola za dwaj měsacaj nowy parlament. Babiš ma dobre wuhlady, wólby dobyć.
To a tamne (06.08.21)
Z internetnym přesadźowanjom swojeje baseballoweje čapki je pomocnik po zapławjenjach 48lětny Markus Wipperfürth wulki wothłós zbudźił. Mjeztym skića jemu wjace hač 133 000 eurow na platformje eBay za dotrjebanu staru čapku. Kaž rěčnik eBayja wobkrući, je poskitk seriozny. Pjenjezy chcedźa woporam wulkeje wody přewostajić. Ratar z kónčiny blisko Kölna hižo tydźenje w Porynsko-Pfalcy pomha a wo tym na Facebooku 400 000 ludźom rozprawja.
Njestrašna skulptura w formje ručneje granaty w kófrje je na lětanišću w Frankfurće nad Mohannom zasadźenje policije zawiniła. Lětadło njesmědźeše wotlećeć. Sobudźěłaćer wačokarnje bě spodźiwny předmjet pod roentgenowym nastrojom wuhladał. Fachowcy hakle zwěsćichu, zo jedna so wo wuměłsku skulpturu a zo z njeje žadyn strach njewuchadźa.
