Wolóženja za Ukrainu skónčene
Brüssel (dpa/SN). Europska unija je wikowanske lěpšiny na dobro Ukrainy skónčiła, z kotrymiž běchu wot Ruskeje nadpadnjeny kraj minjene tři lěta podpěrowali. Wotnětka płaća přechodne rjadowanja, doniž njejsu nowe wikowanske zrěčenje z Ukrainu wotzamknyli. EU bě po zahajenju ruskeho nadpada w lěće 2022 ukrainske wudźěłki wot cłow wuswobodźiła. Tak chcychu hospodarstwo kraja sylnić. Potrjechene běchu wosebje ratarske wudźěłki kaž pjerizna, jeja, cokor, wows, kukurica a měd.
Podpěra na dobro Ukrainy bě mjez ratarjemi hněw zbudźiła. Woni skoržachu na konkurencu přez tunje ratarske importy. Z městnami burja pomjezne přechody a składy tworow blokowachu.
Wadephul namołwja Israel
Škitne rumnosće za milion ludźi
Berlin (dpa/SN). Přiběracych konfliktow w Europje dla chce šef zwjazkoweho zarjada za škit ludnosće spěšnje wjace škitnych rumnosćow w Němskej zarjadować. „Nowe bunkry z wysokimi škitnymi narokami płaća wjele pjenjez, rjekny prezident zarjada Ralph Tiesler nowinarjam. „Trjebamy spěšne rozrisanje. Tuž chcemy tunle, dwórnišća podzemskich železnicow, hłuboke garaže a pincy zjawnych twarjenjow jako škitne rumnosće wužiwać. Wutworimy jara spěšnje milion městnow w tutych runosćach.“
Pozadk planowanja je starosć, zo móhła Ruska za něšto lět NATO nadpadnyć. „Wjele lět běchmy sej wěsći, zo njetrjeba so Němska na wójnu přihotować. To je nimo. Dyrbimy z wulkej wójnu ličić.“
Merz Trumpa do Němskeje přeprosył
Washington (dpa/SN). Zwjazkowy kancler Friedrich Merz (CDU) ma swój wopyt pola prezidenta USA Donalda Trumpa za dobry zakład planowaneho mjezynarodneho wjerškoweho zetkanja. „Nawróću so z dobrym začućom, zo mamy rozumny rozmołwny zakład mjez ameriskim prezidentom a němskim zwjazkowym kanclerom“, rjekny politikar CDU w sćelaku ZDF po wopyće w Běłym domje we Washingtonje. Hižo bórze chcetaj so wobaj na wjeršku G7 w Kanadźe a na wjeršku NATO w Den Haagu zaso widźeć.
Prezident Donald Trump je po słowach Merza přeprošenje na wopyt Němskeje přiwzał. „Pytamy za kmanym terminom“, rjekny Merz po rozmołwje w Běłym domje. „Smy jara wjele temow wobrěčeli. Wón zajimowaše so jara za Němsku, za swoju domiznu.“ Merz bě Trumpej kopiju historiskeho wopisma poroda toho dźěda Friedricha jako dar sobu přinjesł. Tón bě so 1869 w Kallstadtće w Pfalcy narodźił. Pozdźišo wupućowaše wón do USA a mjenowaše so Frederik. Kancler přepoda wopismo w złotym ramiku.
Župa počesći Njechorńskeho
Budyšin (KL/SN). Čłonojo župneho předsydstwa „Jan Arnošt Smoler“ Budyšin wuradźowachu wčera wo přichodnych zarjadowanjach. Na nastork županki Lenki Thomasoweje zarjaduja 13. junija wopomnjeće Měrćina Nowaka-Njechorńskeho při rowje w Hrodźišću. Dale chce župa „Jan Arnošt Smoler“ hromadźe z Domowinu přeprosyć wšitkich zajimcow składnostnje 125. posmjertnych narodnin Měrćina Nowaka-Njechorńskeho 1. julija 2025 do Serbskeho domu. Robert Lorenc ze Serbskeho instituta předstaji projekt inwentarizowanja namrěwstwa w ateljeju wuměłca. Pokazaja potom tež digitalne wodźenje po domje.
Na wuradźowanju wobdźěli so čłon župy w Zwjazkowym předsydstwje Domowiny, Jan Ryćer, zo by wužadanja a temy župneho předsydstwa zeznał.
Wot 13. do 15. junija 2025 wotměje so sympozij wo łužiskich powěsćach w Domje tysac hatow w Stróži. Towaršnosć Carl Gustav Jung a Budyska župa na njón přeprošujetej. Čłonojo dorozumichu so dale wo namjetach za Myto a čestne znamješko Domowiny, kotrež maja so do kónca junija zapodać.
Zbywacej dźělej mosta zwottorhaja
Wosebite rentyNDR přewzać
To a tamne (06.06.25)
We woknje swojeje kupjele tčacy wostał je muž w Nürnbergu. Hornje ćěło sahaše z wokna, brjuch bě hišće w kupjeli. Wohnjowa wobora muža wuchowa. Wobornicy wokno wutwarichu a muža z runje 21 centimetrow wulkeho wokna wuswobodźichu. Muž po swojich mocach pomhaše a brjuch „do so sćahny“. Čehodla bě muž z woknom zalězć chcył, njeje znate.
Na wšěch 124,7 kilometrow wróćo storkało je elektriske nakładne awto na motorowym wubědźowanišću w Oscherslebenje w Saksko-Anhaltskej. Jězba traješe šěsć hodźin a 22 mjeńšin při spěšnosći 20 km/h. Čara wobsahowaše 476 křiwicow. Za wodźidłom sedźeše oficěr zwjazkoweje wobory Marco Hellgrewe. Dotalny rekord z lěta 2020 wučinješe 89 kilometrow. Z akciju chcychu na elektrifikowanje wobchada, wěstotu na dróhach a połoženje šoferow skedźbnić.
Merz do Washingtona dolećał
Berlin (dpa/SN). Zwjazkowy kancler Friedrich Merz (CDU) je do Washingtona dolećał. Tam wočakuje jeho dźensa popołdnju prezident USA Donald Trump na nastupny wopyt. Planowany bě zhromadny wobjed a termin z nowinarjemi. Rěčeć chcetaj wobaj wo skónčenju wójny w Ukrainje, wo reakciji NATO na wohroženja a wo zwadźe mjez USA a EU cłow dla. Merz je připowědźił, zo nochcył so Trumpej jako prošer prezentować, ale jako sebjewědomy zastupnik Europy.
Putin a bamž telefonowałoj
Moskwa (dpa/SN). Ruski prezident Wladimir Putin a bamž Leo XIV. staj so w prěnim telefonaće za pohłubšenje poćahow mjez Moskwu a Vatikanom wuprajiłoj. Putin dźakowaše so bamžej za toho prócowanja na dobro humanitarneje pomocy w Ukrainje. Leo XIV. prošeše Putina wo měrowy signal, zo móhli so rozmołwy wo skónčenju wójny wuspěšnje dale wjesć. Putin šwikaše zakaz ruskeje prawosławneje cyrkwje w Ukrainje.
Wobmjezowanja wukazane
