Prěnich ze Sudana wuchowali
Luxemburg (dpa/SN). Po zahajenju ewakuowanja ze Sudana su po informacijach społnomócnjeneho EU za wonkowne naležnosće Josepa Borrella dotal wjace hač tysac wukrajnikow wuchowali. Borrell dźakowaše so dźensa na zetkanju wonkownych ministrow EU wšitkim krajam, kotrež su swojich krajanow, ale tež staćanow druhich krajow ze Sudana ewakuowali. W Sudanje běchu před dobrym tydźenjom razne wojowanja mjez mócnymaj generalomaj kraja a teju wojerskimi jednotkami wudyrili.
Rěča wo pomocy za Ukrainu
Luxemburg (dpa/SN). Wonkowni ministrojo čłonskich krajow EU su dźensa w Luxemburgu wo dalšej pomocy Ukrainje w boju přećiwo ruskim nadpadnikam wuradźowali. W srjedźišću stejachu wojerska podpěra a dalše sankcije přećiwo Ruskej. Nimo toho wuradźowachu wo geopolitiskich sćěhach ruskeje agresije. Wonkowna ministerka Annalena Baerbock (Zeleni) bě swoje wobdźělenje na konferency ewakuowanja němskich staćanow ze Sudana dla wotprajiła.
Zaso wjace pjenjez za brónje
Na juhu Mexika su so wčera tysacy migrantow do mócneje karawany ...
Dróhi w Berlinje blokowane byli
Witaja zakoń wo postajowanju
„Drohi, ale móžny kompromis“
Berlin (dpa/SN). Tarifowe dojednanje w zjawnej słužbje wunjese z wida komunalnych zwjazkow městam a gmejnam wulke wudawki, je pak najebać to zastupujomny kompromis. „Tarifowe dojednanje je městam wulke wužadanje w ćežkich časach“, rjekny hłowny jednaćel sejma městow Němskeje Helmut Dedy powěsćerni dpa. Je to pak zdobom zakład planowanja hač do kónca 2024 a móže pomhać, nuznje trěbnych fachowcow zdobyć. „Pod smužku je to městam drohi, ale runje hišće móžny kompromis.“
Tež hłowny jednaćel zwjazka městow a gmejnow Němskeje. Gerd Landsberg, steji za kompromisom. „Je to dobre wotwažowanje mjez woprawnjenymi zajimami přistajenych a zajimami komunalnych dźěłodawarjow na tamnym boku.“
Tarifowi partnerojo zwjazka, komunow a dźěłarnistwow běchu so wčera wječor po měsacy trajacych rozestajenjach na to dojednali, poručenja změrcow w zasadnych prašenjach přewzać. Čłonojo dźěłarnistwow dyrbja wuslědkej jednanjow hišće přihłosować.
Dale a wjace wobchodow mrěje
Zwjazk wikowarjow žada sej iniciatiwy na dobro měšćanskich centrow
Berlin (dpa/SN). Zawrjene durje wobchodow, zalěpjene wukładne wokna a wotšrubowana swětłowa reklama. W dale a wjace nakupowanskich dróhach Němskeje zawostaja mrěće wobchodow njepřewidźomne slědy. Tež wuhlady su skerje pochmurjene. Jeničce w tutym lěće drje po informacijach wikowanskeho zwjazka HDE něhdźe 9 000 wobchodow předawać přestanje. Často tohodla, dokelž njeje dalewjedźenje wobchoda woteběraceje nakupneje mocy ludźi a přiběracych kóštow dla hižo wjace atraktiwne. Z tym zwostanje po wšej Němskej hišće něhdźe 311 000 wobchodow, lěta 2015 bě jich hišće nimale 373 000. „Hladajo na ličby minjenych lět a wuwiće w nutřkownych městach dyrbjeli mjez politikarjemi wšitke alarmowe zwony zwonić. Bjez wuspěšneho drobneho wikowanja maja centrumy městow lědma perspektiwy do přichoda“, warnowaše prezident HDE Alexander von Preen. „Zahinje-li wikowanje, zahinje město.“
Awtonomija w srjedźišću diskusije
Lědy (SN). Serbski sejm je so 22. apryla 2023 w gmejnskim centrumje na Lědach schadźował. W tradicionelnje prěnim dźělu plenuma, rozmołwje z wotpowědnymi wobydlerjemi a hosćimi sejma jako „pućowanski parlament“ bu zaso jasne, kak rozdźělne wuměnjenja a wužadanja za serbsku rěč, kulturu a identitu w regionach Łužicy su. Jara wobohaćace běchu přinoški a perspektiwy dweju młodeju wuměłcow kolektiwa Wakuum. Wonaj wobkrućištaj Serbskemu sejmej, zo je tež z wida młodźiny kulturna a kubłanska awtonomija hódny zaměr, zo by sam postajał a z wjeselom a radosću wuspěšnje přichod našeho ludu wuhotował. Nimo toho je so wobrěčało, kak móže serbska młodźina swój wažny hłós do politiskeho tworjenja měnjenja a rozsuda přinošować, na přikład w naćisku statneho zrěčenja a jako kandidatka a kandidat za přichodne wólby sejma.
To a tamne (24.04.23)
Hrajkace zwěrjo je minjeny kónc tydźenja w Lübeckskim zaliwje tójšto kedźbnosće zbudźiło. Pječa bě to delfin. Jara aktiwne zwěrjo skakaše sobotu a njedźelu stajnje zaso z wody a so na to zaso w Baltiskim morju zminy, wodoškitna policija zdźěli. Samo nowiny wo wopyće delfina rozprawjachu. Naposledk běchu 2018 delfiny w Lübeckskim zaliwje wobkedźbowali. Wosebite škitne naprawy na dobro delfina policija njeplanuje: „Zwěrjo płuwa tak a tak, dokal runje chce.“
Snadnje zdrasćeny muž z wulkim hadom wokoło šije je wčera w porynsko-pfalcskim Bitburgu zasadźenje policije zawinował. Swědcy běchu zastojnikow informowali, po tym zo běchu pěška z hadom wuhladali. Policisća móžachu ludźi změrować: Muž chcyše swojemu domjacemu hadej čerstwy powětr popřeć: běło-žołty pyton je njestrašny a legalny.
Na stawk přihotowani byli
Berlin (dpa/SN). Ludźo Němskeje su so dosć derje na stawk železnicarjow nastajili. Tole zdźěla němska železnica. „Dwórnišća su nimale prózdne“, zdźěli rěčnik předewzaća. Hač do 11 hodź. běchu přistajeni po iniciatiwje dźěłarnistwa železnicarjow EVG do stawka namołwjeni. Tež na lětanišćach dóńdźe k warnowanskim stawkam. W běhu dnja z tym ličachu, zo so połoženje zaso normalizuje. Wuskutki pak su drje hač do wječora čujomne.
Liberalni wuradźuja na zjězdźe
Berlin (dpa/SN). FDP chce wot dźensa wječora na zwjazkowym zjězdźe w Berlinje swój dalši kurs w amplowej koaliciji postajić. K tomu wočakowachu rozprawu předsydy Christiana Lindnera. Powšitkownje z tym liča, zo wupraja delegaća Lindnerej dalšu dowěru, hladajo na to, zo so strona na wjacore wólby krajnych sejmow hotuje, kaž w Bremenje a Bayerskej. W Hessenskej maja najlěpše wuhlady, druhdźe jim hrozy, w přichodźe w parlamenće hižo zastupjeni njebyć.
Sejm: Pandemija a dźěći
