Je prawje, zo chce zwjazkowa nutřkowna ministerka Nancy Faeser brónjowe prawo přiwótřić. Stajnje zaso wšak w powěsćach wo nadpadach z brónjemi tež w Němskej zhonimy. Prawdźepodobnje je wjele móžnosćow sej bróń wobstarać. Strašna je situacija, jelizo so krizy wujewjeja. Wjele ludźi je potom njespokojne a chce tole tež někak zwuraznić. Za někotrych je namóc móžnosć, na njespokojnosć pokazać. Kaž ze statistiki towaršnosće za kriminalistiku, prawo a justicu wuchadźa, registrowachu zarjady w Němskej nimale 8 000 njeskutkow w zwisku z brónjemi. Tole je mjenje hač minjene lěta, ale wězo přewjele. Bróń wobsedźeć dyrbi wuwzaće wostać. Čim krućišo so to kontroluje, ćim lěpje! W USA je dawno z wašnjom, zo so wosoby z brónju do šulow, běrowow, kina abo uniwer­sity zadobywaja a ze swojeje hidy ludźi ­zatřěleja. Tajke situacije w Němskej do­žiwić nochcemy, a tuž měła wěstota ­wobydlerjow za politikarjow na prěnim městnje stać. Bianka Šeferowa

Berlin (dpa/SN). Zwjazkowa nutřkowna ministerka Nancy Faeser (SPD) chce brónjowe prawo w Němskej přiwótřić. Racija w scenje reichsbyrgarjow minjeny tydźeń je dopokazała, zo je jednanje trěbne. Wčera je Faeser w aktualnej hodźinje zwjazkoweho sejma změny připowědźiła. Tole zapósłancy FDP kritizowachu. Tuchwilne brónjowe prawo je tak rjadowane, zo njemóža sej reichsbyrgarjo cyle prosće wobstarać. Hessenski nutřkowny minister Peter Beutch (CDU) ma stejišćo FDP za njeakceptabelne. Amplowa koalicija njeje sej přezjedna, štož zhromadnemu dźěłu njetyje. Prěnjotnje maja ­zapó­słancy wěstotu wobydlerjow w kraju zaručeć.

Gütersloh/Münster (dpa/SN). Dale a wjac ludźi z katolskeje a ewangelskeje cyrkwje wustupuje. Po naprašowanju ­tuchwilu samo wjele dalšich wo tym ­rozmysluje, kaž wuchadźa z dźensa wozjewjeneho nabožneho monitora Bertelsmannoweje załožby. Institut Infas ­je so za to 4 363 wosobow w starobje wot 16 lět po cyłym Zwjazku napra­šował.

Jenož 14 procentow ludnosće jónu wob měsac Božu słužbu wopyta. Hladajo pak na sobustawow cyrkwje je to 17 procentow. Mjez sobustawami je so nimale kóždy štwórty (24 procentow) minjenych 12 měsacach z myslu nosył, z cyrkwje wustupić. Na prašenje, hač prawdźepo­dobnje ­cyrkej wopušći, wotmołwi 20 procentow z „haj“.

„Skandale a wustupowanje cyrkwje kołowo­koło znjewužiwanja dźěći je zawinowało, zo ludźo katolskej cyrkwi hižo tak njedowěrjeja“, wuswětli fachowča za nabožinu Bertelsmannoweje załožby ­Yasemin ­El-Menouar. „Cyrkej nima hižo tajki wu­znam. Tola křesćanstwo a křesćanska wěra so zachowatej“, je sej ­fachowča ­wěsta.

CDU, Zeleni, SPD a Lěwica w sejmje „haj“ za namjet AfD zasudźeja

Budyšin/Drježdźany (SN). Přihłosowanje wjetšiny frakcije CDU w Budyskim wokrjesnym sejmiku namjetej AfD dale a wjac kritiki na wšěch runinach budźi. Parlamentariski jednaćel CDU w Sakskim krajnym sejmje, Sören Voigt, wobkrući kritiku generalneho sekretara sakskeje unije Alexandera Dierksa a jeho zwěsćenje, zo njesmě zhromadneho dźěła z AfD być. Frakcija AfD bě póndźelu wječor namjet do sejmika zapodała, ćěkancam bjez kruteho prawa na pobyt w Němskej wokrjesne naprawy integracije šmórnyć. Tomu je tež předsyda Domowiny, Dawid Statnik, jako radźićel CDU přihłosował. Wobsah směrnicow je na přikład koordinowanje rěčnych kursow abo integracija do kubłanja resp. dźěłowych wikow. Pola mnohich nětko potrjechenych humanitarne aspekty wotsunjenju zadźěwaja. Sakske Nowiny Statnika citowachu, zo móhł wuslědk předźěłanja směrnicow samo być, zo budźe na kóncu wjac naprawow integracije.