London (dpa/SN). Ruska wužiwa we wójnje přećiwo Ukrainje po posudku britiskich fachowcow masiwnje desinformaciju a wopačne powěsće. „Wot spočatka swojeje dospołneje inwazije w Ukrainje je ruski stat systematisce informaciske operacije jako hłowny element swojeje strategije zasadźił“, zdźěla zakitowanske ministerstwo dźensa w Londonje, powołujo so na informacije tajnych słužbow. Při tym wopačne abo manipulowane informacije wotpohladnje produkuja a dale dawaja. Wažny zaměr je, ukrainske knježerstwo wočornić a mjezynarodnu pomoc na dobro Ukrainy zesłabić.

Wusahowacy wobstatk tuteje strategije su „blady“. Při tym rozšěrja Ruska zaměrnje informacije z njeznatych žórłow, kotrež tak swój puć do oficialnych ruskich medijow namakaja. „Na tute wašnje žórło informacijow zatajeja, štož ­Ruskej zmóžnja, so oficialnje wot powěsćow distancować“, w Londonje rjeknu.

Britiske zakitowanske ministerstwo wozjewja wot spočatka wójny Ruskeje přećiwo Ukrainje powěsće tajnych słužbow. Moskwa wumjetuje Londonej zaměrnu kampanju desinformacije.

Chětro sylnje wonjacy durian – z Aziskeje pochadźacy płód – je w Mnichowje zasadźenje wohnjoweje wobory zawinował. Pomocnikow běchu wołali, dokelž w běrowowym a nakupowanskim kompleksu za płunom wonješe. Před płunom warnowace nastroje njereagowachu. Na­jebać to pomocnicy dom přeslědźichu a skónčnje sylnje wonjacy płód nama­kachu. Tón drje bě alarm zawinował.

Pozdatna ručna granata je na Hannoverskim hłownym dwórnišću chaos zawinowała. Sobujěduca bě policiju informowała, zo je žona granatu mjez sedłami połožiła a ćah wopušćiła. Policija je na to nastupnišća ewakuowała a dźěl hłowneho dwórnišća zaraćiła. Fachowcy za znješkódnjenje municije „granatu“ skónčnje namakachu: Jednaše so wo bateriju za nabiwanje elektriskich nastrojow, tak mjenowanu powerbank.

Jeje plan, njewobsadźene městna wu­čerjow za wjac socialnych dźěłaćerjow a šulskich asistentow wužić, je frakcija SPD wotpokazała. Tohodla je braniborska kubłanska ministerka Britta Ernst (SPD) wotstupiła.

Podstupim (SN/mb). To běše nahły wotstup nawodnicy najwažnišeho krajneho ministerstwa pod njewšědnymi wobstejnosćemi: Britta Ernst, wot 2017 na čole ministerstwa za kubłanje, młodźinu a sport, ani spytała njeje priwatnu přičinu resp. wurěč naspomnić, kotruž móžeš jako 62lětna ženjena žona zjawnosći sposrědkować. Ale „wjac chwile za muža měć“, zwjazkoweho kanclera Olafa Scholza (SPD), njeby najskerje wjele pomhało. Zo jeje naslědnik Steffen Freiberg, dotalny statny sekretar samsneho ministerstwa, wo dźěławosći swojeje dotalneje šefowki praji, zo „su wěcy ležo wostali“, wosebje za čas pandemije, njeklinči kaž zwučena politiska diplomatija.

Luxemburg (dpa/SN). Wjacore wobswětoškitne organizacije skorža přećiwo zastopnjowanju płuna a atomoweje technologije ze stron EU jako klimje přichilene. Greenpeace, Zwjazk za wobswět a přirodoškit a organizacija WWF su zhromadnje z druhimi organizacijemi skóržbu přećiwo tak mjenowanej taksonomiji zapodali. Z njej zastopnjuje EU klimje přichilene energijowe wobłuki, do kotrychž so inwesticije wupłaća, mjez druhim zemski płun a atomowu móc.

Macron reformu zakitował

Paris (dpa/SN). Francoski prezident Emmanuel Macron je w telewizijnej narěči swoju wjele diskutowanu rentowu reformu zakitował. K zběhnjenju rentoweje staroby wot 62 na 64 lět njeje žaneje alternatiwy, rjekny Macron wčera wječor. Hewak bychu přinoški zwyšić abo niwow renty znižić dyrbjeli. Hladajo na protesty ludnosće Macron přilubi, zo chcył so dźěłarnistwam a dźěławym přiwobroćić a z nimi wo rozrisanju towaršnostnych problemow rěčeć. Za čas narěče ludźo na dróhach kraja protestowachu.

Znjewužiwanje přeslědźili