Drježdźany (dpa/SN). Dokelž medikamenty pobrachuja, su sakscy prezidenća lěkarskeje komory, zubnolěkarskeje komory kaž tež komory apotekarjow saksku strowotnisku ministerku Petra Köpping (SPD) k spěšnemu jednanju namołwjeli. Tuchwilu hrozy wulki strach, zo njemóže strowotniski wobłuk zastaranje ludźi garantować, prezidenća komorow wčera w zhromadnym wozjewjenju zdźělichu. Postajenja strowotniskeje politiki njehodźa so w realiće zwoprawdźić.

Zelenyskyj we Washingtonje

Washington (dpa/SN). Ukrainski prezident Wolodymyr Zelenskyj je so na krótki wopyt do USA podał. To je jeho prěnja ­jězba do wukraja wot spočatka ruskeje ­wójny před nimale dźesać měsacami. Hłowna tema su dalše dodawanja brónjow. Zaměr je skrućenje stability a woboro­kmanosće swojeho kraja, pisaše wón dźensa rano na Twitteru. Wječor zetka so wón z prezidentom USA Joewom Bidenom.

Plahuja dale a mjenje swini

Osnabrück (dpa/SN). Prezident Zwjaz­koweje lěkarskeje komory je so za trajny zakaz praskotakow wuprajił. „Njerjadowane praskotanje je hubjene za wobswět a klimu a wjedźe přeco zaso k ćežkim zranjenjam“, Klaus Reinhardt tele dny wuzběhny. Předewšěm dźěći, młodostni a młodźi dorosćeni pod 25 lětami so zranja. „To woznamjenja sylne přidatne poćežowanje za sobudźěłaćerki a sobudźěłaćerjow w chorownjach, kotřiž tak a tak hižo na hranicy swojich mocow dźěłaja“, Reinhardt rozłoži. Minjenej lěće bě za­kazane w Němskej praskotaki předawać. A tež priwatne wohnjostroje běchu jenož we wěstych kónčinach dowolene. Pozadk toho běchu wućežene chorownje za čas koronapandemije. Lětsa tajkich wobmjezowanjow njeje.

Reinhardt přeješe sej tež hladajo na połoženje na swěće, so praskotakow wzdać. Tak njeměli z raketami nowe lěto witać, hdyž je w samsnym času wójna w Europje. „Pola mnohich ćěkancow z wójnskich kónčin silwesterske praskotanje hubjene začuća wuwabja. Město ­toho zo ludźo pjenjezy za praskotaki ­wudawaja, měli je radšo za něšto zmysłapołne wužiwać a je darić.“

Waršawa/Berlin (dpa/SN). Zarjadniske sudnistwo we Waršawje je dowolnosć za wutwar Wódry pólskeho wobswětoweho zarjada nachwilnje cofnyło a twarske dźěła zadźeržało. Tole su minjeny tydźeń postajili, zdźěli wčera rěčnik wojewódskeho zarjadniskeho sudnistwa we Waršawje powěsćerni dpa. Sudnistwo njewuzamkuje, zo dóńdźe k škodam za wobswět. Doskónčnje sudnistwo we hłownym jednanju rozsudźi. Skoržili běchu wobswětowe organizacije Němski přirodoškitny kruh (DNR), přirodoškitny zwjazk Nabu a Zwjazk za wobswět a přirodoškit Němskeje (BUND). Po wobswětowej katastrofje we Wódrje maja so mjezy přesahowace wuskutki twarskich naprawow na škitane družiny zwěrjatow a rostlinow a žiwjenske rumy bóle wobkedźbować.

Kijew (dpa/SN). Po informacijach ukrainskich medijow je Ruska znowa jednotki wójska na hranicu mjez Běłoruskej a Ukrainu přepołožiła. Tak su nimo pancerow a transporterow tež najwšelakoriše wojerske nastroje blisko hranicy dowjezli, rozprawještej wčera nowina „Ukrajinska prawda“ a agentura Unian powołujo so na běłoruski kolektiw hackerow „Hajun Project“. Wosebita skupina kompjuterowych fachowcow sćěhuje wšitke akcije tam zaměstnjenych ruskich jednotkow.

Wobkedźbowarjo wuchadźeja z toho, zo jedna so pak wo přeměstnjenje ruskich jednotkow ze sewjerneje a srjedźneje Běłoruskeje abo wo krótkodobne přepołoženje k zhromadnym manewram z běłoruskim wójskom na ukrainskej mjezy. Za dalše nadpady pak njejsu na hranicu přepołožene zwjazki tuchwilu sylne dosć, fachowcy měnja.