Biskop Bätzing za wobšěrne reformy
Bad Staffelstein (dpa/SN). Předsyda Němskeje biskopskeje konferency Georg Bätzing žada sej wobšěrne reformy w katolskej cyrkwi, dokelž so wěriwi „w syłach“ wot njeje wotwobroćeja. „Snano chce nas Bóh tón Knjez z tuchwilnej hłubokej krizu k tomu pohnuć, zo so hižo nad druhimi njepozběhujemy, ale so zawróćimy“, rjekny Limburgski biskop na wčerawšej zahajacej Božej mši nalětnjeje hłowneje zhromadźizny biskopskeje konferency w putniskej cyrkwi Vierzehnheiligen pola Bad Staffelsteina.
Tuchwilu „knježa časy, w kotrychž skići wobraz cyrkwje wšu přičinu ke skóržbje, hdyž so ludźo hańbuja, katolskej cyrkwi přisłušeć“, Bätzing zwurazni. Katolska cyrkej tči skandala znjewužiwanja dla we hłubokej krizy. Dale a wjace ludźi ju wopušća, wosebje w Bayerskej po njedawnym wozjewjenju posudka.
Změnić chcedźa biskopja dźěłowe prawo w katolskej cyrkwi, zo bychu diskriminaciju homoseksualnych sobudźěłaćerjow skónčili. Dotal hrozy tajkim sobudźěłaćerjam wupowědźenje.
Jednaja dale wo přiměrje
Rusku namołwjena wójnu skónčić – Putin šwika „prowokacije“
Kijew/Moskwa (dpa/SN). Najebać dale trajace nadpady Ruskeje na Ukrainje diplomatiske prócowanja wo skónčenje nimale dwaj tydźenjej trajaceje wójny dale traja. Po nowych jednanjach stej so Ruska a Ukraina wčera na to dojednałoj, nowe koridory za ćěkancow w krizowych kónčinach zarjadować. USA, Němska, Francoska a Wulka Britaniska žadaja sej wot Ruskeje, zo swojich wojakow hnydom cofnje. Zajutřišim, štwórtk, chcetaj so po turkowskich a ruskich informacijach wonkownaj ministraj Ukrainy a Ruskeje w turkowskej Antalyji zetkać. Třeće zetkanje zastupnikow Kijewa a Moskwy traješe něhdźe tři hodźiny.
To a tamne (08.03.22)
Namócne rozestajenje połneje pjelchi dla měješe dźensa swoje pokročowanje na Düsseldorfskim hamtskim sudnistwje. Wobskorženy bě 42lětny nan ranjenja ćěła dla. Wón bě swoje dźěćo na Düsseldorfskej Kralowskej aleji pjelchował a na to połnu pjelchu do hrjebje znateje promenady ćisnył. Jako jeho žona narěča a přesćěhaše, dokelž bě so jej wuwinył, da so z pjasću do njeje a dalšich pěškow, kotřiž z nim pjelchi dla rozrěčowachu.
Ćeńka lajna za šaty mjez awtom a transporterom je kedźbnosć policije zbudźiła a wopiteho šofera přeradźiła. 46lětny wodźer transportera bě na awtodróze A 11 mjez Berlinom a Szczecinom šofera małeho awta prosył jeho do Pólskeje wotwlec, dokelž bě jemu bencin wušoł. Njewšědny zapřah policiji napadny. Při kontroli so wukopa, zo nima muž žanu jězbnu dowolnosć a zo pólska policija za nim pyta. Test alkohola wunjese 1,5 promilow.
Ruske pósłanstwo wopytał
Vatikan (B/SN) Bamž Franciskus je tydźeja njewočakowano ruske pósłanstwo při Swjatym stole wopytał. W połhodźinskej rozmołwje z pósłancom Aleksanderom Awdejewom zwurazni wón swoju starosć naškaranu wójnu přećiwo Ukrainje nastupajo a prošeše Rusku, ukrainskich wobydlerjow přelutować. Njejasne dotal je, hač je bamž tež ukrainske pósłanstwo wopytał. Hłowa katolskeje cyrkwje postaji lětušu popjelnu srjedu jako póstny a modlerski dźeń za Ukrainu.
Starosći so wo ukrainski lud
Köln (B/SN). Pjetro Bokanow přebywaše jako ortodoksny měšnik a wojerski dušepastyr wjacore razy na wuchodnej Ukrainje, hdźež su hižo wot lěta 2014 konflikty. Nětko pak, hdyž su ruske jednotki do Ukrainy zaćahnyli, je so tam połoženje dramatisce přiwótřiło. Bokanow zastaruje w Němskej dwě wosadźe: w Frankfurće nad Mohanom a Mannheimje. Wosadni maja přiwuznych na Ukrainje a so jara wo nich starosća. Wot lěta 2015 stara so duchowny tež wo pacientow w zwjazkowej wojerskej chorowni w Koblenzu. „Na fronće njejsu žani ateisća. Kóždy starosći so wo swoje žiwjenje a jeho zmysł“, wón měni.
Ruska na sudnistwo njepřińdźe
Den Haag (dpa/SN). Ruska so na słyšenju Mjezynarodneho sudnistwa nastupajo skóržbu Ukrainy ludomordarstwa dla njewobdźěli. To je ruski wulkopósłanc w Nižozemskej sudnistwu zdźělił, kaž předsydka sudnistwa Joan Donoghue dźensa w Den Haagu informowaše. Ukraina bě najwyšemu sudnistwu UNO skóržbu přećiwo Ruskej zapodała. Kraj žada sej hnydomne naprawy, namóc skónčić. Ukraina wobskorži susodny kraj ranjenja konwencije ludomordarstwa z lěta 1948 dla.
Rozprawnistwo přetorhnjene
Köln/Mainz (dpa/SN). Sćelakaj ARD a ZDF stej rozprawnistwo z Moskowskeho studija najprjedy raz přetorhnyłoj. Wonej reagujetej tak na změnu zakonja, kotryž bě ruski parlament minjeny pjatk schwalił. Z nim hroža žurnalistam hač do 15 lět jastwa abo wysoke pjenježne pokuty, hdyž „wopačne informacije wo ruskim wójsku šěrja“. Tež dalše medije, kaž rozhłosowe sćelaki, z Ruskeje wjace njerozprawjeja. Zwjazk žurnalistow Němskeje je wšitkich sobudźěłaćerjow medijow namołwjał, kraj wopušćić.
Miliardy eurow za škit klimy
Tež w Ruskej su ludźo wčera zaso přećiwo wójnje na Ukrainje ...
Zastaranje ludźi spěšnje zrjadować
Berlin (dpa/SN). Zwjazk městow Němskeje žada sej spěšne rozsudy, kak zastaranje ćěkancow z Ukrainy organizować a zapłaćić. „Města Němskeje su za to, ludźom přistup k zakładnemu zawěsćenju po socialnym zakoniku II zmóžnić“, rjekny hłowny jednaćel zwjazka Helmut Dedy powěsćerni dpa. „Tak by wjele prašenjow nastupajo socialne zawěsćenje a zakładne zastaranje rozrisanych było.“ Kóšty zakładneho zawěsćenja přewozmje z najwjetšeho dźěla zwjazkowa republika. Tež kubłanje dźěći w šulach měli organizować, sej Dedy žada.
Po nadpadźe Ruskeje na Ukrainu přichadźeja wšědnje tysacy ćěkancow z krizoweje kónčiny do Němskeje. Kraje EU su sej přezjedne, ludźom spěšnje a njekomplikowanje prawo přebytka hač do třoch lět kaž tež přistup k dźěłowym wikam a socialnym wukonam zmóžnić. To chcedźa nětko krok po kroku zwoprawdźeć.
Za dalšu pomoc
Berlin (dpa/SN). Němske zwjazkowe knježerstwo pruwuje, kak móhło wot Ruskeje nadpadnjenej Ukrainje z dalšimi brónjemi pomhać. „Wšo, štož je móžno, tuchwilu pruwujemy“, rjekny zakitowanska ministerka Christine Lambrecht (SPD) dźensa w rańšim magacinje telewizije ZDF. „Dyrbi pak tež jasne być, zo njesměmy Zwjazkowu woboru wosłabić. Mamy nadawk, zakitowanje kraja kaž tež nadawki we wobłuku NATO zaručić.“
Christine Lambrecht zdobom potwjerdźi, zo njeńdźe při wurjadnym etaće sto miliardow eurow za Zwjazkowu woboru wo brónjenje, ale wo lěpše techniske wuhotowanje wojakow.
Bamž žada sej kónc nadpadow
Rom/Bad Staffelstein (dpa/SN). Bamž Franciskus je sej kónc wójny na Ukrainje žadał. „Dźakuju so wšěm, kotřiž ćěkancow hospoduja, a nutrnje wosebje wo to prošu, zo wobrónjene nadpady přestanu a zo jednanja a strowy čłowječi rozum dobudu“, rjekny 85lětny nawoda katolskeje cyrkwje wčera wěriwym na Pětrowym naměsće w Romje. Někotři mějachu ukrainske chorhoje sobu. „To njeje wojerska operacija, to je wójna, kotraž přinjese smjerć, zničenje a horjo“, bamž skoržeše.
Katolscy biskopja Němskeje schadźuja so wot dźensnišeho na swojej kóždolětnej nalětnjej hłownej zhromadźiznje. Dwě temje štyri dny trajace zetkanje postajatej: wójna na Ukrainje a žadanja za nutřkocyrkwinskimi reformami. Na zahajenskej Božej mši dźensa wječor w putniskej katedrali Vierzehnheiligen w hornjej Frankskej chcychu so wo měr na Ukrainje a po wšej Europje modlić. K wuradźowanju wo połoženju na Ukrainje přeprosychu sej mjez druhim Andrija Waskowycza, bywšeho nawodu ukrainskeje Carity.
Dalši pospyt ewakuacije
Wojowanja na Ukrainje traja – humanitarne połoženje dźeń a špatniše
Kijew (dpa/SN). Dwanaty dźeń po zahajenju ruskeje inwazije na Ukrainje so połoženje statysacow ludźi w nadpadnjenych městach dale pohubjeńša. Knježerstwo kraja jich namołwja, města ručež móžno wopušćić. Nadpady a wojowanja tež minjenu nóc dale trajachu.
Němska wuwićowa ministerka Svenja Schulze je Ukrainje dalšu humanitarnu pomoc poskićiła. Prěnje hnydomne posyłki su kraj mjeztym docpěli, dalše maja slědować, rjekny politikarka SPD nowinarjam. Jeje ministerstwo koncentruje so tuchwilu na to, zaměstnić a zastarać ćěkancow, kotřiž su do Němskeje dóšli. „Na Ukrainje hrozy wulka humanitarna katastrofa. Wójna Ruskeje přinjese njepředstajomne horjo žonam, mužam a dźěćom“, ministerka zwurazni.
