„W lěsu mortwi leža“
Połoženje ćěkancow na pólsko-běłoruskej hranicy dźeń a hrózbniše
Waršawa. Pólsko-běłorusku mjezu hižo cyły čas jara kruće před nawalom ćěkancow škitaja. Wot awgusta je ju dotal wjac hač 10 000 ludźi přewinyć spytało – Irakčenjo, Afghanjenjo a Syričenjo. 418 kilometrow dołhu hranicu k Běłoruskej 2 500 wojakow kontroluje. Po cyłym pasmje knježi wuwzaćny staw. Kaž rěčnica namjezneho škita tele dny praješe, ma 20 procentow zadźeržanych zwiski k teroristam a su seksualnje perwersni. Dopokazy za to prezentowaštaj wěstotny minister Mariusz Błaszczak a nutřkowny minister Mariusz Kamiński na njedawnej nowinarskej konferency, kotruž su statne medije wusyłali. Na wulkich wobrazowkach pokazowachu ludźi z brónjemi a splažny wobchad z domjacym skotom. Fota běchu pječa na sćazanych smartfonach migrantow našli. Njewotwisne medije maja tele posrědkowanje wobrazow za pospyt, ćěkancam čłowjesku dostojnosć wzać. Wone běchu zhonili, zo su to stare fota z internetnych pornografiskich syćow, potajkim inscenowane.
To a tamne (08.10.21)
Dokelž je so na swojej facebookowej stronje naduwał, zo bě z koronawirusom inficěrowaneho pohonjał twory w kupnicy wotlizać, dyrbi Texačan 15 měsacow do jastwa a ma nimo toho 1 000 dolarow pokuty płaćić. Sudnistwo pochłosta 40lětneho wopačnych informacijow w zwisku z biologiskimi brónjemi dla. Kaž policija pisa, chcyše 40lětny z akciju tomu zadźěwać, zo so ludźo na zjawnych městnach schadźuja, dokelž je wirus strašny. Kaž so wukopa, njeběchu wuprajenja muža na Facebooku wěrne.
Astrologojo steja před wulkim hódančkom. Wčera wječor běchu ludźo w Badensko-Württembergskej a Porynsko-Pfalcskej w interneće wo wulkej wohniwej, spěšnje pohibowacej so kuli na njebju rozprawjeli. Hač so wo kosmiski objekt jedna, chcedźa nětko přepytować.
Pro a kontra k rozšěrjenju wustawy
Kraj Braniborska chce swoju wustawu wobnowić a wo někotre dypki rozšěrić. Namjety k tomu su wčera na zjawnym słyšenju rozjimali.
Podstupim (SN/JaW). Namjety k změnje a wudospołnjenju wustawy Braniborskeje stejachu wčera w srjedźišću zjawneho słyšenja hłowneho wuběrka tamnišeho krajneho sejma.
Hłownje rozjimanej ćežišći běštej, braniborsku wustawu z konkretnymi formulacijemi přećiwo rasizmej a antisemitizmej wudospołnić, a hač měli škit dalšich mjeńšin a regionalnych rěčow w njej zakótwić – Serbja su přez artikl 25 škitani, Sintojo a Romojo kaž tež škit delnjoněmčiny tam dotal njejsu mjenowani.
Prezencnu wučbu dale zaručić
Berlin/Podstupim (dpa/SN). Kultusowi ministrojo zwjazkowych krajow wuradźuja dźensa a jutře mjez druhim wo połoženju na šulach koronapandemije dla. Zhromadne wobzamknjenja njejsu žane předwidźane, wšako kraje same rozsudźeja a situaciju jednotliwje posudźuja. Přiwšěm su sej ministrojo přezjedni, zo je wažne prezencnu wučbu dale zmóžnić. Wo wuslědkach posedźenja chce tuchwilna prezidentka kultusowych ministrow, kubłanska ministerka Braniborskeje Britta Ernst, jutře informować.
Steinmeier na Ukrainje był
Kiew (dpa/SN). Zwjazkowy prezident Frank-Walter Steinmeier je wčera Ukrainu wopytał a na němske złóstnistwa w Druhej swětowej wójnje dopominał. „Bjez sprawneho dopomnjeća njeje žanoho dobreho přichoda“, wón zwurazni. Před wjac hač 80 lětami bě Němska Sowjetski zwjazk nadpadnyła, kotryž měješe 27 milionow mortwych. Nimo toho Steinmeier kritizowaše, zo njejsu wopory tak w pomjatku wostali, kaž sej to jich ćerpjenje poprawom žada.
Žadaja sej spěšny rozsud
Při zemjerženju w Pakistanje, kotrež bě dźensa rano, zwěsćichu ...
Njebjelčicy na wuchodźe wulke wuwzaće
Berlin/Njebjelčicy (dpa/SN). Ličba ludnosće na wuchodźe Němskeje po politiskim přewróće hižo tak dramatisce njewoteběra. To wuchadźa ze studije Berlinskeho instituta za ludnosć a wuwiće, kotraž bu wčera wozjewjena. Při tym pomhali su kreatiwne ideje a „nowa žadosć“, bydlić we wjesnej kónčinje. Fachowcy přepytowachu demografiske wuwiće we wuchodnych zwjazkowych krajach a wobswětleja sćěhi a naprawy jednotliwych komunow. Pod smužku je wuchod Němskeje (bjez Berlina) w lětach 1990 do 2020 něhdźe 2,3 miliony ludźi z tehdy 14,8 milionow wobydlerjow zhubił. Zapadne zwjazkowe kraje registrowachu porno tomu w tym času rozrost 5,4 milionow ludźi.
Němski póst porto podróši
Bonn (dpa/SN). Zwjazkowa agentura centralow za přetrjebowarjow je wčera wólny rum za zwyšenje płaćiznow wozjewiła, na kotrehož zakładźe Němski póst swoje porto wusměrja. Tak je hižo nětko wěste, zo Bonnski koncern porto za listy a pohladnicy zwyši, a to wo 4,6 procentow. Hódnota je hišće poměrnje niska, hakle před lětomaj wučinješe wona 8,9 procentow. Tehdy bě so porto standardneho lista wo dźesać na 80 centow podróšiło. Kaž koncern wčera wozjewi, postupi porto normalneho lista na 85 centow, štož ma potom přichodne tři lěta płaćić.
Listowe wiki so hladajo na digitalny swět dale a bóle pomjeńšeja. Dźeń a mjenje ludźi sej pisa, skerje wužiwaja moderne komunikaciske srědki. Přiwšěm wostawa listowe wobchodnistwo za koncern nadal lukratiwne, a to naposledk tež dowolenych wyšich płaćiznow.
Kaž Němski póst wčera dale wozjewi, chce tež tamne produkty wo pjeć centow podróšić. Logistiski koncern wopodstatnja to z wyšimi kóštami. Nětko ma zwjazkowa agentura přetrjebarskich centralow pruwować, hač je zwyšenje porta w přizwolenym wobłuku.
FDP chětro iritěrowana
Rozmołwy wo amplowej koaliciji zahajili
Berlin/Mnichow (dpa/SN). SPD, Zeleni a FDP wusměrjeja swój kurs na amplowu koaliciju. Jědnaće dnjow po wólbach zwjazkoweho sejma zahajichu zastupjerjo stron dźensa rozmołwy, zo bychu šansy koalicije dale wobrěčeli. Móžny jamaiski zwjazk, wobstejacy z unije, FDP a Zelenych, je tuž najprjedy raz z blida. Frakcija unije chce so dźensa na digitalne posedźenje zetkać a połoženje rozjimać.
Spomóžne to było njeby
Škit přesnadny
Berlin (dpa/SN). Předsyda stajneje šćěpjenskeje komisije Thomas Mertens warnuje koronapandemiju nastupajo před přemało gripowymi šćěpjenjemi rizikowych skupin. Dotal je 30- do 50procentowska kwota jasnje přeniska. Tež hdyž njebě minjenu sezonu žaneje sylneje gripoweje žołmy, móhło tomu tónkróć ćim hórje być. Fachowcy radźa wosebje samodruhim, chronisce chorym, medicinskemu personalej, hladacym přiwuznym a ludźom, kotřiž maja wšědnje kontakt k wulkemu publikumej, so šćěpić dać. Kaž hižo pola korony dźe wo to, zo by mjenje ludźi lěkowanje w chorownjach trjebało abo zemrěło. „Při šćěpjenju njeńdźe jenož wo koronu. Tež wšitke tamne šćěpiwa měli dale běžeć“, skedźbnja Mertens zdobom na šćěpjenje dźěći. „Srědki su genialne a jara wuznamne wudobyće mediciny“, wón měni. „Zo bychmy wjele infekciskich problemow rozrisać móhli, za to pomha nam naposledk jenož dobre šćěpiwo.“
