Akciski dźeń na dobro dźěći
Nadźijeja so lěpšeho wjedra
Drježdźany (dpa/SN). Sezona piwowych zahrodow je zahajena. Korčmarjo a hosćencarjo, kotřiž piwowe zahrody wobhospodarjeja, nadźijeja so wobstajneho dobreho wjedra. „Woni wjesela so na tute tydźenje. Lěćny čas je mnohim wažne žórło wobrota, runje lětsa“, rjekny Axel Klein, hłowny jednaćel zwjazka hotelownikow a hosćencarjow w Sakskej (Dehoga). „Trjebamy sezonu, po tym zo njebě prěni kwartal jara pozitiwny. Tole dyrbja woni nětko na někajke wašnje nachwatać.“
Klein je optimistiski, byrnjež sej sydom procentow nadhódnotoweho dawka prjedy přał. Nowe zwjazkowe knježerstwo bě so na to dojednało, nadhódnotowy dawk na jědźe w hosćencach wot tuchwilu 19 procentow wot 1. januara 2026 trajnje na sydom procentow znižić. Za čas koronakrizy běchu to hižo tak činili, ale jenož hač do kónca 2023.
Po wšej Sakskej je po informacijach Dehoga 179 piwowych zahrodow, najwjace z nich w Lipsku (26) a Drježdźanach (24). Nimo toho ma mnoho hosćencarjow tež terasy, druhe městna pod hołym njebjom a nadróžne kofejownje. Wosebje w městach to ludźo lubuja.
To a tamne (19.05.25)
Darmotnje zmjerzlinu rozdźělił je njeznaty muž w lodarni w badensko-württembergskim Pforzheimje. Starši muž bě do wobchoda přišoł, 180 eurow ze zaka wućahnyć a wo to prosył, ludźom za to lód wudać. Wjace hač sto kulkow lodu su na to w běhu třoch hodźin wopytowarjam darili, kotřiž běchu runje we wobchodźe. Mějićelej lodarnje njeznaty přeradźi, zo je runje infarkt wutroby přetrał a zo ma jeho dźowka narodniny.
Dźesać mjeńšin bjez pilota je pasažěrske lětadło Airbus wot Frankfurta do španiskeho Sevilla lećało. Jako bě kapitan wustupić, so kopilot na swojim stólcu sedźo zwjeze. Najebać to lětadło z pomocu awtopilota stabilnje dale lećeše. Nahrawanja rekordera połoženje dokumentuja. Hakle dźesać mjeńšin pozdźišo so pilotej poradźi, durje cockpita z nuzowym čisłom zaso wotewrěć.
Planuja měrowe rozmołwy
Istanbul (dpa/SN). Poprawom hižo wčera planowane rozmołwy wo skónčenju wójny w Ukrainje su na dźensa přestorčili. W běhu popołdnja chcychu so zastupnicy Ruskeje a Ukrainy zetkać. Prěnje direktne konsultacije wobeju krajow po třoch lětach chcychu zastupnicy Turkowskeje w Istanbulu přewodźeć. Do toho běštaj ruski prezident Wladimir Putin a pozdźišo tež ukrainski prezident Wolodymyr Zelenskyj swoje wobdźělenje na zetkanju w Turkowskej wotprajiłoj.
Wožiwja jadrowu energiju
Brüssel (dpa/SN). Belgiski parlament je so z přemóžacej wjetšinu za wožiwjenje atomoweje energije w kraju wuprajił. Prawicarske knježerstwo ministerskeho prezidenta Barta De Wevera chce tež nowe jadrowe milinarnje twarić. Belgiska bě lěta 2003 wobzamknyła, swoje jadrowe milinarnje zawrěć. Hladajo na tuchwilne mjezynarodne energijowe połoženje wójny w Ukrainje dla chcedźa tole pozdźišo zwoprawdźić.
Z policistami so bili
Mjez 37 wobdźělnikami mjezynarodneho wubědźowanja Eurovision Song ...
Awstriska njeje mjeńšiny škitała
Wadephul žněje kritiku opozicije
Berlin (dpa/SN). W rjadach opozicije žněje žadanje wonkowneho ministra Johanna Wadephula (CDU) za zwyšenjom wojerskich wudawkow na pjeć procentow hospodarskeho wukona raznu kritiku. Zeleni před tym warnuja, so prezidentej USA Donaldej Trumpej přilišćić a žadaja sej solidne planowanje na zakładźe toho, štož běchu na wjeršku NATO loni w juniju wobzamknyli. Podobnje běštaj so ze stron koaliciskeho partnera SPD hižo předsyda Lars Klingbeil a zakitowanski minister Boris Pistorius wuprajiłoj.
„Skutkuje trochu naiwnje, hdyž sej wonkowny minister Wadephul mysli, zo móže prezidentej Trumpej pjaty lizać, hdyž njeserioznje a zwonka koaliciskeho zrěčenja z wulkimi ličbami wokoło so mjeta“, rjekny zastupowaca předsydka Zelenych Agnieszka Brugger Stuttgartskim nowinarjam. Wadephul bě so wčera žadanju Trumpa přizamknył, pjeć procentow hospodarskeho wukona za brónjenje nałožować.
FDP woli nowe nawodnistwo
Mjenje dochodow z dawkow
Berlin (dpa/SN). Zwjazkowe knježerstwo CDU/CSU a SPD dyrbi při zwoprawdźenju swojeho koaliciskeho zrěčenja hač do 2029 z jasnje mjenje dawkowymi dochodami ličić hač běchu hišće loni nazymu powobličili. Fachowcy za dawki wočakuja, zo změje Němska w tymle času 33,3 miliardy eurow mjenje k dispoziciji hač běchu w oktobru trochowali. Nastupajo cyłkowny etat Zwjazka, krajow a komunow su trochowarjo tohorunja pesimistiscy. Tule wočakuja 81,2 miliardźe eurow mjenje hač w oktobru wuličene.
Wažny zakład trochowanja dawkow běchu konjunkturne wuhlady zwjazkoweho knježerstwa. Te wšak pokazuja, zo hospodarstwo tuchwilu stagněruje, mjeztym třeće lěto pospochi. Předsyda SPD Lars Klingbeil je sej wěsty, zo móže jenož sylny rozrost hospodarstwa aktualne wuwiće změnić. Tak bychu dochody zaso přiběrali a nowe inwesticije zmóžnili.
Předsydka AfD Alice Weidel ma ličby za signal hospodarskeho rozpada. „Je to sćěh puća zahubneje energijoweje politiki, kotryž nowa koalicija dale kroči.“
