Z nošerstwom serbskeje dźěćaceje skupiny dnjoweje maćerje w Drježdźanach je Serbske šulske towarstwo předloni wažnu kročel šło a zamołwitosć za Serbow w sakskej stolicy přewzało. Angažowane serbske swójby zwonka Łužicy trjebaja tajku podpěru. Měšćanski zarjad běše drje wulkomyslny z dowolnosću, jako bě wjac dźěći hač po normje, ale so tuchwilu wuskomyslny pokazuje, dokelž je nachwilnje – kaž druhdźe tež – přemało dźěći. To pak je bjez logiki, wšako njeje serbska skupina konkurenca němskim žłobikam. Tule dźe wo zdźerženje serbšćiny w duchu sakskeje wustawy, wšako njenawróća so młodźi Serbja dźensniši dźeń po wukubłanju a do załoženja swójby hižo awtomatisce do Łužicy. Nimo toho je stare serbske mjeno sakskeje stolicy dopokaz toho, zo je tu stary sydlenski rum. Tohodla njech kultusowe ministerstwo potrjechenych jenož z rjanymi słowami njetróštuje, ale tež aktiwnje daledawanje serbšćiny přichodnym generacijam podpěruje. Marcel Brauman

Lipsk (dpa/SN). Demonstracija na dobro Palestinjanow w Lipsku je kontrola po­licije z namocu skónčiła. Při tym je so něhdźe dźesać ludźi zraniło, policija zdźěli. Nimo toho buštej tramwajka a awto zarjada za porjad w měsće wobškodźenej, wjacore medije rozprawjeja.

Zastojnicy běchu tramwajku póndźelu wječor zadźerželi. W njej njeběchu jenož wobdźělnicy demonstracije, ale tež podhladni, za kotrymiž policija w zwisku z demonstraciju 1. meje pytaše. Jim ­wumjetuja, zo su so naprawam policije ­spjećowali. Zaměr zastojnikow bě, zo personalije potrjechenych zwěsća, rěčnik policije rozłoži.

Při kontroli pak so situacija w tramwajce přiwótři. Dale a wjace ludźi so přećiwo policiji solidarizowaše a so jim ­spjećowaše. Wokna tramwajki při tym rozbichu. Zastojnicy zasadźichu popjerjowy spray, zo bychu zaso kontrolu ­dóstali. Přećiwo wobdźělnikam rozestajenjow přepytuja nětko ćežkeho kaženja měra dla, spjećowanja přećiwo policajskim zastojnikam a dalšich chłostajomnych njeskutkow dla. Personalije 40 wosobow su registrowali.

W Rogeńskim parku poněčim lěćo zaćehnje. Zahrodkarjo parka tomu ze swojimi ­sadźenkami widźomnje přinošuja. Při tym sadźa 4 900 jednolětne kwětki kaž ­wóstojće (Männertreu), lawicy (Löwenmaul), salwje a studentki do přihotowanych rjadkow. Nimo toho zasadźa sobudźěłaćerjo sto kerkow wokoło hrodu. Wosebitosć je stajnje zaso Wenusowa zahrodka, kotruž wupyšitaj Lutz Krüger (naprawo) a Tim Wancsucha z běłym a módrym wóstojćom, husacymi kwětkami a dalšimi. Kwětki symbolizuja Wenus, kotraž ze žołmow wustupi. Sobudźěłaćerjo žiwjenskeje pomocy zahrodkarjow w Rogeńcu podpěruja. Foto: Michael Helbig

Kamjenica (dpa/SN). Rjemjeslnicy na juhu a zapadźe Sakskeje pytaja dale podarmo za signalemi rozmacha a zhladuja skerje pesimistisce do přichoda. Po najnowšim naprašowanju Kamjeničanskeje rjemjeslniskeje komory pohódnoćeja nimale wšitke wobłuki rjemjesła swoje ­aktualne połoženje jako skerje špatne. Wosebje wobćežne je połoženje w twar­stwje. Potrjechene su ryzy twarske zawody runje tak kaž rjemjeslnicy, kotřiž objekty wutwarjeja. Hłowna přičina je wulka zdźeržliwosć priwatnych, přede­wzaćelskich a zjawnych nadawkidawarjow. Wysoke kóšty materiala a energije krizu runje tak wobwliwuja kaž běrokratiske zadźěwki při twarskich dowolnosćach.

Na nalětnim naprašowanju bě so po informacijach komory wjace hač 600 zawodow wobdźěliło. Z toho wuličeny wobchodniski klimowy indeks je tak ­niski kaž lěta 2009 po tehdyšej wulkej ­financnej krizy, zamołwići zdźěleja.

„Strach je wulki, zo so kriza dale zesylnja, wšako traje wuwiće hižo wot lěta 2020“, rjekny prezident komory Frank Wagner. Politika ma spěšnje wuhibki za nowy rozmach stajić.