To a tamne (18.09.17)
Dźěle hoberskeje dule tuka, kotraž bě wopłóčkowy kanal w Londonje zatykała, chce tamniši měšćanski muzej kupić. „To by jedyn z najwurjadnišich objektow wšěch muzejowych zběrkow Londona był“, wuzběhny direktorka Sharon Ament w nowinskej zdźělence. Dula móhła wopytowarjow inspirować, zo problemy rosćacych metropolow lěpje rozrisaja.
Njewšědny pišćelowy koncert je kantor Wiesbadenskeje cyrkwje na nohi stajił. Tydźeń do wólbow zwjazkoweho sejma zaklinčachu na wčerawšim koncerće twórby pod hesłom Merkel, Lindner a Schulz. Twórby pak njejsu originalni wólbni kandidaća spisali. Kantor Hans Kielblock je za wuměłcami ze samsnym swójbnym mjenom kaž politikarjo slědźił a tajke tež našoł. Tak zaklinčachu wčera twórby Gustava Adolfa Merkela, Wolfganga Lindnera a Hermanna Schulza.
Socialny měr a kulturna diwersita
Z westfalskeho Münstera pochadźacy, po přewróće w Drježdźanach dźěłacy a wot lěta 1994 w swojej nowej domiznje jako měšćanski radźićel w Großröhrsdorfje politisce angažowany Günter Hutschalik je direktny kandidat Swobodnych wolerjow Budyskeho wólbneho wokrjesa za přichodny Zwjazkowy sejm Němskeje. Justiciar srjedźostawskeho předewzaća bě spjećowanja přećiwo wutwarej milinowětrnikoweho parka w zapadnej Łužicy dla z dalšimi iniciatiwu „Gegenwind“ wutworił a so naposledk jako „eksot w měšćanskej radźe za naše zajimy zasadźił – to bě tehdy za etablěrowane strony chětro njezwučene“. Takle rozjima wón zazběh swojeho politiskeho skutkowanja. „Wuspěch z našim spjećowanjom njemějachmy, běchmy pak sej wěsći, zo chcemy komunalny přichod wobwliwować. Mjeztym smy druhe najsylniše zastupjerstwo w radźe a tworimy z SPD zhromadnu frakciju. Na tej runinje je wěcywustojne dźěło mjez wšelakimi stronami a zjednoćenstwami móžne.
Zaměry budu dodźeržane
Berlin (dpa/SN). Zwjazkowa kanclerka Angela Merkel (CDU) je w telewiznej debaće wčera wječor přilubiła, zo Němska swoje klimoškitne zaměry hač do lěta 2020 dodźerži. Na prašenje přitomneje prěnjowolerki, čehodla nochce Němska wudobywanje brunicy prjedy zakónčić, kanclerka wotmołwi, zo njeje to hač do lěta 2020 trjeba. Za ludźi, kotřiž na přikład we łužiskich milinarnjach dźěłaja, dyrbja najprjedy alternatiwy nańć.
Znowa raketu třělili
Seoul (dpa/SN). Najebać sankcije UNO njedawneho atomoweho testa dla je Sewjerna Koreja znowa raketu do směra na Japansku třěliła, kotraž je kraj přelećała a na to do Pacifiskeho oceana zrazyła. Tole zdźěli dźensa generalny stab Južneje Koreje w Seoulu. Bjezstrašnostna rada UNO chce hišće dźensa nuzowe posedźenje zwołać a so z najnowšim raketowym testom rozestajeć. USA, Japanska a Južna Koreja wumjetuja knježerstwu w Pjönjangu dalšu prowokaciju a wohroženje.
SPD dalšu nižinu docpěła
Mjeńšinu w Braniborskej lěpje škitać
Podstupim (SN). Wjetšina Braniborskeho krajneho sejma chce so za lěpši škit Sintow a Romow zasadźeć. Krajne knježerstwo měło mjez druhim dojednanje z jich krajnym zjednoćenstwom wobzamknyć, rěka w próstwje pod nadpismom „Dopominać a přećiwo diskriminaciji jednać“ SPD, Lěwicy a Zelenych, kotruž běchu wutoru w krajnym sejmje zhromadnje předpołožili. Tak žadaja sej prawidłownu wuměnu myslow mjez zastupnistwom mjeńšiny a krajnej politiku. W šulach a na dalekubłanjach, na přikład sobudźěłaćerjow zarjadow, měli Braniborčanam zbližić stawizny a tuchwilne połoženje Sintow a Romow. Politika a ciwilna towaršnosć dyrbjałoj přećiwo rasistiskim wukročenjam jednać.
Migrantow w Mužakowje lepili
Zhorjelc (dpa/SN). 40 po wšěm zdaću přez hranicu pašowanych Irakčanow je zwjazkowa policija zawčerawšim w Mužakowje lepiła. Pokiw dóstała je wot Běłowodźanskeje policije, na kotruž su so wjacori wobydlerjo wobroćili, zo běchu wulku skupinu cuzych ludźi widźeli.
Kaž migranća rozprawjachu, běchu jich pašowarjo z nakładnym awtom z Turkowskeje do pólskeje Łęknicy dowjezli. Tam so w nocy na srjedu wotsalichu. Migranća podachu so na to pěši do Němskeje, zdźěla zwjazkowa policija z Ludwigsdorfa. Po wšěm zdaću jedna so pola Irakčanow wo wulkoswójbu. Mužojo, žony a dźěći su w dobrym strowotniskim stawje. Zastojnicy přepruwuja nětko jich dokładnu identitu.
To a tamne (15.09.17)
Hoberski monster tuka je wopłóčkowy kanal w Londonje zatykał. Dula je něhdźe 250 metrow dołha a 130 tonow ćežka, štož wotpowěduje dźesać dwuposchodowym busam. Hłownje wobsteji wona z pjelchow, hadrješćow a stwjerdnjeneho tuka. Wodowe zastaranske předewzaće je ludźi hižo namołwjało duli mjeno dać. Prěnje namjety nablaku běchu „brexit“, „Trump a „Donald“. Tři tydźenje budźe nětko trać, hoberski monster fachowsce wotstronić.
Štož sy někomu slubił, maš dodźeržeć. Tak je so 62lětny dźěd na swojeho konja sydnył, zo by wot Abenberga do 550 kilometrow zdaleneho Münstera jěchał a tam swojeho wnučka w šuli wotewzał. 23 dnjow je za to zaplanował a jěcha wšědnje 17 do 35 kilometrow. Kóždy šesty dźeń čini přestawku. Wnučk Hannes ma akciju swojeho dźěda za „cool“.
Brunica wostanje pačaca tema
Strukturna změna we Łužicy słuša do najhorcyšich temow wólbneho boja, kaž je so na forumje Serbskich Nowin a Domowiny 7. septembra w Budyskim Serbskim domje pokazało.
Brunica stanje so z najwažnišim žórłom energije w Němskej. Z toho Andreas Lutz Richter wuchadźa, kiž chcył so jako wobydlerski kandidat do zwjazkoweho sejma wolić dać. Po skónčenju wudobywanja kamjentneho wuhla w lěće 2018 budźe po jeho wuprajenju 18 procentow mjenje energije k dispoziciji a po zawrjenju poslednjeje atomoweje milinarnje w Němskej za pjeć lět dalšich dwanaće procentow. Wón njemóže spóznać, kak hodźał so deficit wurunać, jeli so podźěl brunicy njepowjetši. Smělnjan ma sam solarnu připrawu a je wo tym přeswědčeny, zo njemóže Němska swoju potrjebu miliny jeničce z regeneratiwnych žórłow zaručeć.
Za njewolerjow tamni sobu wola
Za měsačnym stajnym blidom CDU su wčera wječor w Piwarskim domje na Budyskej Thomasa Mannowej wo róli njewolerjow rěčeli.
Budyšin (CRM/SN). Byrnjež so na wólbach zwjazkoweho sejma powšitkownje wjace wolerjow hač na druhich wólbach wobdźělało, běše skupina njewolerjow w lěće 2013 z jednej třećinu chětro wostrózbjaca. Na wuslědku wólbow pak su stajnje wšitcy jenak wobdźěleni, wolerjo kaž njewolerjo. Za njewolerjow faktisce tamni sobu wola. Kaž z aktualnych naprašowanjow wuchadźa, něhdźe štwórćina wólbokmanych ani hišće njewě, za koho chce njedźelu za tydźeń hłosować.
Wojerski manewer
Moskwa/Minsk (dpa/SN). Ruska a Běłoruska stej dźensa wojerski manewer z mjenom Zapad zahajiłoj. Na sydomdnjowskim zwučowanju w Běłoruskej je po informacijach z Moskwy 12 700 wojakow wobeju krajow wobdźělenych. Mnohe zapadne staty a NATO z toho wuchadźeja, zo je ličba wjele wjetša. Zwjazkowa zakitowanska ministerka Ursula von der Leyen (CDU) liči z hač do 100 000 wojakami. Kritikarjo so boja, zo drje po manewrje ruscy wojacy Běłorusku njewopušća.
Euro za wšěch
Strasbourg (dpa/SN). Euro za wšitke kraje Europskeje unije a bjezmjeznu Europu je sej wčera prezident komisije EU Jean-Claude Juncker žadał. W swojej lětnej narěči před Europskim parlamentom w Strasbourgu wón hospodarsce sylne kraje napominaše, zo měli słabšim pomhać. Zwjazkowe knježerstwo witaše narěč prezidenta, w kotrejž na wažne prašenje přichoda skedźbnja a so z prioritami Europskeje unije rozestaja.
Murja hišće z blida njeje
