To a tamne (27.10.20)
Dźewjeć kruwow z juchoweje jamy wuchowali su wohnjowi wobornicy na ratarskim statoku w sewjeroněmskim wokrjesu Pinneberg. Zwěrjata běchu njedźelu popołdnju do jamy padnyli, jako so špundowanje hródźe přełama. Z pomocu krana móžachu zwěrjata skónčnje wuswobodźić.
Sušene běrny z časa Druheje swětoweje wójny je 24lětny z Bielefelda na łubi stareje bróžnje namakał a hnydom wuspytał. Blachowe tyzy z běrnami pochadźachu z Awstralskeje a słužachu prawdźepodobnje k zastaranju aliěrowanych wojakow. Słodźeli běrny wjace njejsu, muž rozprawješe. Młody předewzaćel chcyše bróžnju přetwarić a bě sej twar z rjemjeslnikom wobhladał. Při tym napadnychu jimaj drjewjane kisty z napisom „Dried Potato“ (sušene běrny). Zjěsć wón namakane žiwidła na žadyn pad nochce.
Naslědnik powołany
Vatikan (B/SN). Njejapki wotstup kardinala Giovannija Angela Becciua, čłona romskeje kurije kónc septembra je zawinował wulki njeměr we Vatikanje. 15. oktobra powoła bamž Franciskus biskopa Marcella Semerara w biskopstwje Albano, južnowuchodnje Roma, za nawodu kongregacije za zbóžno- a swjatoprajenje. Dotal bě 72lětny Italčan Semeraro sekretar kardinalneje rady.
Kardinal wobkrućeny
Vatikan (B/SN). Reforma Romskeje kurije je za bamža Franciskusa wusahowaca a ćežko zwoprawdźomna. Nětko je pontifeks kardinala Reinharda Marxa w radźe, tuchwilu wobstejaceje ze šěsć kardinalow, znowa wobkrućił a jako noweho powołał arcybiskopa z Kinshazy, 60lětneho kardinala Fridolina Ambongo Besungu, kotryž je najmłódši w tutym wažnym gremiju, najstarši je 78 lět. Kardinalny rada ma nadawk, bamža poradźować při zwoprawdźenju reformy kurije. Poslednje posedźenje bě na zakładźe widejokonferency 13. oktobra. Tuchwilu wobdźěłaja pad kurije z dźěłowym pomjenowanjom „Praedicate evangelium“ z lěta 1988.
Dale a mjenje studentow
Na nowe tarify so dojednali
Podstupim (dpa/SN). Wosrjedź koronakrizy su so dźěłarnistwa a dźěłodawarjo na zwyšenje mzdow wo 3,2 procentaj za přistajenych zjawneje słužby dojednali. Najebać komplikowane wuchadźišćo matej wobě stronje dojednanje za akceptabelne. Kompromis předwidźi zwyšenje mzdow 1. apryla 2021 wo 1,4 procenty a 1. apryla 2022 wo 1,8 procentow, wčera w Podstupimje zdźělichu. Nimo toho dojednachu so na hladansku přiražku 120 eurow wob měsac wot lěta 2022.
Namjetuja zjězd CDU přestorčić
Berlin (dpa/SN). Předsydka CDU Annegret Kramp-Karrenbauer je hladajo na koronakrizu namjetowała, 4. decembra planowany zjězd CDU k wuzwolenju noweho předsydy do nalěća přestorčić. We wobłuku klawsury předsydstwa k zahajenju noweho lěta měła strona rozsudźić, hač a hdy budźe w nalěću zjězd z 1 001 delegatom móžny abo hač su listowe wólby trěbne, zhoni powěsćernja dpa z kruhow wobdźělnikow wuradźowanja nawodnistwa CDU dźensa w Berlinje.
Opozicija za generalny stawk
Dale sprostnjene su fronty mjez stawkowacymi sobudźěłaćerjemi ...
Žaruja wo Thomasa Oppermanna
Berlin (dpa/SN). Wiceprezident zwjazkoweho sejma, Thomas Oppermann, je dospołnje njewočakowano zemrěł. 66lětny politikar SPD bě so wčera wječor při telewizijnym wusyłanju sćelaka ZDF zwjezł. Jeho dowjezechu hnydom do chorownje, hdźež wón wudycha.
Předsyda SPD Norbert Walter-Borjans reagowaše zludany. „Wulki šok nam wšitkim. Smy dospołnje poraženi a žarujemy z jeho přiwuznymi“, wón piše. Generalny sekretar SPD Lars Klingbeil pisa, zo je sej Oppermanna jako rozmołwneho partnera stajnje jara wažił. „Zo je wón přezahe zemrěł, nas wšitkich šokuje. Tež w rjadach politiskeho přećiwnika reaguja zludani. Zwjazkowy minister za hospodarstwo Peter Altmaier (CDU) piše w interneće: „Ty běše stajnje wulkotny demokrat a přistojny kadla. Twoju smjerć njemóžemy zapřimnyć.“ Městopředsyda FDP Alexander Graf Lambsdorf přiznaje, zo budźe Oppermann w politiskim swěće „jara pobrachować“. Městopředsydka AfD Beatrix von Storch waži sej jeho jako „sprawneho a fairneho“ politikarja.
Wjacore zarjady hižo přećežene
Berlin (dpa/SN). Strowotniske zarjady we wjacorych němskich městach su přiběraceje ličby koronainfekcijow dla přećežene. We wjacorych městach njemóža hižo zdokonjeć, štož sej wot nich žadaja, zdźěli rěčnik knježerstwa Steffen Seibert minjeny pjatk w Berlinje. Tak njemóža w kóždym padźe wuslědźić, z kim je natyknjeny wšitko kontakt měł, kaž to tež w dźělach Berlina dožiwjeja.
Seibert wobydlerjow namołwješe, prawidła škita před infekcijemi kruće dodźeržeć. „Njejsmy bjezmócni, móžemy sami k tomu přinošować, dalše rozšěrjenje wirusa zadźeržeć.“
Warnowanjam, po kotrychž móhła ličba nowych infekcijow hižo bórze na 20 000 wob dźeń rozrosć, nochce so zwjazkowe knježerstwo přizamknyć. Seibert na to pokaza, zo měli pandemiju regionalnje a lokalnje wobhladować.
Prezident swětoweho zwjazka lěkarjow Frank Ulrich Montgomery bě warnował, zo móhli zamołwići kontrolu zhubić, dyrbjała-li so ličba infekcijow na 20 000 wob dźeń powjetšić. Pjatk běchu strowotniske zarjady 11 242 nowonatyknjenjow w Němskej zličili.
To a tamne (26.10.20)
Priwatna sawna w radnicy ma za japanskeho měšćanostu njelubozne sćěhi. Kaž japanski dźenik Yomiuri Shimbun rozprawja, bě sej měšćanosta města Ikeda w prefekturje Osaka sawnu a fitnesowy nastroj w předrumnosći swojeho běrowa w radnicy nastajić dał. Po pokiwje swójbnych bě drje wón sawnu po měsacu zaso wotstronić dał, w mjezyčasu pak běchu medije hižo wo tym rozprawjeli. Měšćanosta je so mjeztym zamołwił.
Na chětro njewšědne wašnje su policisća w porynsko-pfalcskim Bad Kreuznachu drogi muža sćazali. Muž bě blachowu tyzu z marihuanu a tabletami do rěki ćisnył, jako chcychu jeho zastojnicy kontrolować. Policisća wupožčichu sej čołm wobydlerja a padlowachu za tyzu, doniž njemóžachu ju z wody wućahnyć. Policiji derje znateho muža su mjeztym wobsydstwa drogow dla wobskoržili.
Mandźelski Spahna pozitiwny
Berlin (dpa/SN). Mandźelskeho strowotniskeho ministra Jensa Spahna (CDU) su tohorunja pozitiwnje na koronawirus testowali. Kaž rěčnik ministerstwa zdźěli, je wón wčera wječor wuslědk dóstał. Mjeztym staj wobaj zhromadnje w domjacej izolaciji. Mandźelski nima symptomy, Spahn ma zjawy nazymnjenja. Wón je ze žurnalistom Danielom Funku zmandźeleny. Po informacijach medijow su koronawirus mjeztym pola štyrjoch sobudźěłaćerjow Spahna zwěsćili.
Tarifowe jednanja přetorhnyli
Podstupim (dpa/SN). Dźěłodawarjo a dźěłarnistwa dale spytaja, po intensiwnych jednanjach wo nowe tarifowe zrěčenje tola hišće kompromis namakać. Jednanja běchu minjenu nóc po wjacorych hodźinach přetorhnyli. W běhu dnja chcychu so znowa zetkać, powěsćernja dpa rozprawja. Wo dotalnym stawje jednanjow nochcychu medijam ničo rjec. Dźe wo přichodne dochody 2,5 milionow přistajenych zjawneje słužby.
Sudnistwo zakoń zběhnyło
We wjacorych městach Pólskeje su wčera přećiwo přiwótřenju ...
Schodźenkowy plan přećiwo koronawirusej
Drježdźany (dpa/SN). W boju přećiwo přiběracym ličbam koronainfekcijow je Sakska nowe škitne naprawy wukazała. Wone płaća wot jutře 0.00 hodź., tole ministerka za strowotnistwo Petra Köpping (SPD) wčera w Drježdźanach zdźěli. W dwuschodźenkowym planje płaća potom nowe wobmjezowanja za wužiwanje nahubnika, za priwatne swjedźenje, wulkozarjadowanja kaž tež za časy zawrjenja hosćencow – stajnje wotwisne wot regionalneho wuwića ličby koronainfekcijow. Nadrobnosće rjaduja wokrjesy same. „Połoženje infekcijow dla je chutne, ličby jasnje přiběraja“, ministerka rjekny. Swobodny stat dawa z nowym wukazom ramik, wokrjesy a města móža pak tež razniše postajenja wukazać. Nowe rjadowanje płaći najprjedy raz hač do 25. januara.
Po informacijach ministerstwa su wčera 471 nowych infekcijow a wosom dalšich smjertnych padow registrowali. Z tym je w Sakskej dotal 11 734 dopokazanych padow koronawirusa a 271 ludźi, kotřiž wot spočatka pandemije w zwisku z wirusom zemrěchu.
