Rasizm tež w sakskej policiji
Nutřkowny minister Wöller rěči wo 17 padach minjene pjeć lět
Drježdźany/Berlin (dpa/SN). Po posudku sakskeho nutřkowneho ministra Rolanda Wöllera (CDU) ma tež policija w swobodnym staće ćeže z rasizmom. „Pad w Lipšćanskej policajskej direkciji pokazuje, zo mamy bohužel tež w Sakskej tónle problem“, rjekny Wöller rozhłosowemu sćelakej MDR aktuell. Při tym njemóžeš z toho wuchadźeć, zo jedna so wo jednotliwy pad. Minjeny pjatk bě policija zdźěliła, zo su jednanja přećiwo policistej prawicarskoekstremnych a rasistiskich wuprajenjow w interneće dla zahajili. Po słowach Wöllera su minjene pjeć lět 17 tajkich padow registrowali. Při tym dźěše wo přećiwo wukrajnikam měrjace so a rasistiske wuprajenja kaž tež wo wužiwanje wustawu ranjacych symbolow. „Rasizm a ekstremizm w rjadach sakskeje policije njećerpimy a konsekwentnje přećiwo tomu postupujemy“, Wöller podšmórny. Potrjecheneho zastojnika w Lipsku su hnydom ze słužby wuzamknyli.
Strašne powostanki
To a tamne (29.09.20)
60 metrow wysoko na powjazu su akrobaća Nürnbergski koparski stadion přeprěčili. 230 metrow dołhi powjaz mjez sćežorami swětłomjetakow běchu z pomocy truta přiwjazali. Wopytowarjo njesmědźachu do stadiona, jeničce přistajeni móžachu spektakl wobdźiwać. Sportowcy dyrbjachu sami po sćežoru horje lězć a potom na powjazu runowahu dźeržeć. Podobne zwažliwe projekty we wysokosći běchu hižo w Španiskej, Norwegskej a w Sakskej Šwicy přewjedli.
Tři ćeknjene lamy su po dróhach sewjerorynsko-westfalskeho Iserlohna běhali a zasadźenje policije zawinowali. Šofer awta ju informowaše. Kaž so wukopa, běchu zwěrjata z bliskeho hóstneho cirkusa twochnyli. Z pomocu jeho sobudźěłaćerjow móžachu je zaso popadnyć. Za to trjebachu poł hodźiny, dokelž so lamam swoboda po wšěm zdaću lubješe.
Žada sej wjace zasadźenja
Vatikan (B/SN). Bamž Franciskus namołwi knježerstwa a nawodow hospodarstwa k wjetšemu zasadźenju za škit wobswěta a sprawnosće. „To drje je winowatosć za kóždeho čłowjeka, tola ći, kiž maja wjetši wliw na to, su bóle wužadani“, wón rjekny. Trěbna je woprawdźita zwólniwosć, přičiny změny klimy radikalnje wotstronić. „Powšitkowne winowatosće njedosahaja, a njemóžeš so jeničce na přihłosowanje swojich wolerjow a pjenjezydawarjow spušćeć“, warnowaše bamž Franciskus. „Młodźi a chudźi budu nas zawěsće hišće konsekwentnišo nuzować, swojej zamołwitosći wotpowědować.“
Bätzing za zhromadny swjatk
Berlin (B/SN). Předsyda Němskeje biskopskeje konferency biskop Georg Bätzing je so za mjezynabožinski swjaty dźeń w Němskej wuprajił. Dźeń za začuće zhromadnosće by Němskej tył, pisa wón w přiłoze nowiny Zeit, Christ und Welt hladajo na pandemiju. Zastupjerjo muslimskich a židowskich wosadow reaguja skeptisce. Po jich měnjenju měli so ćežišća kaž měr, towaršnostna mjezsobnosć a runoprawosć sobu zapřijeć.
Wo nowym pytanju za Bohom
Zeleni sej radnicy zdobyli
Düsseldorf (dpa/SN). CDU a SPD stej we wčerawšim rozsudnym kole wólbow wyšich měšćanostow w Sewjerorynsko-Westfalskej dobyli, ale tež podleželi. Najwjetši dobyćerjo pak běchu Zeleni. Rěčo wo „historiskim dnju“ zdobychu sej wodźace zastojnstwa w radnicach w Bonnje, Aachenje a Wuppertalu. W Kölnje móžeše bjezstronska Henriette Reker swoje zastojnstwo zakitować. SPD wostanje najsylniša móc w Dortmundźe, mjeztym zo je sej CDU Düsseldorf wróćo zdobyła.
Trump lědma dawki płaćił
Washington (dpa/SN). Dobry měsac do prezidentskich wólbow w USA wobswětla brizantna rozprawa nowiny New York Times financne njepočinki prezidenta USA Donalda Trumpa. Nowina piše, zo njeje Trump w lětomaj 2016 a 2017 stajnje wjace hač 750 dolarow dochodowych dawkow płaćił. Tón mjenowaše informacije nowin „dospołnje wopačne“. Wón chcył swoje dawkowe podłožki wozjewić, ručež je statny dawkowy zarjad IRC pruwowanje aktow zakónčił.
Dalše protesty w Běłoruskej
Po wudyrjenju nowych wobrónjenych rozestajenjow mjez Armenskej a ...
W Pólskej rekord infekcijow
Kak dale w CDU?
Kónčny skład tež w Sakskej móžny
Berlin (dpa/SN). Po wšej Němskej je cyłkownje 90 kónčin, kotrež bychu so po geologiskich směrnicach jako kónčne składźišćo atomowych wotpadkow hodźeli. To je Zwjazkowa towaršnosć za kónčne składowanje při předstajenju swojeje rozprawy w Berlinje zwěsćiła. To wšak njerěka, zo su so hižo za jednu z regionow rozsudźili. Wěste pak je, zo njeje tuchwilny skład w delnjosakskim Gorlebenje mjez móžnymi kandidatami. Za to steja městna w Bayerskej na lisćinje.
Kónčny skład ma znajmjeńša 300 metrow pod zemju w geologiskich formacijach sele, hliny abo zornowca nastać. W Sakskej bychu wuměnjenja w štyrjoch kónčinach date byli: zornowc w južnej Łužicy na wjace hač 2 000 kwadratnych kilometrach, kristaliny gnajs we wuchodnych Rudnych horinach na wjace hač 800 kwadratnych kilometrach, kamjeń granulit sewjernje Kamjenicy a zornowc w zapadnych Rudnych horinach na něhdźe 90 kwadratnych kilometrach.
To a tamne (28.09.20)
Wohnjowy alarm zawinili su hrajkace dźěći we Wilkauwje-Haßlauwje na juhozapadźe Sakskeje. Kaž policija zdźěli, bě třilětny ze swojim koleskom do kašćika za nuzowy kluč zrazył, kiž so na to wočini. W kašćiku bě nimo kluča tež knefl za alarm. Tón dźěći tłóčachu a zapinychu tak alarm, byrnjež so scyła njepaliło.
Wosrjedź jězby městno w awće měnjałoj staj 18lětny a jeho 22lětna sobujěduca w schleswigsko-holsteinskim Büdelsdorfje policajskeje kontrole dla. Zastojnikam pak to napadny. Mjeńšiny do toho běchu hišće muža za wodźidłom widźeli. Wobaj běštaj městno měnjałoj, dokelž njeměješe 18lětny žanu jězbnu dowolnosć. Młoda žona wšak tež žanu njeměješe. Na zadnjej ławce sedźeše 45lětna wobsedźerka awta, tohorunja bjez jězbneje dowolnosće. Dalši čłon swójby jich a awto skónčnje wotewza.
