Mnichow (dpa/SN). W Mnichowje zahajichu dźensa proces Wirecard wo pozdatnje najwjetšim wobšudnistwje w Němskej wot lěta 1945. Statne rěčnistwo ­wumjetuje bywšemu šefej předsydstwa Wirecard Markusej Braunej a jeho wobskorženymaj, zo su bilancy koncerna sfalšowali a dawarjow kreditow wo 3,1 miliarda eurow wobšudźili. Štwórta chłostanska komora Mnichowskeho krajneho sudnistwa je za proces hač do lěta 2024 něhdźe sto jednanskich dnjow planowała. Jednanje přewjedu w podzemskim wěstotnym trakće pódla najwjetšeho bayerskeho jastwa Stadelheim.

Brüssel (dpa/SN). Woblubowany do­wolowy kraj Chorwatska móhł dźensa ­doskónčnje zelenu swěcu za přistup k Schengenskemu rumej dóstać. Wo tym rozsudźa nutřkowni ministrojo krajow na zeńdźenju w Brüsselu. Zwjazkej přisłušeja tuchwilu 26 europskich krajow. Mjenje wuhladow maja porno Chorwatskej krajej Bołharska a Rumunska. Přistup tuteju móhł zwrěšćić, dokelž so Nižozemska a Awstriska spjećujetej. Němsku zastu­puje dźensa zwjazkowa nutřkowna mi­nisterka Nancy Faeser (SPD).

Komisija EU bě naposledk na to tłóčiła, Chorwatsku kaž tež Bołharsku a Rumunsku do Schengenskeho ruma přiwzać. Mjenowane tři kraje su hižo zdźěla na Schengenske prawidła wjazani, tola kontrole nutřkokrajnych hranicow su dale přewjedli. Na hranicy z a do Chorwatskeje so kóžde lěćo znowa dołhe rynki jězdźi­dłow wutworja a drohi zatykaja. Nětko móhli kontrole při hranicach kraja hižo spočatk lěta 2023 wotstronić, při lětanišćach klětu w měrcu. Chorwatska zawjedźe klětu tohorunja euro jako srědk za płaćenje.

Dale přewjele dźěći a młodostnych na spěchowanskich šulach

Berlin (dpa/SN). Němski institut za čłowjeske prawa (DIMR) je němske knje­žerstwo namołwjał, UN-rezoluciju za prawa zbrašenych na němskich šulach lěpje zwoprawdźić. Zwjazkowe knježerstwo njemóže so na kubłanski fede­ralizm spušćeć, ale dyrbi so sobu wo to starać, zo zniži so ličba zbrašenych dźěći a młodostnych na spěchowanskich ­šulach.

DIMR so z etata zwjazkoweho sejma financuje. Jeho aktualna 7. lětna rozprawa, kotruž předstajichu zamołwići wčera w Berlinje, dobu wot julija 2021 do junija 2022 wopřija. W tutej rěka: „Po nimale 14 lětach winowatosće, inkluziju do kubłanskeho systema zawjesć, njewidźimy we wjetšinje zwjazkowych krajow signi­fikantne postupy nastupajo rozdźělenje financow a kompetencow.“ Kritika z tu- a wukraja pak je wulka. Bjez wjetšeho angažementa knježerstwa njebudźe postupa. W reprezentatiwnym naprašowanju w nowembrje štwórćina šulskich nawodnicow a nawodow wo ćežach inkluzije a integracije ćěkańcow rozprawješe.

Berlin/Hamburg (dpa/SN). Bywša zwjazkowa kanclerka Angela Merkel (CDU) je zastatki hladajo na politiku napřećo Ruskej přiznała. „Na agresiwitu Ruskeje dyrbjachmy spěšnišo reagować“, zwurazni wona w dźensnišim wudaću tydźenika Die Zeit. Merkel zhladuje při tym předewšěm na ruske wobsadźenje ukrainskeje połkupy Krim lěta 2014. Tehdy běchu so staty NATO na to dorozumili, dwaj procentaj swojeho nutřkokrajneho bruttoprodukta za zakitowanje wudać. „Němska njeje zaměr najebać zwyšenje docpěła“, bywša kanclerka wobžaruje. „A ja njejsym wšědnje k tomu namołwjała.“

Přizwolenje twara němsko-ruskeje pipeliny za zemski płun NordStream 2 pak nima tehdyša kanclerka za zmylk. Zakaz projekta by „klimu z Ruskej strašnje pohubjeńšił“, Merkel wujasni. Nimo toho njeje wotwisnosć wot ruskeho płuna jenički rezultat zhromadneho projekta pipeline. Dokelž bu mjenje płuna z Norwegskeje, Wulkeje Britaniskeje a Nižozemskeje dodawane, dyrbješe so Němska za hinašimi móžnosćemi rozhladować. Tak sta so Ruska z najwažnišim dodawaćelom zemskeho płuna.