Aktiwisća dalše akcije připowědźili
Berlin (dpa/SN). Přetorhnjenje protestow traješe jenož tydźeń: Skupina „Poslednja generacija“ je dalše a zesylnjene akcije předewšěm w Berlinje a Mnichowje připowědźiła. Woni chcedźa so wot dźensnišeho znowa na „žiłki towaršnosće“ kaž na přikład wobchadne zwiski koncentrować a je nachwilnje přetorhnyć, zdźěli čłon protestneje skupiny Henning Jeschke minjeny pjatk na nowinarskej konferency. Woni chcedźa wšědny dźeń towaršnosće mylić, k tomu budu tež zaso symboliske akcije.
Wot spočatka lěta blokuje skupina přeco zaso dróhi, při čimž so demonstranća na puće lěpja. Tež druhe akcije wulku kedźbnosć wuwabja. W Berlinje a Mnichowje su sudnistwa mjeztym mnohich aktiwistow k pjenježnej pokuće zasudźili. W Bayerskej su někotrych z nich samo prewentiwnje do jastwa dowjezli, dokelž běchu dalše mylenja připowědźili. Skupina žada sej mjez druhim wobmjezowanje spěšnosće na zwjazkowych awtodróhach na 100 kilometrow na hodźinu abo 9-eurowski tiket.
Wolijowy embargo nětko płaći
Brüssel (dpa/SN). Wolij z Ruskeje smě so wot dźensnišeho jenož hišće we wuwzaćnych padach do EU dowožować. Zakaz dowožowanja je 27 čłonskich statow w juniju jako sankciske postajenje ruskeje wójny přećiwo Ukrainje dla wobzamknyło.
Tohorunja płaći rjadowanje, kotrež ma Rusku nuzować, zemski wolij přichodnje za maksimalnje 60 US-dolarow na barrel woteběrarjam w druhich statach předawać. Dźensa rano je płaćizna za wolij trochu stupała. Fachowcy twjerdźa, zo zwisuje to z wolijowym embargom.
To a tamne (05.12.22)
W Lipsku su so wčera prěnje hodowne wiki za psy wotewrěli. Při Cottaskim puću na zapadźe města móža dwu- a štyrinohače woměrje podłu 25 budkow wikowarjow dundać, zdźěli organizatorka Monika Eckstein-Scheffler. W poskitku maja tam samoplećene nowe našijne paski a za toho abo tamneho zbožowneho psa tež probu picy. Horce wino pak tam njepředawaja.
Klětu ma so wosebje błyšćić – znajmjeńša hdyž dźe po firmje w USA. „Viva Magenta“ bu jako definowaca barba přichodneho lěta wuzwolena, zdźěli předewzaće Pantone. Wona „wotbłyšćuje elan a móc“, rěka we wopodstatnjenju. „To je barba, kotraž ma swoje korjenje w přirodźe a nowy signal sylnosće zwuraznja.“ Magenta je „sylna a bjez stracha“ a zdobom wjesołosć a optimizm podpěruje.
Wita wusud přećiwo Maierej
Lipsk (dpa/SN). Sakska justicna ministerka Katja Meier (Zeleni) wita wusud přećiwo bywšemu zapósłancej AfD w zwjazkowym sejmje Jensej Maierej . „Rozsud je po cyłym Zwjazku směrodajny. Přećiwnicy wustawy njesmědźa prawo postajeć“, politikarka wčera wujasni. Do toho bě Lipšćanske słužbne sudnistwo za sudnikow rozsudźiło, Maiera dočasnje na wuměnk pósłać. Wón bě swój mandat při wólbach zwjazkoweho sejma 2021 zhubił a chcyše so zaso do sudniskeje słužby wróćić. Wčerawši wusud njeje hišće płaćiwy.
Nowe rjadowanja chorownjam
Berlin (dpa/SN). Financowanje chorownjow w Němskej ma so po planach zwjazkoweho strowotniskeho ministra Karla Lauterbacha (SPD) sylnišo wot hospodarskeho ćišća wuwjazać. Zwjazkowy sejm dyrbješe k tomu dźensa prěni paket zakonjow z rjadowanjemi wobzamknyć, kotrež maja mjez druhim wjace pjenjez za dźěćace chorownje a wolóženja za napjate połoženje hladanskeho wobłuka wunjesć.
Lawrow dyrbi wonka wostać
Ze zazběhom decembra je so w Sakskej sněžiło. Předewšěm na ...
To a tamne (02.12.22)
Pacient Ewangelskeje kliniki w Berlinje bu na wopačnej stronje operowany. „Wobžarujemy, zo je w našim domje k zaměnjenju dóšło“, zdźěli wčera rěčnica domu. Tak dyrbješe so muž kónc nowembra zranjenja na lěwej noze dla operować. Tola lěkarjo su strowu prawu nohu „lěkowali“. Poprawom je wěstotnych naprawow, zo by so tajkim zmylkam zadźěwało. Tola tón króć je so wšitko nimo kuliło. Pacient dósta nětko financielne wotškódnjenje.
Kolesowarja z warnowanskim lacom je šofer na zwjazkowej awtodróze A4 pola Kamjenicy w nocy na štwórtk wuhladał a policiju zawołał. Zastojnicy su kolesowarja skónčnje zadźerželi. Kaž so wukopa měješe panu z awtom. Šmóratko, z kotrymž móhł wo pomoc prosyć, žane njeměješe, ale na zbožo koleso. Nětko ma wón wězo z chłostanskim pjenjezom ličić.
Wothłosuja wo zrěčenju Ceta
Berlin (dpa/SN). Zwjazkowy sejm dźensa po lěta trajacych debatach wo ratifikowanju wikowanskeho zrěčenja EU z Kanadu (Ceta) wothłosuje. Tute wot septembra 2017 přechodnje płaći, ale jenož we wobłukach, za kotrež je EU zamołwita a nic jeje čłonske staty. Tamne dźěle zrěčenja njejsu dotal přesadźene, dokelž ratifikacija wotzamknjena njeje. W EU pobrachuje hišće přihłosowanje wjacorych statow, mjez druhim tež Němskeje.
Sylne NATO: wójsko trěbne
Berlin (dpa/SN). Generalny sekretar NATO Jens Stoltenberg namołwi Němsku, swoje wójsko derje wuhotować. Inwesticije do nowych lětadłow, helikopterow, łódźow a podnurjakow su wažne. Wěstotne połoženje po ruskej nadběhowej wójnje na Ukrainu je so změniło, Stoltenberg dźensa na Berlinskej wěstotnej konferency zwurazni. W přichodźe je sylne němske wójsko trěbne. Hladajo na zymu dyrbi pomoc za Ukrainu pokročować a so dale zesylnić, wón wujasni.
Šćěpjenske centry zawru
Minister Pólsku wótrje kritizuje
Podstupim (dpa/bb/SN). Braniborski wobswětowy a agrarny minister Axel Vogel (Zeleni) zastopnjuje staw namjezneje rěki Wódry po masiwnym mrěću rybow w lěću dale jako alarmowacy. Zdobom namołwi Pólsku, wodźenje selow do rěki wozjewić. Zwjazkowa ministerka za wobswět Steffi Lemke (Zeleni) chce jutře zhromadnje z Vogelom narodny park „Rěčna dolina delnjeje Wódry“ pola Schwedta wopytać a so wo aktualnym stawje Wódry informować.
We wusyłanju „Braniborska aktualnje“ w rozhłosu Berlin-Braniborska (RBB) minister zawčerawšim zwurazni: „Wódrje so přederje njeńdźe. Ekologisku katastrofu při Wódrje hišće požiwali njejsmy. Tuchwilu je wodźenje selow do rěki zaso runja w lěću tutoho lěta. Warnowanja za Wódru njemóžemy zběhnyć.“
Naprawy spěšnišo zwoprawdźić
Berlin (dpa/SN). Wo wažnych projektach nastupajo wutwar wobnowjomnych energijow a druhich wulkich infrastrukturnych naprawow měli sudnistwa přichodnje spěšnišo rozsudźić. Zwjazkowy kabinet je wčera naćisk zakonja wo pospěšenju zarjadniskich sudniskich jednanjow wobzamknył, kotrež na přikład wutwar kolijoweje syće, lětanišćow, dalnodróhow, zwjazkowych wodowych dróhow, wětrnikow abo wjetše zastaranske płunowe powody zmóžnja.
„Němska trjeba wjace tempa“, wu- zběhny zwjazkowy justicny minister Marco Buschmann (FDP). Pospěšenje wulkich infrastrukturnych projektow je „wažne wuměnjenje za modernizowanje našeho kraja, za přichodny rozrost a derjeměće“. Rěčnik knježerstwa Steffen Hebestreit wotmołwi na prašenje, hač móhli to tež za druhe projekty nałožować: „Jelizo wšitko priorizujemy, njeje hižo ničo priorizowane“. Nětko dźe wo to, zo bychu na sewjeru terminale za běžity płun nastali.
Zo móhli Židźa wěsći žiwi być
Społnomócnjeny narodnu strategiju přećiwo antisemitizmej předstajił
Berlin (dpa/SN). Zo bychu Židow w Němskej lěpje před předsudkami, njepřećelstwom a hidu škitali, chce zwjazkowe knježerstwo přichodnje systematisce na wšěch statnych a towaršnostnych runinach přećiwo antisemitizmej postupować. Zdobom chcedźa židowske žiwjenje we wšědnym dnju wotbłyšćować, a tak na na to pokazać, kajke wulke je to wobohaćenje. Społnomócnjeny za antisemitizm Felix Klein je wčera k tomu prěnju „narodnu strategiju přećiwo antisemitizmej a za židowske žiwjenje“ předstajił.
