Etat Sakskeje: Serbska rada z jednaćelnju
Rada za serbske naležnosće w Sakskej změje bórze prěni raz swójsku jednaćelnju. To je wulki wuspěch wojowanja radźićelow, kotřiž móža přichodnje serbske zajimy efektiwnišo zastupować.
Drježdźany (dpa/SN/mb). Sakska chce w přichodnymaj lětomaj telko pjenjez wudać kaž nihdy do toho. Wčera wječor je Sakski krajny sejm dwójny etat za lěće 2023 a 2024 we wobjimje 49,34 miliardow eurow wobzamknył. Wšitke namjety za změny w etaće opoziciskeju stronow AfD a Lěwicy su CDU, Zeleni a SPD wotpokazali.
„Na zakładźe aktualnje wysokich dawkowych dochodow a w zašłosći wutworjenych rezerwow móžachmy etat takle zestajić“, rozłoži sakski financny minister Hartmut Vorjohann (CDU). Přiwšěm ma wón wobmyslenja. „Wot zasady sem měrja so wudawki po dochodach. Tule pak zdźěla trochu wotchilamy.“
Apel strowotniskej ministerce
Drježdźany (dpa/SN). Dokelž medikamenty pobrachuja, su sakscy prezidenća lěkarskeje komory, zubnolěkarskeje komory kaž tež komory apotekarjow saksku strowotnisku ministerku Petra Köpping (SPD) k spěšnemu jednanju namołwjeli. Tuchwilu hrozy wulki strach, zo njemóže strowotniski wobłuk zastaranje ludźi garantować, prezidenća komorow wčera w zhromadnym wozjewjenju zdźělichu. Postajenja strowotniskeje politiki njehodźa so w realiće zwoprawdźić.
Zelenyskyj we Washingtonje
Washington (dpa/SN). Ukrainski prezident Wolodymyr Zelenskyj je so na krótki wopyt do USA podał. To je jeho prěnja jězba do wukraja wot spočatka ruskeje wójny před nimale dźesać měsacami. Hłowna tema su dalše dodawanja brónjow. Zaměr je skrućenje stability a woborokmanosće swojeho kraja, pisaše wón dźensa rano na Twitteru. Wječor zetka so wón z prezidentom USA Joewom Bidenom.
Plahuja dale a mjenje swini
Praskotakow so wzdać
Osnabrück (dpa/SN). Prezident Zwjazkoweje lěkarskeje komory je so za trajny zakaz praskotakow wuprajił. „Njerjadowane praskotanje je hubjene za wobswět a klimu a wjedźe přeco zaso k ćežkim zranjenjam“, Klaus Reinhardt tele dny wuzběhny. Předewšěm dźěći, młodostni a młodźi dorosćeni pod 25 lětami so zranja. „To woznamjenja sylne přidatne poćežowanje za sobudźěłaćerki a sobudźěłaćerjow w chorownjach, kotřiž tak a tak hižo na hranicy swojich mocow dźěłaja“, Reinhardt rozłoži. Minjenej lěće bě zakazane w Němskej praskotaki předawać. A tež priwatne wohnjostroje běchu jenož we wěstych kónčinach dowolene. Pozadk toho běchu wućežene chorownje za čas koronapandemije. Lětsa tajkich wobmjezowanjow njeje.
Reinhardt přeješe sej tež hladajo na połoženje na swěće, so praskotakow wzdać. Tak njeměli z raketami nowe lěto witać, hdyž je w samsnym času wójna w Europje. „Pola mnohich ćěkancow z wójnskich kónčin silwesterske praskotanje hubjene začuća wuwabja. Město toho zo ludźo pjenjezy za praskotaki wudawaja, měli je radšo za něšto zmysłapołne wužiwać a je darić.“
Dźěło přetorhnyli
Zaso ruske jednotki w Běłoruskej
Kijew (dpa/SN). Po informacijach ukrainskich medijow je Ruska znowa jednotki wójska na hranicu mjez Běłoruskej a Ukrainu přepołožiła. Tak su nimo pancerow a transporterow tež najwšelakoriše wojerske nastroje blisko hranicy dowjezli, rozprawještej wčera nowina „Ukrajinska prawda“ a agentura Unian powołujo so na běłoruski kolektiw hackerow „Hajun Project“. Wosebita skupina kompjuterowych fachowcow sćěhuje wšitke akcije tam zaměstnjenych ruskich jednotkow.
Wobkedźbowarjo wuchadźeja z toho, zo jedna so pak wo přeměstnjenje ruskich jednotkow ze sewjerneje a srjedźneje Běłoruskeje abo wo krótkodobne přepołoženje k zhromadnym manewram z běłoruskim wójskom na ukrainskej mjezy. Za dalše nadpady pak njejsu na hranicu přepołožene zwjazki tuchwilu sylne dosć, fachowcy měnja.
Rekord bjez wjesela
Wutroby pozběhnyć a dušu zhrěć
Drježdźany/Zhorjelc (dpa/SN). W hodownym času su cyrkwje w Sakskej kopate połne. Dostojne a swjatočne wuhotowanje kemšow na patoržicy a hodźoch nimo syły wěriwych tež mnoho njekřesćanow přićahuje – lětsa wšak wosebje. Po lětomaj wobmjezowanych Božich słužbow korony dla chcedźa wosady w Sakskej lětsa zaso po zwučenym wašnju swjećić. „Ličimy z połnymi cyrkwjemi“, praji rěčnica ewangelskeje cyrkwje Sakskeje, Tabea Köbsch. Hižo w adwentnym času su ludźo koncerty, swjedźenje a druhe cyrkwinske zarjadowanja we wulkej ličbje wopytali. Tež w biskopstwomaj Drježdźany-Mišno a Zhorjelc z wulkej syłu hodownych wopytowarjow liča. „Škitne naprawy přećiwo koronje drje hižo nimamy, njehladajo na to wopytowarjow prosymy, so dobrowólnje z nahubnikom škitać“, Tabea Köbsch dale wuwjedźe a doda: „Zo dźiwamy na desinfekciju rukow před swjatym woprawjenjom, so samo zrozumi.“
To a tamne (21.12.22)
Podźěl ekomiliny přiběrał
Berlin (dpa/SN). Lětsa je podźěl ekomiliny w zwisku z přetrjebu miliny w Němskej rekordnu hódnotu docpěł. Kaž Zwjazk energijoweho a wodoweho hospodarstwa (BDEW) dźensa w Berlinje zdźěli, je to 47 procentow porno 42 procentam loni. Zdobom pak je podźěl miliny, kotraž so z brunicy a kamjentneho wuhla produkuje, wot 28,3 procentow na 31,9 procentow přiběrał. Přičina toho je, zo zaso wjace brunicowych milinarnjow dźěłaja, tak zo móhli płun zalutować.
Kasy maja wjace płaćić
Berlin (dpa/SN). Zwjazkowy strowotniski minister Karl Lauterbach (SPD) chce zastaranje z medikamentami za dźěći polěpšić. Chorobne kasy měli wjace za srědki zapłaćić. „Dyrbimy so kruteje sumy wzdać. Hišće dźensa chcu postajić, zo maja kasy za medikamenty 50 procentow wjace płaćić hač postajenu sumu“, wuzběhny wón dźensa w rańšim magacinje ARD. Němska za producentow medikamentow atraktiwne wiki njeskića. Firmy tuž srědki skerje w druhich krajach předawaja.
Trumpej hroža konsekwency
Z premiju wo personal wabić
Berlin (dpa/SN). Lěwica žada sej 10 000 eurow premije za něhdyšich přistajenych w strowotnistwje, kotřiž měli nětko na stacijach w chorownjach pomhać. Z tym chcyła (Lěwica) na aktualne połoženje w strowotnistwje reagować, hdźež je tuchwilu wulka nuza personala dla. Trěbne su nimo toho wjace dźěłowych městnow, wjace mzdy a lěpše dźěłowe wuměnjenja, wuswětli předsyda Lěwicy Martin Schirdewan wčera w Berlinje. Dale sej wón žadaše, zo maja so medikamenty zaso w Europje produkować a kapacity za to wotpowědnje rozšěrić.
Pozadk tutych žadanjow su njedostatki, kotrež so tuchwilu w žołmje chorosćow a přećeženju mnohich klinikow pokazuja. „Pacientam hrozy akutna situacija, zo njebudu dosahajcy zastarani“, Schirdewan podšmórny.
