Něhdźe 50 000 protestowacych je sej wčera w armenskej stolicy ...
Přidatne pjenjezy za kulturu
Berlin (SN). K zesylnjenju kulturneho spěchowanja wot skónčenja zmilinjenja brunicy potrjechenych kónčin chce zwjazkowe knježerstwo 20 wot Zwjazka spěchowanym institucijam a projektam klětu wjace hač 21 milionow eurow přidatnje přewostajić. Hač do lěta 2038 su cyłkownje wjace hač 200 milionow eurow za spěchowanje cyłostatnje wuznamnych předewzaćow we wobłuku zakonja k sylnjenju strukturow we wuhlowych kónčinach zaplanowali.
K tomu rjekny kulturna statna sekretarka Monika Grütters (CDU): „Při kóždej wuspěšnej strukturnej změnje hraje wobchadźenje z kulturu rozsudnu rólu. Wona je wažny faktor za region, přinošuje k žiwjenskej kwaliće a polěkuje regionalnej identiće w časach přewróta.“ Ministerce je wažne, zo wot wšeho spočatka sylnje do kulturnych poskitkow inwestuja. „Tohodla je kulturne spěchowanje wažny wobstatk zakonja k sylnjenju strukturow we wuhlowych kónčinach.“
Cyrkwje kemšow dla pod ćišćom
Berlin (dpa/SN). Předsydka zwjazka lěkarjow w zjawnej strowotniskej słužbje Ute Teichert sej žada, wšitke přitomnostne hodowne Bože słužby po wšej Němskej wotprajić. „Dokelž wěmy, kak spěšnje móže so wirus runje na Božich słužbach rozšěrjeć, njesměmy hladajo na wysoke ličby infekcijow hody žadyn přidatny riziko na so wzać“, lěkarka nowinarjam rjekny. Wona kritizuje, so njejsu mnozy chutnosć połoženja přeco hišće spóznali. Podobnje bě to wčera zastupowacy ministerski prezident Sewjerorynsko-Westfalskeje Joachim Stamp (FDP) zwuraznił. Tež wón ma za trěbne, hladajo na wuwiće ličby natyknjenjow a połoženje na intensiwnych stacijach kemše wotprajić.
Předsyda Rady ewangelskeje cyrkwje Heinrich Bedford-Strohm pokazuje porno tomu na „ekstremnje krute hygieniske koncepty“ na Božich słužbach. „Ličba wopytowarjow je jara wobmjezowana. Njezmějemy žane přepjelnjene Bože słužby“, rjekny wón powěsćerni dpa.
To a tamne (23.12.20)
Spěwace a rejwace rjadniske sotry w Francoskej zbudźeja w interneće wjele kedźbnosće. Pod hesłom „Zhromadnje hač do kónca“ su mały musical zhotowili, z kotrymž zběraja pjenjezy za sobusotru, kotraž chce klóšter w Semur-en-Brionnaisu ze starobnych přičin wopušćić. Z pjenjezami chcedźa klóšter na juhu kraja wotpowědnje přetwarić, zo móhła sotra dale w nim bydlić.
Rujacy jeleń je w Bayerskej zasadźenje policije zawinował. Žona w allgäuskim Günzachu bě policiju informowała, dokelž bě w lěsu někoho wo pomoc wołać słyšała. Na to pósłachu wjetšu ličbu policistow a helikopter ze specialnej kameru, zo bychu lěs přeslědźili. Dwě hodźinje pozdźišo akciju skónčichu. Helikopter bě jenož slědy jelenja wuhladał. Po dorěči z hajnikami su sej nětko wěsći, zo bě rujacy jeleń „z wulkej wěstosću“ na akciji wina.
Kretschmer so starosći
Drježdźany (dpa/SN). Sakski ministerski prezident Michael Kretschmer (CDU) starosći so přiběraceje polarizacije towaršnosće koronapandemije dla. W běhu prěnjeje žołmy infekcijow bě respekt před njeznatej chorosću ludnosć hišće zwjazował, Kretschmer praji. Na to přiběraše lochkomyslnosć. Wěste kruhi wědomje wopačnosće šěrja, zo bychu towaršnosć pačili a destabilizowali. „Zo demonstranća eksistencu wirusa prěja, hladajo na połne chorownje lědma wutraješ.“
Lětsa žadyn rozrost wjace
Mnichow (dpa/SN). Tři hospodarske slědźenske instituty su swoju zhromadnu konjunkturnu prognozu za europasmo znižili. Institut Ifo w Mnichowje, KOF w Zürichu a Istat w Romje njeliča w nachilacym so štwórtym kwartalu wjace z rozrostom, ale z dale woteběracej produkciju wo 2,7 procentow. To by za cyłe lěto 2020 minus 7,3 proc. wučinjało, instituty dźensa zdźělichu. Za prěni kwartal 2021 liča z rozrostom 0,7 proc.
Znowa parlament wolić
Wjace hač tysac Lkw-jow čaka we Wulkej Britaniskej na awtodróze M20 ...
Wot njedźele šćěpja přećiwo koronje
Berlin/Mainz (dpa/SN). Němska hotuje so runja druhim krajam na zahajenje šćěpjenskeje akcije přećiwo koronawirusej. Po přizwolenju seruma přez Europsku uniju je Mainzska firma Biontech zhromadnje ze swojim ameriskim partnerom Pfizer hišće wčera wječor připowědźiła, lěk ze składow wzać a zamołwitym přewostajić. Njedźelu chcedźa šćěpić započeć. Strowotniski minister Jens Spahn (CDU) a šef Biontech Ugur Sahin staj sej zdobom wěstaj, zo srědk tež přećiwo mutaciji w Jendźelskej skutkuje.
Němska a wjetšina tamnych europskich krajow stej wčera zapućowanje ludźi z Wulkeje Britaniskeje přetorhnyłoj, zo bychu rozšěrjenju noweho wirusa zadźěwali. Dalše kraje chcychu dźensa slědować. Zwjazkowe knježerstwo je wčera wječor zapućowanje z Wulkeje Britaniskeje a Južneje Afriki dale wobmjezowało. Tak je wozydłowniskim předewzaćam w dalokej měrje zakazane wosoby wottam z lětadłom, železnicu, busom abo łódźu transportować. Wukaz płaći najprjedy raz hač do 6. januara.
Koch: Hody rozumnje swjećić
Cyrkwje z nowymi formatami korony dla – dorazny apel knježerstwa
Berlin (dpa/SN). Katolski Berlinski arcybiskop Heiner Koch namołwja, hladajo na koronapandemiju swójbne swjedźenje kaž tež Bože mšě k hodam rozumnje swjećić. Koronapandemije dla je nuznje trjeba kontakty redukować, rozłoži Heiner Koch jako předsyda komisije za mandźelstwo a swójby Němskeje biskopskeje konferency wčera w Berlinje. Zo njebudu tež wěriwi hody po zwučenym wašnju swjećić móc, je jemu jeno ćežko znjesliwe. Škit ludźi pak je wokomiknje wažniši, biskop rjekny.
To a tamne (22.12.20)
W milinowodźe wisajo wostał je jako rumpodich předrasćeny muž, kiž bě w Kaliforniskej z motorizowanym parašutom po puću. Pomocnicy móžachu jeho njedaloko Sacramenta njezranjeneho wuchować. Sanki pak njemóže wón nětko wjace wužiwać. Wohnjowi wobornicy jemu radźachu so tola zaso tradicionalnje na sanjach wot konjow ćahnyć dać.
Zwada, štó trjebany čajowy měšk zrumuje, je w durinskim Sömmerda k bijeńcy mjez mandźelskimaj wjedła. 52lětna žona ćisny čajowu kanu za mužom a kopny jemu do genitalijow, jako chcyše ju ze jstwy ćahnyć. Wona 77lětnemu wumjetowaše, zo bě ju do mjezwoča bił a zo chcyše ju po schodźe dele storčić. Policija wšak nětko přećiwo woběmaj zranjenja ćěła dla přepytuje.
Bože domy budu wotewrjene
Köln (B/SN). Někotre sakske wosady chcedźa swoje cyrkwje wopytowarjam lětsa přez hody wotewrjene wostajić. Cyrkwinski krajny zarjad podpěruje z tym akciju „Swěca wostanje zaswěćena – w Božej nocy“ z plakatami a dalšimi wabjenskimi akcijemi. Pozadk akcije je, zo ma so při wšěch wobmjezowanjach korony dla mnohim ludźom wopyt w cyrkwi zmóžnić. Wšako hrozy strach, zo njemóža so wšitcy wěriwi na planowanych krótkich Božich słužbach wobdźělić – pak strowoty pak njewěstosće dla. „Wěriwym je zwučeny puć do cyrkwje wažny, zo by jim hodowne poselstwo dóšło hač do wutroby. To ma tež lětsa tak być“, krajna cyrkej informuje.
Cyrkej měła zmužićiša być
