Gassen: Lockdown zwrěšći
Berlin (dpa/SN). Šef cyłoněmskeho zwjazka kasowych lěkarjow (KBV) Andreas Gassen z tym liči, zo wot wčerawšeho płaćiwy cyłoněmski lockdown, razne wobmjezowanja zjawneho žiwjenje koronawirusa dla, „zwrěšći. Njewuchadźam z toho, zo docpějemy hač do 10. januara widźomnje mjeńšu ličbu natyknjenjow a smjertnych padow.“ Na tym tež podlěšene wobmjezowanje swobodneho pohibowanja ničo njezměni. „Lockdown, a byrnjež hišće tak kruty był, njeje žana kmana dołhodobna strategija za bój přećiwo pandemiji“, rjekny Andreas Gassen Berlinskim nowinarjam. Město toho měło so wjace za škit rizikowych skupin w starownjach a hladarnjach činić. Nimo toho měli so prudy ludźi přerjadować, na přikład z wjace busami a železnicami kaž tež z darmotnymi taksijemi za rizikowe skupiny, sej šef KBV žada.
Předsyda swětoweho zwjazka lěkarjow Frank Ulrich Montgomery bě wčera rjekł, zo liči z podlěšenjom lockdowna hač do nalěća a zo infekcije hakle potom jasnje woteběraja.
Kretschmer za dalše naprawy
Sakski ministerski prezident ludźi koronawirusa dla doraznje namołwja
Drježdźany (dpa/SN). Sakski ministerski prezident Michael Kretschmer (CDU) dalše naprawy w boju přećiwo koronawirusej njewuzamkuje. W krajnym sejmje powołaše so wón wčera na najnowše wuhódnoćenja Roberta Kochoweho instituta a Berlinskeje Humboldtoweje uniwersity. Po nich stej Durinska a Sakska hladajo na tak mjenowanu nutřkokrajnu mobilitu po wšej Němskej na wodźacym městnje. Hdyž pak je wjele ludźi po puću, je to „ryzy jěd“ za wobknježenje pandemije. Kretschmer připowědźi, zo chcył połoženje přichodne dny dale wuhódnoćić a potom wo dalšich naprawach rozsudźić. Hewak hrozy „ekstremne nuzowe połoženje“.
Wótry wołojnik (17.12.20)
To a tamne (17.12.20)
Pod wliwom drogow stejaceho wučerja jězbneje šule je policija w Darmstadće zadźeržała, jako bě ze šulerjom w awće po puću. Drogowy test reagowaše pozitiwnje na hašiš, policija zdźěli. Anonymni swědcy běchu do toho na to skedźbnili, zo wučer pod wliwom drogow dźěła. Za njeho a šulerja bě jězba po kontroli nimo. Nětko pruwuja, hač smě wučer swoje dźěło scyła hišće dale wukonjeć.
W biotonje su paduši w sewjerorynsko-westfalskim Bergisch-Gladbachu trezor wotwjezli, kotryž běchu krótko do toho w bydlenju pokradnyli. Wuprózdnjene sudobjo steješe před zachodom wjaceswójbneho domu a je runje tak preč kaž trezor. W nim składowane běchu dokumenty, lutowanska knižka a wjacore sta eurow. Paduši běchu so přez balkon do wopušćeneho bydlenja 58lětneho zadobyli, wšitke rumnosće přeborkali a trezor sobu wzali.
Biden chcył młodeho ministra
Washington (dpa/SN). Přichodny prezident USA Joe Biden chce swojeho poměrnje młodeho bywšeho demokratiskeho kontrahenta w prezidentskim wólbnym boju Pete Buttigiega do noweho knježerstwa powołać. Biden planuje, 38lětneho Buttigiega jako wobchadneho ministra zasadźić, kaž medije rozprawjeja. Buttigieg by prěni wuznawacy homoseksualny minister na zwjazkowej runinje USA był. Wón bě sej we wólbnym boju wulke připóznaće a sympatije zdobył.
Wobmjezowanja hač k jutram
Berlin (dpa/SN). Předsyda swětoweho zwjazka lěkarjow Frank Ulrich Montgomery je sej wěsty, zo traja wobmjezowanja zjawneho žiwjenja koronapandemije dla hač do nalěća. Byrnjež šćěpjenje prjedy móžno było, hač dotal myslene, dyrbja ludźo „znajmjeńša hač k jutram“ z wobmjezowanjemi žiwi być, rjekny Montgomery nowinarjam. Modelowe wobličenja pokazuja, zo so ličba nowoinfekcijow najzašo wot kónca januara pod 50 na 100 000 wobydlerjow pomjeńši.
Přećiwo wotsunjenju ćěkancow
Direktnje před radnicu bayerskeho Augsburga su klimowi aktiwisća ...
Spěchuja tež běžne kóšty
Podstupim (SN). Jako prěni zwjazkowy kraj chce Braniborska plahowarjow wowcow lěpje před nadpadami wjelkow škitać. Kraj njespěchuje wotnětka jenož nakup škitnych płotow a stadła škitacych psow, ale wot lěta 2021 tež běžne kóšty za płoty a psy. Ministerstwo za wobswět a ratarstwo kraja bě so do toho intensiwnje wo pjenježne wobdźělenje Zwjazka prócowało. Minister za ratarstwo Axel Vogel rjekny: „Wjeselu so, zo je so poradźiło prawniske zadźěwki přewinyć, zo móhł so Zwjazk pjenježnje na nastawacych přidatnych kóštach wobdźělić. Tak móžemy plahowarjow skotu na pastwach lěpje podpěrać.“
Ratarjo móža próstwy wotnětka zapodać. Wot noweho lěta braniborske ratarske ministerstwo potom wo přizwolenju rozsudźi. Ze spěchowanjom běžnych kóštow chce plahowarjam přidatne wudawki wjelkow dla zarunać.
Skład hotowy
Zwjazkowy sejm posledni króć
Berlin (dpa/SN). Zwjazkowy sejm je dźensa poslednje lětuše wuradźowanja zahajił. K zahajenju je zwjazkowa kanclerka Angela Merkel (CDU) na prašenja zapósłancow wotmołwjała. Centralna tema bě kurs zwjazkoweho knježerstwa w aktualnej koronapandemiji. Wot dźensnišeho płaća nowe krute wobmjezowanja zjawneho žiwjenja korony dla. Na próstwu CDU/CSU a SPD zaběraše so zwjazkowy sejm tež z temu, kak narodnu strategiju šćěpjenja zwoprawdźić. Prěni serum přećiwo koronawirusej móhł hišće do hód cyłoeuropske přizwolenje dóstać.
Dalša tema bě dawkowa politika jako sćěh pandemije. AfD sej žada, zo móže kóždy, kiž doma dźěła, nastawace kóšty njeběrokratisce wot dawkow wotćahnyć.
To a tamne (16.12.20)
Hrajkacej so kóčce stej při šćěkanju mylnje kuchinske kachle zaswěćiłoj a tak woheń zawiniłoj. 33lětny wobsedźer bě bydlenje w Zwickauwje wopušćił a kóčce do kuchnje zawrěł. Na kachlach stejacy plastowy koš a nowiny so zapalichu. Pobrachowaceho kislika dla njemóžeše so woheń „na zbožo“ na cyłe bydlenje wupřestrěć. Za wobě kóčce pak bě woheń tragiski, dokelž stej w nim zahinyłoj. W bydlenju nasta škoda 20 000 eurow.
Nowy koncept wubědźowanja „Miss Germany“ žněje dobry wothłós. Na wšě 15 000 žonow je so za nje přizjewiło. 32 z nich na internetnej stronje wo swojich dóńtach rozprawja, wo chorosćach, wumocowanju abo depresijach. Po měnjenju organizatorow njejsu wubědźowanja rjanolinkow hižo načasne. Dźensa pytaja za žonami, kotrež móža z přikładom być.
