Zajimawy a napjaty čas był
W běhu 25 lět su w Choćebuskej Serbskej kulturnej informaciji wjacori ludźo na wěsty čas dźěło našli. Horst Adam je so někotrych za dopomnjenkami na čas w Lodce prašał.
Angela Fuchsowa: Běch wot spočatka pódla. Hromadźe z Milenu Stockowej mějachmoj nadawk, Lodce wobličo dać. Tójšto noweho je na naju přišło. Bě rjenje, zo móžachmoj swoje ideje zwoprawdźić. Často njebě to lochko, wšako měješe tón abo tamny hinaše předstawy z Lodku. Wažne namaj tež bě pytać partnerow a z nimi zwiski wutworić. Sym drje jenož dwě lěće w Lodce dźěłała, ale bě to zajimawy a předewšěm napjaty čas.
Manuela Drinkmannowa: Wot lěta 1997 do 2007 běch w Lodce přistajena. Tón čas mam w najlěpšim pomjatku, dokelž bě wažny dźěl mojeho žiwjenja. Wšědnje čakaše na mnje něšto noweho. Wosobinsce bě mi wažne, zo sym tam nawuknyła prawje serbsce rěčeć. To je mi dźensa w dźěle na polu projekta Witaj wulka pomoc.
Móhli akciju rady dwójce wob lěto přewjesć
Sabine Gräfe z Porchowa: Běch z dźowku a wnučku na swójbnym koncerće w Budyskim SLA. A wopyt je so na kóždy pad wudanił. Dźěći su so jara prócowali, a program bě cyle pisany. Bych sej tajke něšto časćišo přała. Mam za spomóžne, zo wuměłcy dźěćom hudźbu zbližeja; a naš dorost pytnje, kak lóštna móže wona być. Dorosćeni maja so wězo tróšku ćešo sobu spěwać a rejwać. Hudźba a reje pak móža telko žiwjenskeje radosće šěrić, to je wulkotne.
Steffi Vogt z Budyšina: Naša dźowka je na programje swójbneho koncerta aktiwnje sobu skutkowała, a to jako čłonka chóra Serbskeje zakładneje šule Budyšin. Mi so Hornjołužiski festiwal dźěćaceje hudźby jara spodoba, dokelž je wulkotna wěc. Mojedla móhli tajku akciju kóžde lěto abo samo dwójce wob lěto přewjesć. Pytnješ, kak to dźěćom tyje a kak je spěchuje. Rjenje tohorunja je, zo hudźba wšelakore generacije zwjazuje – hudźba prosće wožiwja!
Žane prawe wólby to njebyli
Přichodny zwjazkowy prezident Němskeje budźe dr. Frank-Walter Steinmeier. Wjetšina Zwjazkoweje zhromadźizny je 61lětneho politikarja SPD wčera w prěnim wólbnym kole na čoło němskeho stata wuzwoliła. SN su so wobhonili, što čitarjo k tomu měnja.
Dr. Annett Brězanowa, sobudźěłaćerka Serbskeho instituta z Dobrošec: Mi bě wčerawše zarjadowanje přehładke, přepředwidźomne, wuslědk dźě bě hižo do toho jasny – poprawom njejsu to žane prawe wólby byli. A koho tam jako takrjec přerězk ludu předstajichu – wólbne žony a wólbnych muži, kotřiž su nimo zapósłancow sejma prezidenta wolić směli – to bě luta prominenca. Bych sej přała, zo móhli kandidaća kaž prof. dr. Christoph Butterwegge woprawdźe prawu šansu dóstać.
Krystof Rjeda z Pančic-Kukowa: Hač je Frank-Walter Steinmeier prawy muž za zastojnstwo zwjazkoweho prezidenta, to sprawnje prajene njewěm. Wón pak je w zašłosći často dopokazał, zo na mjezynarodnej runinje wě, kak ma wustupować. Myslu sej, zo njebudźe na škodu, hdyž wón swoje politiske nazhonjenja w našim kraju nałožuje.
Turněr lětsa bjez Tokarnje
Minjeny tydźeń je Jan Budar, direktor Załožby za serbski lud, zhromadnje ze serbskimi Sokołkami a Sokołami skupiny za 35. volleyballowy turněr wo pokal Domowiny 1. apryla w Budyšinje wulosował. Jurij Bjeńš je so někotrych wobdźělnikow prašał, što wo zestawje skupin dźerža, kotre mustwa faworizuja, kotry zaměr sami maja a što dźerža wo rozsudźe, mustwo z pólskeje Tokarnje wjac njepřeprosyć.
Benedikt Smoła ze Swinjarnje (Bratrowstwo Róžant): Našu skupinu posudźuju jako jara sylnu. Nimo Dwójneje nule a Handicapa budźemy tež nadźijomnje my w njej słowčko sobu rěčeć. Při tym njesměmy mustwo Serbskeho gymnazija Budyšin na žadyn pad podhódnoćić. Chcu ze swojim mustwom na podest, potajkim znajmjeńša bronzu docpěć. Sekundarny cil je lěpje so zaměstnić hač Škit Budyšin. Přećiwo njemu mějachmy w minjenych lětach stajnje horce a napjate hry. Za faworita mam skerje Serbski dom abo Dom biskopa Bena. Zo Tokarnju wjace přeprosyli njejsu, mje zwjesela. Wšako tak wot spočatka jasne njebudźe, štó turněr dobudźe. Sym lětsa tuž zaso bóle motiwowany a so bóle na turněr wjeselu hač hewak.
„Njeskomdźće lětuši ptači kwas!“
Dotal je sej něhdźe 650 ludźi jubilejny ptačokwasny program „Dejmantne a hinaše ptački“ SLA w Hornjej a Delnjej Łužicy wobhladało. Pjeć króć maja zajimcy hišće składnosć, zhromadnje z ansamblowcami dejmantny kwas w Chrósćicach, Bukecach a Budyšinje woswjećić. Dotalni hosćo přeradźa, čehodla móhł so wopyt wudanić – abo tež nic.
Křesćan Krawc z Hrubjelčic: Njeskomdźće lětuši ptači kwas Serbskeho ludoweho ansambla! Sym dožiwił předstajenje w Radworju. Wot spočatka hač do kónca je publikum ze zahoritosću sobu šoł. Za wšě generacije je něšto pódla.
Z kupcami a profijemi do rozmołwy přińć
Na Choćebuskej rjemjeslniskej přehladce prezentowaše so minjeny kónc tydźenja nimale 300 wustajerjow. Daniel Kubik je so tam za SN ze serbskimi předewzaćelemi a wopytowarjemi rozmołwjał.
Juro Hantška z Brjazyna, organizator zhromadneho serbskeho stejnišća: Zwjazk serbskich rjemjeslnikow a předewzaćelow chce ze zhromadnym stejnišćom pokazać, zo smy w regionje prezentni. Nimo nowe zwiski nawjazać dźe tež wo to, do rozmołwy z ludźimi přińć, so mjez sobu podpěrować a znatych zetkać. Škoda, zo njejsu Hornjoserbja tónraz pódla byli. Nadźijamy pak so, zo móžemy jich klětu zaso w Choćebuzu witać, zo bychmy so zaso tak sylnje kaž hewak na wikach prezentować móhli.
Roland Paprott, wustajer z Choćebuza-Škódowa: Wobdźělam so na Choćebuskich wikach hižo pjatnaće lět. Je wažne so na tajkej přehladce pokazać. Njezetkawaš jenož přichodnych kupcow, ale tež bywšich, kotřiž so za dobre dźěło podźakuja abo za kotrychž móžeš zaso něšto činić. Přehladka, to stej za mnje lóštnej dnjej, na kotrymajž móžeš z mnohimi ludźimi do rozmołwy přińć.
Je swoje slědy zawostajił
Jan Cyž, archiwar a bywši spěwar SLA: Wolfgang Frister bě dobry spěwar, je wustojny pianist a je so tu w běhu lětdźesatkow jara derje zažiwił. Je takrjec duša ansambla. Lědma hdy słyšach jeho w běhu lět prajić: „Ně, to móžno njeje.“ Wón je stajnje wšitko na swoje wašnje někak zmóžnił.
Diana Wagnerec, jednaćelka SLA: Česću sej měrne, přećelne, spušćomne a dźěławe wašnje Wolfganga Fristera. Jako swěrny přewodźer baleta přez lětdźesatki znaje wón nimale cyły repertoire ansambla a běše stajnje fleksibelny, w druhich spartach wupomhać a dirigaty najwšelakorišich programow – zdźěla bjez wulkeho přihota – přewzać. Přez swój wjelelětny angažement w najwšelakorišich chórowych zjednoćenstwach ma wón tež wulku zasłužbu na polu wuwića lajskeje hudźbneje kultury.
Wólbny bój budźe zajimawy
Bywši předsyda Europskeho parlamenta Martin Schulz chce jako kanclerski kandidat SPD nastupić a stronu nawjedować. Serbske Nowiny su so wobhonili, što čitarjo politikarjej přicpěwaja.
Dr. Měrćin Krawc, předsyda SPD w Budyšinje a wokolinje: Wažu sej Martina Schulzowe jasne słowa a wolu k solidariće, kotrež wón na mjezynarodnym parkeće doraznje zastupuje a za kotrež budźe so w našim kraju zasadźeć, zo by so wulka škałba w towaršnosći zaso zawrěła. Přicpěwam jemu, zo so ludźom přiwobroći a demokratiju z tuchwilneje krizy powjedźe.
Dr. Annalena Schmidt, projektowa sobudźěłaćerka Serbskeho instituta: Schulz je wupokazany europski politikar, jeho zwjazkopolitiske stejišćo pak hišće jasne njeje. Witam, zo je so raznje přećiwo prawicarstwu a prawicarskemu populizmej wuprajił a hornju hranicu ličby ćěkancow wotpokazał. Njeje cyle wěste, kotre šansy čerwjeno-čerwjeno-zelena koalicija z nim ma. Derje, zo njeje so přećiwo jej wuprajił. Wón ma lěpše šansy hač Gabriel. Škoda pak, zo njebě žana generaciska a splahowa změna w SPD, wobaj staj staraj mužej.
Wšěm ludźom měr a nadźiju
Je z wašnjom, zo sej k nowemu lětu mjez sobu wšo najlěpše přejemy. Mnozy ludźo pak maja spočatk lěta tež za přičinu, sej něšto wosebiteho předewzać abo přeć. Serbske Nowiny chcychu wědźeć, što sej Serbja do lěta 2017 přeja abo što su sej předewzali.
Sabina Mrózowa, naměstnica nawodnicy Budyskeje Serbskeje pěstowarnje „Jan Radyserb-Wjela“: Mi je najwažniše, zo wšitcy strowi wostanjemy, kubłarki a dźěći. Nastupajo našu pěstowarnju, kotraž je w nošerstwje Křesćansko-socialneho kubłanskeho skutka Miłoćicy, so nadźijamy, zo móžemy z dotalnym dźěłom pokroćować. Wosebje spokoja nas zhromadne dźěło ze staršimi. Wjeselimy so na mnohe rjane wjerški z našimi chowancami, kaž na ptači kwas, kotryž bórze zaso w Serbskim ludowym ansamblu woswjećimy.
Hłownje přihłosuja
Zwjazkowa kanclerka Angela Merkel (CDU) je připowědźiła, zo klětu znowa za zastojnstwo kandiduje. Smy so mjez Serbami wobhonili, što k tomu měnja.
Hanaróža Šafratowa z Bukec: Kandidaturu knjenje Merkel sym mjenje abo bóle wočakowała. Tróšku so prašam, što je wona za Němsku docpěła – jasny pak je jeje wukon na europskej runinje. Wona je jedna z tych, kotřiž hišće za Europu wojuja, a to je wosebje w dźensnišim času jara trjeba. Njewěrju do toho, zo móže kóždy jednotliwy stat Europskeje unije sam za sebje eksistować. Hačrunjež nimam wšitko za spomóžne, štož wot EU přińdźe, je wona zakładnje wažna.
