Swjatočnje su muslimojo po wšěm swěće dźensa skónčenje ...
Nowy program za sad a zeleninu
Drježdźany (dpa/SN). Pěstowarnje kaž tež zakładne a spěchowanske šule móža so zaso za europski šulski program z dwěmaj porcijomaj čerstweho sadu, zeleniny a mloka wob tydźeń přizjewić. Internetny program přizjewjenja za přichodne šulske lěto je wot dźensnišeho aktiwny, ratarske ministerstwo w Drježdźanach zdźěli. Nimo přidatnych witaminow su programy ze zajimawymi pedagogiskimi poskitkami zwjazane, na přikład z wopytom ratarskich zawodow, zdźěla sakski minister za ratarstwo Wolfram Günther (Zeleni). Dźěći pospytaja sad, zeleninu a čerstwe mloko a runočasnje zhonja, što k strowemu zežiwjenju słuša a kak žiwidła scyła nastanu.
Doba přizjewjenja traje hišće hač do 16. apryla. Zawody, kotrež su za wopyt dźěći wuzwolene, chcedźa spočatk meje wozjewić. Programowy dźěl „Sad a zelenina“ móža jenož zakładne a spěchowanske šule wužiwać. Programowy dźěl „mloko“ měri so nimo toho na pěstowarnje a žłobiki. Z wobdźělenjom na šulskim programje EU chcedźa strowemu zežiwjenju dźěći polěkować. Swobodny stat přinošuje 600 000 eurow.
Faeser za reformu azyla w EU
Brüssel (dpa/SN). Zwjazkowa ministerka za nutřkowne naležnosće Nancy Faeser je Europski parlament doraznje namołwjała, azylowej reformje, wo kotruž běchu so lěta wadźili, dźensa přihłosować. Předewzaće je zakład rjadowaneje migracije a trajaceje pomocy na dobro komunow, rjekny politikarka SPD nowinarjam. „Europa dyrbi dopokazać, zo je jednanja kmana. Nichtó njesměł tutu temu prawicarskim populistam přewostajić, kotřiž nuzu ludźi za swoju propagandu znjewužiwaja.“
Faeser warnuje, zo je reforma azyloweho prawa rozsudna za dalewobstaće EU. Wotewrjene mjezy mjez krajemi jenož funguja, su-li wonkowne mjezy zawěsćene, wona rjekny. Po nowym systemje měli kóždeho migranta na wonkownej mjezy EU kontrolować a registrować, wona rjekny. Štóž nima prawo trajneho přebywanja w EU, dyrbi so zaso do swojeje domizny nawróćić, sej wona žada.
Parlament EU chcyše dźensa reformu azyla schwalić. Z njej chcedźa migrantow přichodnje do stražowanych lěhwow tyknyć, jich prawo na azyl pruwować a wotpokazanych spěšnje wotsunyć.
Po slepych hasach
Pomoc přilubjena
Móžnosće přichoda wobjednali
To a tamne (10.04.24)
Swětowe mišterstwo slědźacych psow su wčera w mecklenburgsko-předpomorskim Linstowje zahajili. Cyłkownje 48 psow z 22 krajow so na wubědźowanju wobdźěli. Spřihotowali su wjacore stopy na wulkich zahonach, kotrež maja psy slědować. Při tym njesmědźa so wot wopačnych slědow zamylić dać. Wjacore ratarske zawody su swoje pola z něhdźe tysac hektarami za to přewostajili.
Na wšě 570 litrow diesela pokradnyli su njeznaći na twarnišću w vogtlandskim Auerbachu. Paduši běchu prawdźepodobnje w nocy na wutoru wěko bagroweho tanka wotłamali a diesel wotklumpali. Kradnjene ćěriwo płaći tysac eurow. Policija pyta za swědkami.
Młodostni skorža klimy dla
Straßbourg (dpa/SN). Zrani stat čłowjeske prawa, hdyž nječini dosć přećiwo změnje klimy? K tutomu prašenju měješe Europske sudnistwo za čłowjeske prawa dźensa hnydom tři skóržby na blidźe. Skoržili běchu mjez druhim młodostni z Portugalskeje. Woni wumjetuja 30 europskim krajam, mjez druhej Němskej, zo klimowu krizu přiwótřa a tak přichod generacijow wohrožuja. Dyrbjeli-li skóržby wuspěšne być, móhło sudnistwo kraje namołwjeć, wjace za škit klimy činić.
Pistorius za wuwzaća pjenjez dla
Berlin (dpa/SN). Zakitowanski minister Boris Pistorius (SPD) je so za to wuprajił, při wobchadźenju z borzdźidłom zadołženja wo zasadnych wuwzaćach nastupajo nutřkownu a wonkownu wěstotu kraja rozmyslować. W sćelaku ZDF wón wčera wječor rjekny, zo njewidźi žane móžnosće, financnu potrjebu zwjazkoweje wobory z lutowanskimi naprawami w etaće wuzbytkować. Dźe wo sumy pjenjez, kotrež „njemóžeš sej prosće z kože wurězać“, minister potwjerdźi.
Žadaja sej razne słowo kanclera
Miliony ludźi na sewjeru ameriskeho kontinenta a wosrjedź njeho su ...
Amnestija korony dla?
Berlin (dpa/SN). Namjet bywšeho Berlinskeho měšćanosty Michaela Müllera, wšitke chłostanja ranjenja naprawow koronawirusa dla w formje amnestije spušćić, žněje rozdźělny wothłós. Rěčnica za prawniske naležnosće frakcije SPD w zwjazkowym sejmje Sonja Eichwede rjekny nowinarjam, zo njeje móžno, z pomocu amnestije hódnoćić, hač běchu naprawy swój čas přiměrjene abo nic. Podobnje zwurazni to rěčnik frakcije CDU/CSU za prawniske naležnosće Günter Krings (CDU): Amnestija by zasady prawniskeho stata do prašenja stajała.
Porno tomu su Zeleni w zwjazkowym sejmje za amnestiju. Runje na spočatku pandemije běchu naprawy dospołnje přehnate, hdyž njesmědźachu ludźo ani wjace sami na ławce w parku sedźeć, zdźěli frakcija. Tež AfD je za to, wšitke chłostanja Korony dla zběhnyć.
