Wuzwolenje Merza w srjedźišću
Tři dny trajacy zjězd CDU w Berlinje zahajeny – debata wo wusměrjenju
Berlin (dpa/SN). Z narěču stronskeho předsydy Friedricha Merza je CDU dźensa w Berlinje tři dny trajacy zjězd zahajiła. W srjedźišću prěnjeho dnja zetkanja delegatow stejachu w popołdnišich hodźinach wólby 68lětneho Merza za noweho předsydu. Merz je zdobom předsyda frakcije CDU/CSU w zwjazkowym sejmje. Na zjězdźe pod hesłom „Přichod sej zhromadnje zdobyć“ chcedźa so křesćanscy demokraća pjeć tydźenjow do wólbow Europskeho parlamenta jako přećiwny model amploweje koalicije SPD, Zelenych a FDP prezentować.
W swojej narěči šwikaše Friedrich Merz politiku tuchwilneho knježerstwa jako zwrěšćenu. Runočasnje bě sej wón wěsty, zo je CDU po hórkej wólbnej poražce lěta 2021 a po zestupje strony do opozicije zaso derje nastajena. „CDU dźe doprědka, CDU je zaso tu“, rjekny wón k zahajenju zjězda. Tón ma po jeho słowach „sylny signal rozmacha“ dawać.
Z Jankom swjećić
To a tamne (06.05.24)
Rój pčołkow w koparskim stadionje popadnyła je wohnjowa wobora minjenu sobotu w Stuttgarće, dwě hodźinje do zahajenja koparskeje hry přećiwo Bayeram. Insekty běchu so na sćežorje wótřerěčakow zasydlili. We wobchadźenju z pčołkami kubłany wohnjowy wobornik je pčołki w pčołkacym košu popadnył a w lěsu zwonka města wusadźił. Kak bychu pčołki na haru w stadionje a na syły ludźi reagowali, njeje jasne.
Pytajo za rjanymi fotami z přirody je so 81lětny na sewjeru Mecklenburgsko-Předpomorskeje w bahnje zabłudźił a tam tčacy wostał. Z pomocu helikoptera jeho skónčnje wućahnychu. Starc bě předwčerawšim, sobotu, za přećelomaj přirody w bahnje po puću, a bě naraz zhubjeny. Jako jeho nańdźechu, tčeše wón hač k pasej w bahnje. Pomocnicy so k njemu předrěchu a helikopter přiwołachu.
Ruscy hackerojo zamołwići
Adelaide (dpa/SN). Zwjazkowe knježerstwo je sej wěste, zo je jednotka ruskeje wojerskeje tajneje słužby GRU zamołwita za nadpad hackerow na SPD spočatk lońšeho lěta. Statni ruscy hackerojo su Němsku w interneće nadpadnyli, rjekny wonkowna ministerka Annalena Baerbock (Zeleni) na swojim wopyće w Awstralskej w měsće Adelaide. Wona připowědźi konsekwency. SPD bě w juniju 2023 zdźěliła, zo su njeznaći e-mailowe konta předsydstwa SPD wuskušowali.
Žane wikowanje z Israelom
Ankara (dpa/SN). Israelskich nadpadow w Gazaskim pasmje dla je Turkowska dowožowanje a wuwožowanja wšěch israelskich wudźěłkow přetorhnyła. Tole zdźěla turkowske wikowanske ministerstwo na swojej internetnej stronje. Nowe naprawy chcedźa konsekwentnje přesadźić, doniž njeje israelske knježerstwo přetorhnjene dowožowanje pomocnych srědkow do Gazaskeho pasma zaso dowoliło. Israel je rozhorjeny reagował, wumjetujo Turkowskej ranjenje zrěčenjow.
Hamas ma hišće žadanja
Na campusu uniwersity w New-Yorkskim měšćanskim dźělu Manhattan ...
Šunow: Dalši podawk namocy
Zhorjelc (SN/MiP). Hakle před měsacom su njeznaći w Šunowje wopytowarjow w tamnišej Fabrikskej hospodźe wohrožowali, nadběhowali a zranili. Direkcija policije w Zhorjelcu wčera w nowinskej zdźělence wo dalšim podawku informuje, kotryž je so tam stał a w kotrymž kriminalna słužba podhlada nuzowanja, wohrožowanja a zranjenja ćěła dla přepytuje.
Unija: Etat 2025 „eksistencielny“
Macron dale za zasadźenje wojakow
Paris/Kijew (dpa/SN). Najebać mjezynarodnu kritiku francoski prezident Emmanuel Macron dale zasadźenje zapadnych wojakow w Ukrainje njewuzamkuje. „Hdyž Rusojo frontu přełamaja a hdyž Ukraina wo to prosy – štož njeje so hač do dźensnišeho hišće stało – potom dyrbjeli sej my tute prašenju stajić“, rjekny Macron nowinarjam. Tole zwoprědka wuzamknyć, by runje hladajo na wottrašenje Ruskeje wopačne było a rěkało, zo njejsmy z wójny minjenju lět žane wučby ćahnyli, francoski prezident rjekny.
Hladajo na łoskoćiwe połoženje na fronće z ruskimi wuspěchami je sej ukrainski prezident Wolodymyr Zelenskyj žadał, njedawno přilubjene brónje USA spěšnje do Ukrainy přiwjezć. „Sym kongresej USA za rozsud dźakowny, tola tež spěšnosć dodawanja a přesadźenje rozsudow njesmětej žadyn problem być“, rjekny Zelenskyj w swojim wšědnym widejowym poselstwje. Po měsacy trajacej ćahańcy bě kongres USA minjeny tydźeń wobzamknył, Ukrainje brónje w hódnoće 61 miliardow dolarow přewostajić.
Žiwjenje prjedownikow předstajili
To a tamne (03.05.24)
W dobrym pomjatku ma bamž Franciskus časy, jako bě hišće z ćahom a busom po puću. „Tam běch mjez ludźimi a začuwach jich ćopłotu a jich starosće“, rjekny 87lětny wótc katolskeje cyrkwje měsačnikej italskich železnicarjow. Jako šulski hólčec bě Franciskus wšědnje z ćahom do argentinskeje stolicy Buenos Aires jěł. Dźensa wužiwa wón nimo awta hišće papamobil we Vatikanje a pućuje z lětadłom a helikopterom.
We wólbnym lokalu wotpokazali su wčera bywšeho premierministra Wulkeje Britaniskeje Borisa Johnsona, dokelž njeměješe tón wupokaz sobu. Wotpowědny zakoń bě Johnson swój čas sam přesadźił. Při wčerawšich komunalnych wólbach přińdźe Johnson bjez płaćiweho dokumenta. Sobudźěłaćerjo běchu tuž nuzowani, 59lětneho domoj pósłać. Hač je pozdźišo tola hišće wolił, njeje znate.
