Awtor dźensa

Jan Hrjehor

„Prošu 11,50 eurow!“, rjekny mi njedawno přećelna młoda žona w małej budce před tunlom w Awstriskej, kiž wjedźe přez horu Aarlberg. „Hižo zaso popłatk? Sym tola předwčerawšim hakle za Awstrisku digitalnu wignetu za 9,90 eurow za dźesać dnjow kupił! A ta tu njepłaći?“, so Awstričanku přez wočinjene wokno mojeho awta přećelnje woprašam. Posměwk mi do Škodowki je hišće přećelniši a wotmołwa: „Bohužel to tak je, to je jenička móžnosć za tebje, jeli chceš sej bjezbóžny wokołopuć zalutować.“ Tuž wočinich swoju móšničku a wućahnych přichodnu bankowku. Hižo přez Čěsku sym na mojej lětušej zymskej dowolowej jězbje wokoło 13 eurow nadróžneho popłatka płaćił, nětko Awstriska. Hišće njejsym mój cil, wulku sewjernu sćěnu hory Eiger w Grindelwaldźe w Šwicarskej w Bernskim Hornim kraju, docpěł a hižo sym něhdźe 35 eurow popłatka za dróhi a tunl zapłaćił. Zo změju pozdźišo w Šwicarskej hišće dalšu „popłatkowu překwapjenku“ mi při jězbje wědome njebě.

Bjez podpěry njepóńdźe

Planowanja za posledni kónc tydźenja awgusta lěta 2023 běža. Po lońšej přestawce a po nowowutworjenju towarstwa KnappenMan z.t. trjebaja zamołwići za přewjedźenje 35. triatlonowych wubědźowanjow we Łužiskej jězorinje něhdźe 150 dobrowólnych pomocnikow, a to na woběmaj wubědźowanskimaj dnjomaj. Tuž budźe 26. a 27. awgusta 2023 kóžda pomocliwa ruka trěbna. Přizjew so prošu pod . Internetowu stronu namakaš pod www.knappenman.com.

Jutrowne jeja wotběhać

Sportowe towarstwo Natwar Němske Pazlicy přeproša swójby, sportowče a sportowcow na nětko hižo tradicionalne wotběhanje jutrownych jejow, a to jutrownu póndźelu wot 10 hodź při sportowym centrumje w Němskich Pazlicach. Lětsa přewjedźe so sportowa akcija, kotraž je bjez wubědźowanskeho charaktera, zaso jako masowy start. Startowy pjenjez so njehromadźi.

Hraje so w Njebjelčicach

Werderanske ST –

FC Energija Choćebuz 0:7 (0:3)

Zestawa hosći: Sebald – Badu, Hildebrandt, Böhmert (69. Slamar), Borgmann, Hofmann (46. Erlbeck), Eisenhuth (46. Geisler), Sherbakovski, Abu-Alfa, Heike (59.Thiele), Wähling (62.Wagner)

Kaž wočakowane je so regionalny koparski ligist FC Energija Choćebuz pola nižoklasoweho mustwa Werderanske ST w štwórćfinalu krajneho pokalneho wubědźowanja jasnje přesadźił. Přećiwo zastupjerjej Braniborskeje ligi rěkaše po dosć jednostronskej partiji na kóncu 7:0 za aktualneho druheho regionalneje ligi. Za faworita trjechi před 1 500 přihladowarjemi Choćebuski kapitan Axel Borgmann hnydom trójce (18., 56., 76.), dwójce zapisa so Tim Heike (33., 34.) do lisćiny třělcow. Tuta wudospołnja so přez wrota Jana Shcherbakovskeho (71.) a Niclasa Erlbecka. Posledni přetwori pokutny kop w 88. min. Po swojim zranjenju křižneho paska, při zahajenju sezony přećiwo Luckenwalde, měješe wrotar Alexander Seebald swoju prěnju hru, w kotrejž pak měješe lědma móžnosće, swoje kmanosće pokazać.

Biskopičanske KT II –

ST Radwor 3:1 (1:1)

Zestawa hosći: Grenzemann – Wjeńka, Grubert, Šěrak, Paška, Nuk (86. Krječmar), Omran (73. Seiler), Schulze, Jo. Wjaclawk, Hetaš (84. Mička), Šnajder

Na minjenym hrajnym dnju běchu so koparjo z Radworja k načolnikej tabulki do Biskopic podali. Nimo najlěpšeje defensiwy z 12 napřećiwnymi wrotami maja a mějachu hosćićeljo tež najlěpšu ofensiwu ligi ze 63 wrotami. Z tym běchu róle jasnje rozdźělene. Dyrbjało so wjele stać, zo bychu hosćo dypki sobu domoj wzali.