Berlin (dpa/SN). Planam ministra za dźěło Hubertusa Heila (SPD) nastupajo zakładnu rentu so přiběrajcy spjećuja. Koaliciski partner CDU předewšěm kritizuje, zo ma so zakładna renta z dawkowych srědkow płaćić a zo njeje planowane, potrěbnosć ludźi pruwować. Etatowy politikar CDU Eckhardt Rehberg rjekny nowinarjam: „Nadźijam so, zo je Heil swój namjet z financnym ministrom Olafom Scholzom (SPD) wotrěčał a zo tón jemu štyri do šěsć miliardow eurow kóžde lěto přewostaja.“ Zwyšenja dawkow abo nowe kredity njejsu za to móžne, wón rjekny.

Němska rentowa zawěsćernja porno tomu na to pokaza, zo je zwyšenje niskich rentow cyłotowaršnostny nadawk, kiž dyrbjał so w połnej měrje z dawkowych srědkow financować, zdźěli rěčnik zawěsćernje. Tole dyrbjało zaručene być. Plany ministra předwidźa, zo milionam rentnarjam z niskimi dochadami po lětdźesatkach dźěłoweho žiwjenja přichodnje rentu awtomatisce zwyša. Snadne renty chcył wón wo hač do 447 eurow měsačnje zwyšić.

Dale wšelake reakcije na namjety wuhloweje komisije

Lipsk/Choćebuz (dpa/SN). Namjety wuhloweje komisije nastupajo skónčenje zmilinjenja brunicy a strukturnu změnu w potrjechenych brunicowych kónčinach zbudźeja dale najwšelakoriše reakcije.

Tak stej so rjemjeslniskej komorje w Choćebuzu a Drježdźanach ze swojimi žadanjemi nastupajo strukturnu změnu na braniborske krajne knježerstwo wobroćiłoj. Komorje sej žadatej, we Łužicy wosebite hospodarske pasmo zarjadować, hdźež knježa cyle wosebite, přede­wšěm dawkowe wuměnjenja. Tak měli předewzaća nawabić, kotrež nowe dźěłowe městna wutworja. Nimo toho měli infrastrukturu spěšnje wutwarić. Komorje na to pokazujetej, zo je we Łu­žicy něhdźe 18 000 rjemjeslniskich za­wodow z ně­hdźe 84 000 přistajenymi a 4 000 wučomnikami wot skónčenja zmilinjenja brunicy potrjechenych. Po najnowšim woprašowanju zhladuje 60 procentow wšitkich woprašanych zawodow z wulkimi starosćemi na přichod Łužicy. Woni so boja, zo móhło tójšto derje­ wukubłanych ludźi wotpućować, štož by kupnu móc regiona wosłabiło.

Zo je so prof. Helmut Faska na wurazu „předwólby“ postorčił, bě jedna faseta zarjadowanja minjeny pjatk w Lejnje. Wězo, přikład předwólbow k ameriskim prezidentskim wólbam bě namjetej prof. Stefana Oetera sobu kmótřił. W padźe Serbskeje Lěwicy jako přeprošerki dźěše wo to, swójskeho kandidata za krajnu lisćinu strony k wólbam sakskeho parlamenta wobšěrnišo hač dotal legitimować. Tak knježeše nastupajo poprawny zaměr wječora bórze zaso přezjednosć. Přezjedni běchu sej wobdźělnicy – tak z Rownoho, Hodźija, Rakec, Budestec, Njebjelčic, Chrósćic, Budyšina a Drježdźan kaž tež z dalšich třoch w sakskim sejmje zastupjenych stron –, zo měli w zajimje našeho ludu druhdy tež přez stronske hranicy za jedyn postronk ćahnyć. Tale serbska pře­zjednosć wužaduje nětko saksku Lěwicu a wosebje tych stronjanow, kotřiž na wosebitym zjězdźe wo zestawje krajneje lisćiny rozsudźa. Budźe pak jich wobšěrniša legitima­cija Serba bóle přeswědčić? Axel Arlt

Mórske elefanty so w sewjerokaliforniskim narodnym parku Point Reyes přiběrajcy na pola turistow woblubowanym přibrjohu zadomjeja. Přičina: Přibrjóh je blokowaneho etata USA dla zawrjeny, dokelž njemóža tam přistajenych hižo płaćić, zarjadnistwo parka zdźěli. Mórskim elefantam, kotrež so skerje do wotležanych kónčin wróćo sćahnu, su prózdne přibrjohi witane, zo móhli tam swoje młodźata porodźić.

W Kölnskej katedrali maja po wjele lětstotkach nětko tež žony na to dźiwać, zo so wopytowarjo prawje zadźerža. „Wěrimy, zo móža žony dotal muske zastojnstwo derje wudospołnić“, zdźěli probst Gerd Bachner. Dohladowarjo w čerwjenych robach a z čornymi čapkami maja wšědnje 30 000 wopytowarjam infor­macije dawać a na to dźiwać, zo so ludźo w katedrali dostojnje zadźerža.