Wobě pěstowarni zawrěli
Radźićeljo porokuja, zo njeje gmejna staršich dosć informowała
Dźěwin (AK/SN). Na chětro přiwótřene połoženje w zwisku z tuchwilnej koronapandemiju je Dźěwinska gmejna z nachwilnym zawrjenjom swojeju pěstowarnjow w Dźěwinje a Brězowce reagowała. Kaž wjesnjanosta Helmut Krawc (SPD) na zašłym posedźenju gmejnskeje rady zdźěli, bě to sćěh wotpowědnych informacijow ze strowotniskeho zarjada.
W Dźěwinje běchu so někotre sobudźěłaćerki z koronawirusom natyknyli. „Njemóžachmy wšědne dźěło pěstowarnje pobrachowacych kubłarkow hižo zaručić“, informowaše wjesnjanosta gmejnskich radźićelow. Tohodla bě Dźěwinske kubłanišćo wot 30. nowembra hač do 4. decembra zawrjene. W Brězowskej pěstowarni bu jedna kubłarka pozitiwnje na wirus testowana. Tak je tamniše zarjadnišćo nětko wot 3. decembra hač do 10. decembra zawrjena.
Policija (07.12.20)
Wulku škodu načinili
Wóspork. Komunalny twarski zawod městačka Wósporka bě w nocy na sobotu cil paduchow. Tón dźeń dopołdnja dźě dyrbjachu zwěsćić, zo bě so tam něchtó zadobył a najprjedy wonkowne wrota a po tym dalše wrota składu a gratoweje hale namócnje wočinił. Z hale pokradnychu njeznaći tam wotstajeny Ford Transit. Dwanaće lět stare awto je něhdźe 10 000 eurow hódne. Dale su skućićeljo na připowěšaku ležacy grat w cyłkownej hódnoće 15 000 eurow sobu wzali. Nimo toho nasta při zadobywanju 2 000 eurow wěcneje škody. Kriminalisća pad nětko přepytuja.
Kubłanišćo zarjadowanja wotprajiło
Dźeń a wjace zjawnych zarjadnišćow reaguje na dale napjate połoženje wokoło koronapandemije. Nětko je tež Drježdźansko-Mišnjanske biskopstwo swoje kubłanišćo zawrěło.
Smochćicy (SN/MWj). Koronapandemije a škitnych postajenjow Swobodneho stata Sakskeje dla wostanje Smochčanske kubłanišćo swjateho Bena za hosći na njewěsty čas zawrjene, kaž jeho rektor Sebastian Kieslich zdźěli. „To bohužel woznamjenja, zo so tu žane zjawne zarjadowanja – tež žane Bože mšě – njewotměja. Wšitke naše kursy su hač do 31. měrca 2021 wotprajene“, rěka w lisće rektora.
Najebać najwobšěrniše naprawy prewencije ličby infekcijow w Budyskim wokrjesu dale přiběraja. Tohodla je połoženje w chorownjach a hladarnjach jara napjate, Sebastian Kieslich dale pisa. „Kaznja hodźiny tuž rěka, statne předpisy konsekwentnje zwoprawdźić. Jako cyrkwinske kubłanišćo mamy stajnje tež towaršnostnu zamołwitosć. Naša solidarita słuša předewšěm staršim a chorym, kotřiž móhli so wosebje spěšnje z wirusom natyknyć a pod tym jara ćerpja.“
Smartfon na młodźinskim nyšporje wčera, 6. decembra, w ...
Adwentna nalada lětsa hinaša
Wuspěch hinak klinči
Z testom sydom infekcijow wotkryli
Worklecy/Budyšin (SN/JaW). Na prěnim masowym spěšnotesće we wokrjesu Budyšin je so minjeny pjatk cyłkownje 321 ludźi Worklečanskeje gmejny wobdźěliło. 34 wosobow wužiwaše móžnosć, sej jedyn z třoch mobilnych testowanskich teamow domoj skazać, zo bychu swój dosmyk (Abstrich) za test wotedali. Kaž Budyski krajnoradny zarjad w swojich wšědnych zdźělenkach wo aktualnym stawje nastupajo koronakrizu informuje, maja to za wuspěch. „To je wjace, hač smy wočakowali. Wšako běše test dobrowólny.“ Sedmjoch su pozitiwnje na koronawirus testowali. Jich su po spěšnotesće „hnydom na městnje hišće raz z dokładnišim PCR-testom přepytowali, kotrež jutře w laborje wuhódnoćimy“, rěkaše z wokrjesneho zarjada. W sobotnym wozjewjenju koronaličbow su wšitke sydom wobkrućili.
Krótkopowěsće (07.12.20)
Jutrowne wiki klětu wupadnu
Budyšin. 30. serbske jutrowne wiki klětu kónc februara w Budyskim Serbskim domje koronapandemije dla njebudu. To bě ćežki rozsud předsydstwa zarjadowaceho Spěchowanskeho kruha za serbsku ludowu kulturu z.t. 68. wubědźowanje wo najrjeńše jutrowne jejko pak přewjedu, nowy posledni termin zapodaća kolekcijow je pjatk, 19. měrca 2021, runje tak wurisanje za dźěći a młodostnych z terminom 7. apryla 2021.
Hudźbna šula znowa zawrjena
Budyšin. Budyski wokrjes je swoju hudźbu šulu hladajo na dale wulku ličbu incidency z koronawirusom a z toho wurosćaceho aktualneho połoženja sobotu zaso zawrěł. Potrjechene su wšitke městnosće wuwučowanja. Starši su prošeni so pola wučerjow resp. wučerkow wobhonić, kak nětko z poskitkom za online-wučbu znowa dale poběži.
Dźeń Saksow hakle w lěće 2022
Policija (04.12.20)
Kedźbu z horcym popjełom!
Wulka Dubrawa. Štóž ma doma kamin, jón runje w zymskim času rady tepi. Ale někotre prawidła dyrbiš wšak při tym wobkedźbować a dodźeržeć, kaž dyrbješe wobydler wčera rano we Wulkej Dubrawje nazhonić. Po wšěm zdaću bě wón horcy popjeł do wotpadkoweho sudobja sypnył, na čož so pódla stejace sudobjo za staru papjeru zapali. Woheń wobškodźi nimo toho bróžnju. Kedźbliwy swědk to wčera krótko do 7 hodź. pytny a započa woheń hašeć. Při tym so wón snadnje zrani.
Adwentnu pychu wobdźiwać
W delnich Sulšecach steji kóžde lěto wulki swěčkowy wobłuk
Sulšecy (aha/SN). Wosrjedź Sulšec pola Kulowa před mostom swj. Marka přez Čorny Halštrow steji wulki swjaty křiž. Starši wjesnjenjo so dopominaja, zo steješe tón tam hižo 1965, hdyž bu tehdy za nim stejaca gratownja wohnjoweje wobory spotorhany a na hinašim, z techniku lěpje docpějomnym městnje znowa natwarjena. Po towaršnostnym přewróće bě Jurij Brösan wjesnjanosta Sulšec, wot lěta 1994 wón wjesnej radźe předsydari. Jeho ideja bě, wobydlerjow a nimo jěducych w adwentnym času widźomnje na hody přihotować. Za to wjacorych rjemjeslnisce wobdarjenych wjesnjanow zahorić njebě ćežko.
