Hórki (aha/SN). Hač do wuměnkarskeje staroby bě dźensa 79lětny Hórčan Bernhard Vcelich za wodźidłom wulkich nakładnych awtow po puću. Při nakładowanju a wotkładowanju kaž tež při trěbnych reparaturach mašinow bě stajnje ćežkemu ćělnemu dźěłu wustajeny. To je sylneho, wulkeho muža formowało. Čłowjek njeby wěrił, zo je so docpěwši rentnarsku starobu wěnował dospołnje hinašemu dźěłu. Ze swojimaj wulkimaj rukomaj zamóže so filigranemu wužadanju stajić a twari Bože narodki, pyramidy a swěčkate wobłuki. Lubosć dźěłać z drjewom a trěbne kmanosće za to je sej hižo wjele zašo přiswojił.
Skupina neonacijow zakazana
Berlin. Z „Wolfsbrigade 44“ je zwjazkowy minister nutřkowneho Horst Seehofer (CSU) znowa zjednoćenstwo neonacijow zakazał, kaž jeho ministerstwo informuje. Při raciji dźensa rano w Mecklenburgsko-Předpomorskej, Sewjerorynsko-Westfalskej a Hessenskej su zastojnicy pola jědnaće čłonow brigady brónje našli. Zeskupnjenje je zdobom pod mjenom „Sturmbrigade 44“ znate.
Pjenjezy za nowe tramwajki
Budyšin. Jednohłósnje su radźićeljo zaměroweho wobchadneho zwjazka Hornja Łužica-Delnja Šleska (ZVON) wčera w Budyšinje wobzamknyli, zo ma město Zhorjelc spěchowanje za tramwajki dóstać. Wosom nowych jězdźidłow chcedźa tam kupić. Cyłkownje ma město nad Nysu za to lětsa a klětu dohromady 240 000 eurow dóstać.
Přezmjeznu cwólbu rozbili
Z alkoholom a bjez dowolnosće
Wojerecy. Prawy čuch mějachu policisća, jako sobotu wječor 21lětneho šofera Opela we Wojerecach zadźeržachu a kontrolowachu. Pola njeho zwěsćichu mjenujcy 0,52 promilow alkohola w kreji. Drogowy test bě tohorunja pozitiwny. Skónčnje so tež hišće wukopa, zo młody muž scyła žanu płaćiwu jězbnu dowolnosć njeměješe.
Budyšin. Dweju zadobywanjow a rubježneho wudrěwanja dla steji wot dźensnišeho Wojerowčan před krajnym sudnistwom w Budyšinje. 32lětnemu wumjetuja, zo je so loni w měrcu do cateringoweho serwisa w Drježdźanach zadobył a 350 eurow pokradnył. W juniju je so we Wojerecach do molerskeho zawoda zadobył. A skónčnje je w juliju maskěrowany do Wojerowskeje pjekarskeje předawarnje zastupił a sej wot předawarki wšitke dnjowe dochody žadał. Wobskorženy je dźesać króć předchłostany, zdźěla podobnych deliktow dla, a sedźi w přepytowanskej jatbje.
Forum přewjedu wirtuelnje
Smochćicy. Přichodny Smochčanski forum tamnišeho kubłanišća swj. Bena wotměje so 7. decembra pod hesłom „Hody – mjez konsumom a dobrom wšěch“ ze socialnej wědomostnicu Beju Hackbarth. Wona chce z wobdźělnikami wo tym rěčeć, kak móže so za wšitkich dobre žiwjenje poradźić. Forum přewjedu mjenowany dźeń wot 19.30 do 21 hodź. wirtuelnje. Zajimcy měli so e-mailnje pod přizjewić a dóstanu na to přistup za wobdźělenje.
Interaktiwna adwentnička
Wojerecy (AK/SN). Swoju wobšěrnu zběrku z 80lětneho wobstaća přepołoži Wojerowski měšćanski muzej do noweho składa blisko kompjuteroweho muzeja Konrada Zuseho. Přećah móže so zahajić, zdźěli nawodnica wustajenišća Kerstin Noack. Nowe rumnosće přewostaji Wojerowska bydlenjotwarska towaršnosć ze zrěčenjom na 30 lět. „Depot zaruča wysoke žadanja na stabilnosć wjerchow, na změny temperatury, włóžnotu a swěcu, zo móhli wšitke dokumenty wo stawiznach města lětdźesatki składować“, praji Kerstin Noack.
Kamjenc (BG/SN). Lěto 2025 ma jónkrótne za Łužicu być. To wěšćeše nowinarska konferenca k zahajenju idejoweje kampanje minjeny tydźeń w Kamjenskej radnicy. Za nimale štyri lěta wšak zhladuja w Kamjencu na 800lětne wobstaće Lessingoweho města. We wopismje, kotrež je w Pančičansko-Kukowskim klóštrje Marijina hwězda, wšak je město jako „oppidum“ – forma měšćanskeho sydlenja – prěni króć naspomnjene. W dokumenće je tež rěč wo eksistency wokolnych sydlišćow, mjez druhim Brunowa, Běłeje (Biehla), Čornowa (Zschornau), Křidoła (Schiedel), Jěžowa (Jesau) a (Němskich) Pazlic. Mjeztym su wone do Kamjenca zagmejnowane.
„Zusowy campus“ njebudźe
Wojerecy. Na přibrjohu Šibojskeho jězora njebudźe w blišim času uniwersita „Zusowy campus“ nastać. To wuchadźa z rozmołwow noweho Wojerowskeho wyšeho měšćanasty Torstena Rubana-Zeha (SPD) ze zastupjerjemi Drježdźanskeje techniskeje uniwersity a sakskeho knježerstwa. Přičina je, zo njeje kubłanišćo ze srědkow zakonja k zesylnjenju strukturow spěchujomna.
Hudźbne šule zaso wotewrjene
Budyšin. Z wučbu za jednotliwca móža hudźbne šule w Sakskej wot jutřišeho zaso skutkować. Kulturna ministerka Barbara Klepsch (CDU) bě so we wobłuku předźěłanja sakskeho škitneho postajenja korony dla za to zasadźiła. Tež w Budyskej wokrjesnej hudźbnej šuli přizjewja so wučerjo pola staršich, kaž jeje nawodnica Charlotte Garnys rjekny. Na to hakle zestaja hodźinski plan.
Sakske myta wupisane